Dirava Ena Hereva be mai Ena Siahu
1. Lagani 2014 ena dina tamona hebouhebou ena sinado be dahaka?
1 Baibel be mai ena siahu eda lalohadai bona kara be Iehova ena ura hegeregerena ia haidaua totona—ia be goevadae lasi taudia ese idia karaia gauna ta bamona lasi. Edena dala ai Baibel be mai ena siahu? Edena dala ai Dirava ena Hereva ita badinaia diba? Edena dala ai Baibel amo ma haida ita durua diba? Lagani 2014 ena dina tamona hebouhebou ena point namodia ese ita do idia durua bada. Sinado be “Dirava Ena Hereva be mai Ena Siahu,” Heberu 4:12 amo idia abia.
2. Edena henanadai edia haere ita kamonai be namo?
2 Inai Henanadai Edia Haere Tahua: Hebouhebou ena program oi kamonai lalonai, henunai henanadai edia haere oi torea.
• Dahaka dainai Iehova ena Hereva ita abidadama henia be namo? (Sal. 29:4)
• Edena dala ai Dirava ena Hereva ena siahu ita mamia diba? (Sal. 34:8, BHḡ)
• Edena dala ai Dirava ena Hereva ena siahu be haroro gaukara lalonai oi hahedinaraia diba? (2 Tim. 3:16, 17)
• Dahaka ese ita ia durua diba, Satani ena tanobada ena koikoi siahuna ena tarapu ai ita moru lasi totona? (1 Ioa. 5:19)
• Matamata taudia e, edena dala ai Dirava ena hesiai gaukara umui karaia namonamo diba? (Ier. 17:7)
• Ita manoka neganai, edena dala ai goada bada ita abia diba? (2 Kor. 12:10)
• Ita manadalaia kara dikadia ita haidaua totona, dahaka ita karaia be gau badana? (Efe. 4:23)
3. Tok ita kamonai sibona lasi, to hebouhebou ena namo ma haida be dahaka?
3 Hebouhebou ai ita kamonai tok idauidau ese ita do idia durua bada! Sekit bona distrik hebouhebou bamona, dina tamona hebouhebou gabudiai kongrigeisen idauidau amo idia mai tadikaka taihu ita dibaia totona. (Sal. 133:1-3; 2 Kor. 6:11-13) Unai dainai, laga-ani negadiai tadikaka taihu idauidau ida ita hebamo. Bema dina tamona hebouhebou ai tok ia henia vadivadi tadikaka be distrik naria tauna o Betele ese ia siaia, namona be ia bona ena adavana ita hedavari henidia. Momokani, mai moale ida unai hebouhebou ita naria ena badina be momo, ani?