Lagani 2010 Ena Dina Tamona Hebouhebou Ena Program
1. (a) Dina tamona hebouhebou gunadia edia sinado haida be dahaka? (b) Edena dina tamona hebouhebou ese oi idia durua emu haroro gaukara oi hanamoa totona?
1 “Mai Anina Bada Gaudia Umui Diba Namonamo,” “Umui Gini Goada Bona Orea Lalonai Umui Lalotamona,” “Hereva Momokani Gwauraia Hedinarai,” bona “Ita be Raro—Iehova be Raro Gaukaralaia Tauna.” (Fili. 1:9, 10, 27; Ioa. 18:37; Isa. 64:8) Unai sinado bona ma haida be dina tamona hebouhebou gunadia ai idia kikilaia. Oi ura dikadika lagani 2010 ena dina tamona hebouhebou dekenai oi lao, a? Iena sinado be: “Nega be Kwadogi” bona ia be 1 Korinto 7:29 amo.
2. Edena dala ai unai hebouhebou totona eda ura ita habadaia diba?
2 Emu kongrigeisen ai dina tamona hebouhebou ena deit idia gwauraia neganai, mai emu ura bada ida unai hebouhebou umui kikilaia matamaia. Tama sina haida be edia natudia idia durua hebouhebou idia laloa bada totona, deit be edia kalenda dekenai idia torea, hebouhebou dekenai do idia abia lao gaudia ena lista ta idia torea, bena dina idia duahia matamaia ela bona hebouhebou ia ginidae. Bema umui ura, reana emu Ruma Bese Ena Tomadiho lalonai dina tamona hebouhebou gunadia haida edia hereva umui riviulaia. Danu, unai hebouhebou totona emu kudouna oi hegaegaelaia totona, Tiokratik Haroro Sikuli amo Heduru Oi Abia bukana, rau 13-16 oi riviulaia, unai ese oi bona emu ruma bese do ia durua ‘emu kamonai oi naria namonamo’ totona.—Luka 8:18.
3. Edena dala ai hebouhebou ai do idia herevalaia gaudia amo namo ita abia diba?
3 Oi Dibaia Gaudia Badinaia: Nega momo hebouhebou ta ta ia ore murinai, momo idia gwau, “Hebouhebou namona, ani?” Momokani, hebouhebou ta ta be Iehova ena harihari gaudia. (Aon. 10:22) Hebouhebou amo oi dibaia gaudia oi laloa dobu bona badinaia noho neganai, unai ese oi do idia durua. (Luka 8:15) Hebouhebou ia ore neganai, program ai idia herevalaia gaudia be emu ruma bese eiava motuka tamona ai umui guia taudia ida umui kikilaia hebou totona. Umui ta ta emui tahua gaudia bona emui haroro gaukara ai do umui gaukaralaia point umui kikilaia. Unai bamona oi karaia neganai, unai ese oi do ia durua hebouhebou ai oi kamonai herevadia amo namo oi davaria totona.—Iam. 1:25.
4. Dahaka dainai lagani 2010 ena dina tamona hebouhebou be namo herea?
4 Harihari gauna namona ta ita abia neganai, nega momo ita moale. Iehova be ita totona dina tamona hebouhebou ma ta ia hegaegaelaia, bona ita ura lasi unai ita reaia. Ita diba unai hebouhebou ese dala idauidau ai ita do ia durua. Ita diba iseda guba Tamana be harihari gaudia do ia henia, hegeregere hagoadaia bona hadibaia hereva do ia henia gaukarana ita karaia namonamo totona.—2 Tim. 4:2; Iam. 1:17.