Dahaka Ita Atoa Guna be Namo?
1. Edena dala ai Iesu ese ia hahedinaraia haroro gaukara be mai anina bada?
1 Iesu be haroro gaukara ia atoa guna. Mai ena goada ibounai ida kilomita momo ia raka ela bona Palestine ai ia ginidae, bena momo ia haroro henia. Iena mauri lalonai ruma o gau namodia momo ia tahua lasi, unai amo ia hegeregere haroro gaukara ia karaia totona. (Mat. 8:20) Nega ta ai, taunimanima idia ura ia idia dogoatao do ia noho totona, unai amo edia gorere taudia do ia hanamoa, to Iesu ia gwau: “Lau be Dirava ena Basileia ena Sivarai Namona hanua idauidau dekenai do lau harorolaia, Dirava ese lau ia siaia ena badina be unai.”—Luka 4:43.
2. Dahaka dainai Iesu dekenai haroro gaukara be mai anina bada?
2 Dahaka dainai Iesu dekenai haroro gaukara be mai anina bada? Ia ura bada Iehova ena ladana do ia hahelagaia. (Mat. 6:9) Ena guba Tamana ia lalokau henia dainai, ia ura bada Tamana ena ura ia hagugurua bona Iena oda ibounai ia badinaia. (Ioa. 14:31) Ma danu, Iesu be taunimanima ia laloa bada dainai, ia ura ia durudia.—Mat. 9:36, 37.
3. Edena dala ai ita hahedinaraia ita be haroro gaukara ita laloa bada?
3 Iesu Tohotohoa: Iesu ena kara bamona ita karaia be ia auka diba, badina inai tanobada ai koua gaudia o maduna metaudia be momo, unai ese ita idia doria eda nega be unai gaudia dekenai ita halusia kava totona. (Mat. 24:37-39; Luka 21:34) Unai dainai, mai anina bada gaudia do ita diba be namo—haroro gaukara totona nega ita makaia ita hegaegae bona ita haroro hanaihanai totona. (Fili. 1:10, NW ) Iseda mauri lalonai ruma o gau namodia momo ita tahua lasi bona inai tanobada gaudia ita gaukaralaia guguru lasi.—1 Kor. 7:31.
4. Dahaka dainai hari inai negai mai anina bada gaudia ita atoa guna be namo?
4 Nega ia kwadogi neganai, aonega tauna be mai anina bada gaudia ia atoa guna. Hegeregere, bema ia diba lai-gubana ta be kahirakahira do ia ginidae, ena nega bona goada ibounai ida dala do ia karaia ena ruma bese bona neiba taudia ia hadibaia bona durua idia mauri totona. Bona anina bada lasi gaudia do ia laloaboio bamona. Hari inai negai danu, nega be kwadogi bona Aramagedono be kahirakahira do ia ginidae. (Sep. 1:14-16; 1 Kor. 7:29) Unai dainai, ita sibona ese mauri do ita davaria, bona ita idia kamonai taudia ese mauri do idia davaria totona, iseda kara bona hadibaia hereva kongrigeisen lalonai bona murimurinai ita naria namonamo be namo. (1 Tim. 4:16) Oibe, bema haroro gaukara ita atoa guna, reana do ita roho mauri!