Emu Matana be Gau Tamona Sibona Ia Raraia, A?

1. “Matana be gau tamona sibona ia raraia” ena anina be dahaka?

¹ Iseda matana ese ia raraia gauna ese iseda kara ia haidaua. Iesu ena hereva be maoro, ia gwau: “Bema emu matana be gau tamona sibona ia raraia, emu tauanina ibounai be do ia diari”! (Mat. 6:​22, NW ) Unai hereva hegeregerena, namona be iseda matana ese gau tamona sibona ia raraia​—Dirava ena ura ita karaia. Basileia ita atoa guna bona anina lasi gaudia o haroro gaukara idia koua karadia ita dadaraia.

2. Dahaka ese iseda lalohadai idia hakererea diba, to dahaka ese ita do ia durua?

² Emu Mauri Oi Tahua Namonamo: Reidio, TV, bona niuspepa edia hereva bona ma haida edia kohu ese eda lalohadai idia hakererea diba. Unai dainai, eda nega, moni bona goada idia haorea diba kohuna ta ita do hoia lasi neganai, ‘ena davana ita laloa’ guna be namo, hegeregere ita sibona ita nanadaia: ‘Bema inai kohu lau hoia, unai ese lau do ia durua Iehova lau hesiai henia noho o lau do ia koua?’ (Luka 14:28; Fili. 1:​9-​11) Danu, namona be dina ta ta ai ita tahua edena dala ai eda mauri lalonai gau haida ita haidaua bona haroro gaukara ita habadaia.​​—2 Kor. 13:5; Efe. 5:​10.

3. Ena mauri ia haidaua taihuna ta amo dahaka ita dibaia?

³ Taihu ta be regula painia gaukara ia hamatamaia neganai, ia be ful-taim moni gaukara ia abia hidi danu​—ena be pat-taim gaukara amo ia abia diba monina be ia hegeregere ena ura gaudia ia hoia totona. Ia gwau: “Tau ta be biaguna rua ia hesiai henia diba lasi. Lau ura henia gaudia haida lau dadaraia be namo. Lau laloparara tanobada gaudia be idia dika idia lao, bona unai gaudia tahua karana ese egu goada idia haorea diba.” Unai taihu ese ena noho dalana bona moni gaukara ia haidaua dainai, ia be painia gaukara ia karaia noho.

4. Dahaka dainai hari inai negai iseda matana be gau tamona sibona ia raraia be mai anina bada?

⁴ Nega kwadogina lalonai ita noho dainai, iseda matana be gau tamona sibona ia raraia be mai anina bada. Dina ta ta idia ore neganai, inai tanobada hadikaia negana bona Dirava ena tanobada matamatana do ia vara negana idia kahirakahira. (1 Kor. 7:​29, 31) Unai dainai haroro gaukara sibona ita raraia o karaia noho neganai, ita sibona ese mauri do ita davaria, bona ita dekenai idia kamonai taudia danu ese mauri do idia davaria.​​—1 Tim. 4:​16.