Gau Ibounai Ita Abia Hegaegae Dirava Ena Hereva Hadibaia Totona
“Dirava sibona ese aonega ai dekenai ia henia, vadaeni inai gaukara ai karaia diba.”—2 KORINTO 3:5, 6.
1, 2. Dubu haida be haroro gaukara idia karaia toho, to dahaka dainai nega momo idia kwalimu lasi?
BEMA gaukara ta idia henia oi dekenai, to oi hegeregere lasi dainai oi karaia diba lasi, do oi moale, a? Mani oi laloa: Unai gaukara ena kohu bona tulu ibounai be oi vairanai idia noho. To unai gaukara ena karaia dalana be oi diba lasi momokani. Ma danu, unai gaukara oi karaia haorea haraga be gau badana. Taunimanima be oi dekenai idia tabekau. Reana unai oi lalohisihisilaia bada!
2 Unai bamona hekwakwanai ia vara momokani diba. Hegeregere, inai haheitalai oi laloa. Nega haida Kerisendom ena dubu ta be ruma-ta-ruma-ta haroro gaukara idia karaia toho. To pura haida eiava hua haida idia do ore lasi lalonai, unai gaukara ia maragi ia lao ela bona ia ore. Dahaka dainai? Kerisendom ese ena taunimanima ia durua lasi dainai, idia hegeregere lasi unai gaukara karaia totona. Ena be dubu gunalaia taudia be lagani momo lalonai iunivesiti bona dubu ena sikuli badadia idia lao henia, to idia danu idia hegeregere lasi unai haroro gaukara karaia totona. Dahaka dainai ita gwau diba unai be momokani?
3. Edena hereva be 2 Korinto 3:5, 6 ai ia noho, bona ena anina be dahaka?
3 Dirava ena Hereva lalonai, Keristani sivarai namona harorolaia totona ia hegeregere momokani tauna ia gwauraia hedinarai. Aposetolo Paulo be Dirava ena lauma amo inai ia torea, ia gwau: “Ai sibona inai gaukara ai karaia be ai hegeregere lasi. Unai dainai ai sibona be aonega taudia ai gwauraia diba lasi. Dirava sibona ese aonega ai dekenai ia henia, vadaeni inai gaukara ai karaia diba. Ia sibona ese ai dekenai diba ia henia.” (2 Korinto 3:5, 6) Unuseniai idia gaukaralaia herevana—“ai karaia diba”—mani oi laloa. Ena anina be dahaka? Ena anina be sivarai namona idia harorolaia taudia momokanidia ese unai gaukara idia karaia diba. Idia hegeregere momokani haroro gaukara karaia totona.
4. (a) Paulo ena haheitalai be edena dala ai ia hahedinaraia Keristani haroro gaukara karaia totona idia hegeregere taudia be ladana bada taudia sibona lasi? (b) Ita hegeregere haroro gaukara ita karaia totona, Iehova ese edena gaudia toi ia gaukaralaia?
4 To unai gaukara karaia dibana be edeseniai amo ia mai? Sibodia edia diba amo ia mai, a? Sibodia edia aonega amo, a? Sikuli badadia lalonai unai idia dibaia, a? Toana be aposetolo Paulo ese unai gau iboudiai ia abia. (Kara 22:3; Filipi 3:4, 5) To, mai manau ida ia hahedinaraia ena haroro gaukara karaia dibana be sikuli badadia amo ia abia lasi, to Iehova Dirava amo ia abia. Unai gaukara idia karaia diba taudia be ladana bada taudia sibona, a? Paulo be Korinto kongregesen dekenai ia siaia revareva lalonai, ia gwau “inai gaukara ai karaia diba.” Unai ese ia hahedinaraia Iehova ese dala ia karaia iena abidadama hesiai taudia ibounai idia hegeregere ia henia gaukarana idia karaia diba totona. Hari, Iehova be edena gaudia ia gaukaralaia Keristani taudia momokanidia do idia hegeregere totona? Namona be ia gaukaralaia gaudia toi ita herevalaia: (1) iena Hereva, (2) iena lauma helaga, bona (3) iena tanobada oreana.
Iehova Ena Hereva Dainai Ita Hegeregere
5, 6. Buka Helaga ena hereva dainai, Keristani taudia momokanidia ese dahaka idia karaia?
5 Gau ginigunana be, Dirava ena Hereva be edena bamona ita ia durua ita hegeregere haroro gaukara karaia totona? Paulo ia gwau: “Buka Helaga ibounai be Dirava ena lauma amo ia vara bona ia be mai ena namo hadibaia totona, sisiba henia totona, gau idauidau hamaoromaoroa totona, kara maoromaoro ai matahakani henia totona, vadaeni Dirava ena tau be do ia hegeregere momokani, gau ibounai ia abia hegaegae gaukara namodia ibounai karaia totona.” (2 Timoteo 3:16, 17, NW ) Unai dainai, Buka Helaga ena heduru amo do ita “hegeregere momokani,” ita be “gau ibounai” ita abia unai ‘gaukara namona,’ Dirava ena Hereva hadibaia gaukarana, ita karaia totona. To Kerisendom ena dubu idauidau idia badinaia taudia be edena bamona? Idia danu be Baibel idia duahia diba. Dahaka dainai buka tamona ese taunimanima haida ia durua haroro taudia namodia ai idia lao totona, to ma haida ia durua lasi? Baibel ita laloa dalana amo haere ita davaria diba.
6 Madi, hari inai negai dubu dekenai idia lao taudia momo idia abia dae lasi Baibel ena sivarai “be Dirava ena hereva momokani.” (1 Tesalonika 2:13) Unai dala dekenai Kerisendom ena kara be hemarai gauna. Dubu gunalaia taudia be lagani momo lalonai tomadiho sikuli dekenai idia lao murinai, Dirava ena Hereva idia hadibaia totona, gau ibounai idia abia hegaegae, a? Lasi. Stiuden haida be tomadiho sikuli ena kosi idia hamatamaia neganai Baibel idia abidadama henia, to kosi idia haorea murinai, Baibel idia abia dae lasi! Unai murinai, Dirava ena Hereva—hari idia momo ese idia abidadama henia noho lasi gauna—idia harorolaia lasi, to kara ma haida idia karaia. Hegeregere politikol hepapahuahu lalonai idia vareai, taunimanima edia hekwarahi hanamoa daladia, eiava taunimanima edia aonega be edia haroro herevadia lalonai idia kikilaia momo. (2 Timoteo 4:3) To Keristani taudia korikoridia edia kara be idau, Iesu Keriso ena haheitalai idia tohotohoa.
7, 8. Edena dala ai Iesu ena lalohadai Dirava ena Hereva dekenai be iena nega lalonai idia noho tomadiho gunalaia taudia edia lalohadai amo ia idau?
7 Iesu ese iena nega lalonai idia noho tomadiho gunalaia taudia edia laloa dalana ia dadaraia. Herevana Iesu ese grup maragina, hegeregere iena aposetolo taudia, eiava taunimanima hutuma ia hadibaia, to ia ese toretore helagadia ia gaukaralaia namonamo. (Mataio 13:10-17; 15:1-11) Unai kara dainai, ia be unai tomadiho gunalaia taudia amo ia idau. Idia ura lasi ladana maragi taudia be Dirava ena hahediba hereva dobudia idia tahua. Vaia, unai nega ena hadibaia tauna ena kara be Baibel siri aukadia haida be ena stiuden namona ta sibona ida do ia herevalaia—to unai neganai danu, iena gadona ena rege ia hamaragia bona iena kwarana be dabua amo ia koua. Unai tomadiho gunalaia taudia be Baibel ena kahana haida kikilaia karana idia gari henia, Dirava ena ladana gwauraia karana idia garilaia hegeregerena!
8 Keriso be unai bamona lasi. Ia abia dae taunimanima ibounai, taunimanima haida sibona lasi, ese “Dirava ena uduna dekena amo idia mai hereva ibounai” idia lalohadailaia be namo. Iesu ia ura lasi aonega ena ki be diba bada tahua taudia haida sibona dekenai ia henia. Iena hahediba taudia ia hamaoroa: “Dibura lalonai umui lau hamaoroa herevadia be diari dekenai do umui gwauraia. Bona emui taiana dekenai umui kamonai herevadia be ruma ena ataiai dekena amo do umui harorolaia diho.” (Mataio 4:4; 10:27) Iesu ia ura dikadika Dirava amo ia mai dibana be taunimanima momo herea dekenai do ia henia.
9. Keristani taudia momokanidia ese Baibel idia gaukaralaia dahaka idia karaia totona?
9 Namona be iseda hadibaia gaukarana ena hereva badadia be Dirava ena Hereva amo ita abia. Hegeregere, Iehova ena Witnes taudia edia Kingdom Hall ta lalonai hereva ta ita henia neganai, nega momo Baibel siri haida ita duahia sibona be hegeregere lasi. Namona be edia anina ita herevalaia, ita haheitalaia, bona edia badina siridia hegeregerena ita gaukaralaia. Iseda tahua gauna be Baibel ena hereva be idia printaia pepana amo ita abia bona kamonai taudia edia kudouna lalonai ita atoa bamona. (Nehemia 8:8, 12) Sisiba o matahakani henia negana ai, Baibel ita gaukaralaia be namo. Ena be Iehova ena taunimanima edia gado bona edia noho be idauidau, to idia ibounai ese buka iboudiai ia hereaia Bukana—Baibel—idia matauraia.
10. Baibel lalonai Dirava ena lauma ia havaraia sivaraidia ese iseda mauri lalonai dahaka idia haidaua diba?
10 Baibel be unai bamona hemataurai ida ita gaukaralaia neganai, iena sivarai be mai ena siahu. (Heberu 4:12) Taunimanima ia hagoadaia edia mauri dalana idia haidaua totona, hegeregere sihari kava, heudahanai, kaivakuku tomadiho henia karadia, inuinu kekero, bona henaohenao, Baibel ese ia gwauraia dika karadia unai, idia rakatania. Taunimanima momo ia durua edia mauri gunana idia kokia bona mauri matamatana idia atoa totona. (Efeso 4:20-24) Oibe, bema ita ese taunimanima edia lalohadai o sene karadia ita atoa guna lasi, to Baibel ita matauraia guna, bona mai abidadama ida ita gaukaralaia, do ita hegeregere momokani, bona gau ibounai ita abia hegaegae Dirava ena Hereva ita hadibaia totona.
Iehova Ena Lauma Dainai Ita Hegeregere
11. Dahaka dainai ita gwau Iehova ena lauma helaga be ‘durua tauna’ be maoro?
11 Hari do ita herevalaia gauna iharuana be, Iehova ena lauma helaga o gaukara siahuna dainai, gau ibounai ita abia hegaegae vadaeni. Namona be ita laloaboio lasi, Iehova ena lauma ena goada be hereadaena. Iehova ese ia lalokau henia Natuna dekenai unai siahu badana ia henia, Keristani taudia momokanidia ibounai ia durua totona. Unai dainai, Iesu ese lauma helaga ia herevalaia neganai, ia gwauraia ‘durua tauna’ be maoro. (Ioane 16:7) Ia murinai idia raka taudia ia hagoadaia Iehova idia noia unai lauma do ia henia totona, bona ia gwau Iehova ese mai hariharibada ida do ia henia.—Luka 11:10-13; Iamesi 1:17.
12, 13. (a) Dahaka dainai iseda haroro gaukara lalonai Dirava ita noia lauma helaga do ia siaia ita ia durua totona be gau badana? (b) Farisea taudia be edena dala ai idia hahedinaraia idia lalonai lauma helaga ia gaukara lasi?
12 Namona be dina ta ta ai ita guriguri lauma helaga ita abia totona, iseda haroro gaukara ai ita ia durua be gau badana. Unai gaukara siahuna ena anina ita dekenai be dahaka? Iseda lalona bona kudouna lalonai ia gaukara, bena ena heduru amo iseda kara ita haidaua, lauma dalanai ita tubu, bona mauri gunana ita kokia bona mauri matamatana ita atoa diba. (Kolose 3:9, 10) Iena heduru amo, dava bada gaudia, Keriso bamona karadia, ita hahedinaraia diba. Ita momo be Galatia 5:22, 23 ena hereva be iseda lalona amo ita gwauraia diba. Unai siri lalodiai, Dirava ena lauma ena huahua edia lista ia noho. Ginigunana be lalokau. Iseda haroro gaukara lalonai unai kara be mai anina bada. Dahaka dainai?
13 Lalokau be taunimanima edia kudouna ia hamarerea bada gauna. Keristani taudia momokanidia ese Iehova bona edia dekena tauna idia lalokau henia dainai, idia ura sivarai namona idia harorolaia. (Mareko 12:28-31) Bema unai bamona lalokau be lasi, Dirava ena Hereva hadibaia gaukarana ita karaia totona do ita hegeregere lasi momokani. Iesu ena kara bona Farisea taudia edia kara edia idau mani oi laloa. Mataio 9:36 ese Iesu ia herevalaia, ia gwau: “Taunimanima momo Iesu ese ia itaia, vadaeni ia bogahisihisi idia dekenai, badina be edia tauanina idia manokamanoka, bona idia lao idau gabu idau gabu dekenai, mamoe idia naria lasi bamona.” To Farisea taudia edia lalohadai ladana maragi taudia dekenai be edena bamona? Idia gwau: ‘Inai ariara taunimanima be Mose ena taravatu idia diba lasi, dika davana do idia davaria.’ (Ioane 7:49) Farisea taudia ese taunimanima idia lalokau henia lasi, to idia inai henidia bada. Ia hedinarai goevagoeva, Iehova ena lauma be idia lalonai ia gaukara lasi.
14. Iesu ese ena haroro gaukara lalonai ia hahedinaraia lalokauna ese ita ia hagoadaia dahaka ita karaia totona?
14 Iesu be taunimanima ia hebogahisi henia. Ia diba idia hisihisi. Ia diba idia be mamoe bamona, mai edia naria tauna lasi, bona ma haida ese idia kara dika henia bona idia negea lao negea mai. Ioane 2:25 ese ita ia hamaoroa, Iesu be “taunimanima edia laloa, be ia diba momokani vadaeni.” Iehova ese gau iboudiai ia havaraia neganai, Iesu be ena Gaukara Tauna Badana dainai, Iesu be taunimanima edia kara ia lalo-pararalaia. (Aonega Herevadia 8:30, 31) Unai lalo-parara ese iena lalokau ia habadaia. Namona be nega ibounai lalokau dainai iseda haroro gaukara ita karaia! Bema ita laloa unai ita hanamoa diba, namona be Iehova ena lauma helaga abia totona ita guriguri bena iseda guriguri hegeregerena ita kara. Iehova ese do ia haerelaia. Ia ese ena siahu, ta ese ia koua diba lasi siahuna, do ia siaia bona ita do ia durua, ia hegeregere momokani sivarai namona ia harorolaia totona tauna, Keriso, bamona do ita kara.
15. Edena dala ai Isaia 61:1-3 ena hereva be maoro Iesu dekenai, to taravatu hadibaia taudia bona Farisea taudia edia kerere ia hahedinaraia?
15 Iesu ena gaukara karaia dibana be edeseniai amo ia abia? Ia gwau: “Lohiabada ena Lauma ese lau ia hahonua.” (Luka 4:17-21) Oibe, Iehova be ena lauma helaga amo Iesu ia abia hidi. Iesu be gwaumaoro ma ta ia abia be anina lasi. To lauma helaga ese iena negai idia noho tomadiho gunalaia taudia ia abia hidi, a? Lasi. Bona gau ibounai idia abia hegaegae lasi, Isaia 61:1-3 idia hagugurua totona. Iesu ese unai ia duahia badabada bona ia gwau ia dekenai ia guguru. Mani unai siri oi duahia bona do oi itaia unai taravatu hadibaia taudia bona Farisea taudia mai edia koikoi ese ia gwauraia gaudia idia karaia lasi. Ogogami taudia dekenai sivarai namona idia harorolaia diba lasi badina idia abia lasi. Bona dibura lalonai idia noho taudia ruhaia karana bona matakepulu taudia edia matana hanamoa karana be edena bamona idia harorolaia diba? Lauma dalanai idia danu idia matakepulu bona taunimanima edia sene karadia ese idia guidia! Ita be unai Farisea taudia bamona lasi, bona ita hegeregere momokani taunimanima hadibaia totona, a?
16. Dahaka dainai Iehova ena taunimanima idia diba idia hegeregere iena hesiai gaukara karaia totona?
16 Momokani, Kerisendom ena sikuli badadia dekenai ita lao lasi. Ita be tomadiho sikuli badana amo hadibaia tauna ena dagi ita abia lasi. Unai ena anina be ita hegeregere lasi, a? Lasi vaitani! Iehova ese ita ia abia hidi ena Witnes taudia ai ita lao totona. (Isaia 43:10-12) Bema iena lauma abia totona ita guriguri bona ia hegeregerena ita gaukara, do ita hegeregere momokani. Momokani, ita be goevadae lasi taudia, bona Hadibaia Tauna Badana, Iesu, ena haheitalai ita tohotohoa goevagoeva diba lasi. To, ita hegeregere bona gau ibounai ita abia hegaegae ena Hereva ita hadibaia totona, Iehova ese ena lauma ia henia dainai, ia ita tanikiu henia be namo, ani?
Iehova Ena Orea Dainai Ita Hegeregere
17-19. Pura ta ta ai, Iehova ena orea ia henia hebou ima lalonai, edena heduru ita abia do ita hegeregere haroro taudia ai ita lao totona?
17 Vadaeni, namona be Iehova ia gaukaralaia gauna ihatoina, ia dainai gau ibounai ita abia hegaegae iena Hereva hadibaia totona—iena tanobada ekalesia o oreana—do ita herevalaia. Ia ese ita ia hadibaia haroro taudia ai do ita lao totona. Edena bamona? Diba ita abia negadia mani oi laloa! Vaia, pura ta ta lalonai, Keristani heboudia ima ita lao henia. (Heberu 10:24, 25) Kongregesen Buka Stadi ena grup maragidia lalonai ita hebou, Iehova ena orea ia henia stadi bukana amo Baibel ita stadilaia namonamo totona. Haere henia bona kamonai karana amo, diba ita abia bona unai be hagoadaia heheni karana. Danu, buka stadi naria tauna ese iena hadibaia gaukarana lalonai ita ta ta ia laloa diba. Pablik Tok bona Gima Kohorona Stadi lalonai lauma aniani namodia ma haida ita abia.
18 Iseda Tiokratik Haroro Sikuli idia karaia dalana be ita ia hadibaia, hadibaia taudia namodia ai do ita lao totona. Hereva ta ita hegaegaelaia neganai, Dirava ena Hereva gaukaralaia, gau idauidau herevalaia totona, ita dibaia. (1 Petero 3:15) Nega ta hereva ta oi abia bona oi laloa do oi kikilaia gauna oi diba namonamo vadaeni, to ia amo gau matamata oi dibaia, a? Nega momo unai ia vara. Iseda diba gau ta dekenai, ena habadaia dalana hereadaena, be ma haida dekenai ita hadibaia. Ita be hereva ta ita henia lasi neganai danu, iseda hadibaia gaukarana ita hanamoa diba. Stiuden ta ta ena kara namodia ita itaia, bona unai kara be edena bamona ita tohotohoa diba ita laloa.
19 Hesiai Hebou idia karaia dalana be gau ibounai ita abia hegaegae, Dirava ena Hereva hadibaia taudia ai ita lao totona. Pura ta ta ai, hereva namodia, henanadai bona haere amo ita karaia kahadia, bona iseda haroro gaukara lalonai ita tohotohoa diba haheitalai namodia ita moalelaia. Edena hamatamaia herevana do ita gaukaralaia? Iseda haroro gaukara lalonai ita davaria hekwakwanai be edena bamona ita hanaia diba? Edena haroro daladia, reana ita do tohoa lasi daladia, ita tahua diba? Lou henia bona Baibel stadi ita karaia neganai, dahaka ese iseda hadibaia gaukarana do ia hanamoa? (1 Korinto 9:19-22) Unai bamona henanadai be Hesiai Hebou lalonai idia herevalaia namonamo. Hebou ena kahana momo be Iseda Basileia Gaukara pepana ena hereva amo idia mai, ia be ita abia tulu ma ta, iseda mai anina bada gaukara do ita karaia diba totona.
20. Kongregesen hebou bona sekit bona distrik hebouhebou edia namo ibounai ita abia totona, dahaka ita karaia be namo?
20 Bema iseda hebou totona ita hegaegae, ita lao henidia, bena ita dibaia gaudia be iseda hadibaia gaukarana lalonai ita gaukaralaia, unai kara ese ita do ia hadibaia namonamo. To unai sibona lasi. Hebou badadia—sekit bona distrik hebouhebou—idia karaia dalana be gau ibounai ita abia hegaegae Dirava ena Hereva ita hadibaia totona. Bona ita ura unai bamona sisiba do ita hakala henia bona gaukaralaia!—Luka 8:18.
21. Dahaka ese ia hahedinaraia iseda hadibaia gaukara be anina ia havaraia, to daika ita hanamoa be maoro?
21 Iehova ena hadibaia dalana be anina ia havaraia, a? Idia vara gaudia ese unai idia hahedinaraia. Lagani ta ta ai, taunimanima handred tausen haida ita durua Baibel ena hahediba hereva badadia idia dibaia, bona Dirava ena ura idia dekenai idia badinaia. Iseda namba ia bada ia lao, to ita gwau diba lasi ita dainai unai ia vara. Namona be Iesu bamona, ita be dahaka ia vara ita laloa namonamo. Ia gwau: “Lauegu Tamana, lau ia siaia Diravana, ese do ia veria mai tauna sibona lau dekenai do ia mai diba.” Idaunegai aposetolo taudia bamona, ita momo be sikuli bada lasi bona ladana bada lasi taudia. (Ioane 6:44; Kara 4:13) Bema ita kwalimu ia be Iehova dainai, badina ia ese kudou-maoro taudia ia veria mai hereva momokani dekenai. Paulo ese unai ia herevalaia, ia gwau: “Lau ese uhe lau hadoa. Apolo ese ranu dekenai ia dairia. To Dirava ese unai hadoa gauna ia hatubua.”—1 Korinto 3:6.
22. Dahaka dainai Keristani haroro gaukara be iseda ura hegeregerena ita karaia diba lasi neganai, ita lalohisihisi bada be namo lasi?
22 Oibe, Iehova Dirava ena Hereva hadibaia gaukarana ita karaia neganai, ita ia durua noho. Reana nega haida iseda hemami be ita hegeregere lasi hadibaia taudia edia gaukara karaia totona. To laloaboio lasi, Iehova ese taunimanima ia veria mai ia bona iena Natuna dekenai. Iehova ese ena Hereva, iena lauma helaga, bona iena tanobada oreana ia gaukaralaia do ita hegeregere matamata taudia ita durua totona. Namona be Iehova ena hadibaia dalana ita abia dae, bona ena hereva namodia ita gaukaralaia bena gau ibounai do ita abia hegaegae, Dirava ena Hereva ita hadibaia totona!
Edena Bamona Do Oi Haere?
• Baibel be edena dala ai ita ia durua gau ibounai ita abia hegaegae haroro gaukara ita karaia totona?
• Lauma helaga ese edena bamona ita ia durua do ita hegeregere haroro taudia ai ita lao totona?
• Edena dala idauidau ai Iehova ena tanobada oreana ese oi ia durua sivarai namona harorolaia tauna ai oi lao totona?
• Dahaka dainai haroro gaukara ita karaia neganai ita diba do ita kwalimu?
[Picture on page 25]
Iesu be Dirava ena Hereva hadibaia tauna dainai, taunimanima dekenai lalokau ia hahedinaraia