Dahaka Gaudia Oi Atoa Guna?

¹ Tomadiho oreadia momo be taunimanima durua karana idia laloa bada, hegeregere sikuli rumadia idia haginia eiava medikol gaudia idia henia. To, Iehova ena Witnes taudia be “kara namodia” bona ‘kohu lasi taudia danu edia kohu idia abia hebou’ karana idia laloaboio lasi, to idia be lauma dalanai taunimanima idia durua karana idia atoa guna.​​—Heb. 13:16.

² Aposetolo Taudia Edia Negai Idia Karaia Dalana: Iesu be tanobada dekenai iena hesiai gaukara ia karaia neganai, gaukara namodia momo ia karaia, to ena gaukara badana be hereva momokani ia gwauraia hedinarai. (Luka 4:​43; Ioa. 18:37; Kara 10:38) Iena murinai idia raka taudia ia hagania, ia gwau, “umui lao, bese ibounai be diba tahua taudia do umui halaoa, . . . umui hadibaia.” (Mat. 28:​19, 20) Bona ia hahedinaraia ia idia abidadama henia taudia ese ia hamatamaia gaukarana be dala badana ai do idia karaia. (Ioa. 14:12) Iesu ese haroro gaukara ia atoa guna badina unai gaukara ese taunimanima ia durua mauri ena dala idia dibaia totona.​​—Ioa. 17:3.

³ Aposetolo Paulo ese iena haroro gaukara be “oda” ta bamona ia laloa, ia karaia be gau badana. (1 Kor. 9:​16, 17) Ia noho hegaegae sibona ena ura gaudia ia dadaraia, hahetoho ia haheaukalaia, eiava metau idauidau ia hisihisilaia, unai amo iena hesiai gaukara ia hagugurua diba. (Kara 20:​22-​24) Aposetolo Petero bona ena bamodia danu be unai bamona kara idia hahedinaraia. Ena be idia hadiburaia bona idia dadabadia, to “taunimanima idia hadibaia noho, bona Iesu Keriso ena Sivarai Namona idia gwauraia noho.”​​—Kara 5:​40-​42.

⁴ Ita be edena bamona? Basileia sivarai namona harorolaia bona hahediba taudia halaoa gaukarana oi atoa guna, a? Iesu bamona, ita ese “edia tauanina idia manokamanoka, bona idia lao idau gabu idau gabu dekenai, mamoe idia naria lasi bamona” taudia ita lalodia bada, a? (Mat. 9:​36) Hari tanobada dekenai idia vara gaudia bona Baibel ia perovetalaia gaudia ese idia hahedinaraia goevagoeva inai tanobada dikana ena dokona be kahirakahira! Haroro gaukara ena anina bada ita laloatao karana ese ita do ia veria ita haroro goadagoada totona.

⁵ Oiemu Noho Dalana Tahua Namonamo: Iseda noho dalana be nega momo ia idau dainai, namona be nega ta ta ai ita tahua bema iseda mauri lalonai gau haida ita haidaua, unai amo haroro gaukara ita karaia badabada diba. Taihu ta be lagani 1950 ela bona 1970 dekenai regula painia gaukara ia karaia to ia gorere dainai painia gaukara ia hadokoa. To, nega ia lao lalonai, iena gorere ia namo. Vanegai sibona ena noho dalana ia tahua bona ia ura painia gaukara ia karaia lou. Ena mauri lagani be 90 neganai, Painia Gaukara Sikuli lalonai ia vareai, ia moale bada herea! Oi be edena bamona? Oi be kahirakahira moni gaukara amo oi doko eiava sikuli oi haorea gwauraia, a? Oiemu noho dalana ia idau ese dala ia kehoa oi painia totona, a?

⁶ Mareta be “vadivadi taudia abia dae karadia dekenai ia hekwarahi” karana be Iesu ese ia itaia neganai, mai manau ida ia hamaoroa bema gau momo ia laloa lasi, ia be hahenamo momo do ia abia. (Luka 10:​40-​42) Emu mauri lalonai gau momo oi tahua lasi, a? Ia hegeregere bema tau bona hahine be moni gaukara idia karaia, a? Bema gau haida umui haidaua, ia hegeregere bema tamona sibona ese moni gaukara ia karaia, a? Momo ese haroro habadaia totona gau haida idia haidaua, unai ese lauma dalanai namo ia mailaia.

⁷ Iesu bona aposetolo taudia ese idia karaia bamona ita karaia be namo! Ita diba momokani iseda hekwarahi Basileia ena sivarai namona harorolaia badabada totona, be Iehova ese do ia hanamoa.​​—Luka 9:​57-62.