“Nega Korikori ai” Aniani Ita Abia
1 Nega momo dina tamona hebouhebou murinai, ita gwau, “Unai hebouhebou be namo herea!” Sekit naria tauna ta ia gwau hebouhebou murinai, iena sekit lalonai idia noho taudia haida idia gwau, idia ura edia haroro gaukara idia habadaia. Loaloa naria tadikaka ta ia gwau, “Unai hebouhebou ese ita ia durua hari inai negai eda mauri ai ita abia hidi gaudia ita laloa namonamo totona.” Ma ta ia gwau, “Pablisa momo idia gwau unai program ese ai ia hadibaia, haroro gaukara ai laloa bada totona.” Dina tamona hebouhebou ese edena bamona oi ia durua?
2 Lagani 2011 ena program be namo herea. Ena sinado be, “Iehova be Iseda Roho Mauri Gabuna,” Salamo 118:8, 9 amo idia abia. Do ita kamonai tok haida be: “Dika Negadiai Iehova be Iseda Roho Mauri Gabuna,” “Ma Haida Durua Roho Mauri Gabuna Idia Davaria Totona,” “Roho Mauri Gabunai Oi Lao, Iehova Bamona,” “Matamata Taudia E, Iehova Umui Abidadama Henia!” bona “Iehova ese Ia Henia Roho Mauri Gabudia.”
3 Namo Ita Abia Dalana: Dina tamona hebouhebou ena deit idia gwauraia neganai, palani oi karaia unai hebouhebou dekenai oi lao totona bona emu Baibel stadi taudia oi boiria danu. ‘Ita hesiku lasi, ela bona iseda huahua ita havaraia’ totona, namona be ita kamonai gaudia ita lalodiatao. (Luka 8:15) Unai dainai program oi kamonai namonamo, bona emu mauri bona haroro gaukara ai oi badinaia diba hereva badadia bona hadibaia hereva namodia oi torea. Hebouhebou murinai, nega oi atoa emu ruma bese ida unai program umui herevalaia totona, bona umui badinaia diba daladia haida umui laloa.
4 Aniani mai ena mamina namona hegeregerena, vaira lagani ena dina tamona hebouhebou ena program idia hegaegaelaia neganai, mai edia ura bada ida idia karaia bona idia lalohadailaia namonamo. Unai hebouhebou dekenai oi lao totona hari oi hegaegae neganai, Iehova ese emu hekwarahi do ia hanamoa bona “nega korikori ai” idia hegaegaelaia aniani namona amo namo do oi abia.—Mat. 24:45, NW.
[Study Questions]
1. Inai lagani ena dina tamona hebouhebou ese edena bamona oi bona ma haida ia durua?
2. Lagani 2011 ena program ai do ita kamonai tok haida be dahaka?
3. Hebouhebou ita lau henia karana amo dahaka namo ita abia diba?
4. Dahaka dainai vaira lagani ena dina tamona hebouhebou ita laloa bada?