Daika Ia Haroro Diba?
1 Haroro gaukara oi laloa neganai, nega ta oiemu mamina be Mose ena bamona, a? Ia gwau: “Lauegu Lohiabada e, lau be hereva dekenai egu malana be ia haraga lasi, guna ia mai bona harihari lau dekenai oi hereva neganai danu.” (Eso. 4:10) Bema oiemu mamina be unai bamona, reana oi ura lasi oi haroro. To, Iesu ese ‘ita ia hadibaia, taunimanima ibounai dekenai do ita haroro.’ (Kara 10:42) Edena bamona ita be sivarai namona harorolaia tauna ai ita lao diba?
2 Iseda edukeisini ena bada ese ita ia hadibaia lasi haroro gaukara ita karaia totona. Paulo ia gwau Dirava ia boiria taudia “momo lasi be mai aonega, inai tanobada ena aonega bamona” ma danu “inai tanobada ena aonega be kavakava, Dirava ena vairana dekenai.” (1 Kor. 1:26; 3:19) Iesu ese imana gaukara idia karaia taudia bogaragina amo ena aposetolo taudia ia abia hidi—idia hani be haoda taudia. Hekokoroku tomadiho gunalaia taudia idia laloa idia be “sikuli bada lasi bona aonega bada lasi taudia” bona idia dadaraidia. Tanobada taudia idia laloa, aposetolo taudia idia hegeregere lasi haroro totona. To Pentekoste dinana ai, Petero ena haroro herevana aonegana ese taunimanima 3,000 ia veria bapatiso idia abia totona!—Kara 2:14, 37-41; 4:13.
3 Iehova ese Aonega Ia Henia Dainai Ita Haroro Diba: Paulo ia gwau: “Dirava sibona ese aonega ai dekenai ia henia, vadaeni inai gaukara ai karaia diba.” (2 Kor. 3:5) Iehova, aonega ena Badina, ese taunimanima milioni momo ia hadibaia Basileia ena hereva momokani idia harorolaia totona. (Isa. 54:13) Lagani gunanai, taunimanima 338,491 idia bapatiso bona “hanamoa ena revareva” bamona idia hahedinaraia unai gaukara be namo bona anina ia havaraia. (2 Kor. 3:1-3) Badina namodia idia noho dainai, mai eda goada ida Iehova amo ita dibaia gaudia ita harorolaia totona.
4 Dirava ena orea ese tanobada ibounai dekenai hadibaia gaukarana ia hamatamaia haroro taudia durua totona. Baibel bona Baibel stadi bukadia idauidau momo amo ita idia hadibaia ita be ‘hegeregere momokani bona kara namodia idia karaia diba’ haroro taudia ai ita lao totona. (2 Tim. 3:16, 17) Society ena buka lalodiai, diba bada ia noho dainai taunimanima momo idia hoa. Haheitalai be Sweden ena magasin ta, ia gwau: “Iehova ena Witness taudia ese idia harorolaia abidadama ia durua bada gauna be edia diba bada Baibel dekenai, bona tanobada hegegemadai unai diba idia gaukaralaia namonamo dalana.”
5 Iseda pura ta ta iboudiai ita karaia hebou ima dekenai ita idia hadibaia dainai, iseda Baibel duahiduahi bona stadi dainai, Haroro School ai idia sisiba henia dainai, idia manada haroro taudia edia heduru dainai, bona gau badana be, Iehova ena lauma siahu ena heduru dainai, ita daradara lasi Iehova ia laloa ita hegeregere haroro totona. Momokani, ‘inai dagi Dirava dekena amo ita abia. Ita be Keriso ena hesiai taudia dainai, Dirava ena vairana dekenai ita hereva noho, mai laloa maoromaoro danu.’—2 Kor. 2:17.
6 Dirava ese ena orea amo ia henia tiokratik treinini bema ita gaukaralaia namonamo, badina ta ia noho lasi ita haroro lasi totona eiava ita gari totona. Mai moale ida taunimanima dekenai ita haroro diba, bona ita daradara lasi Iehova ese iseda hekwarahi do ia hanamoa.—1 Kor. 3:6.