Sivarai Namona Harorolaia—Dala Dekenai Gini Neganai
1 Hereva Lada-isidia 1:20 dekenai, ia gwau: “Aonega momokani be ariara dekenai ia boiboi noho. Hoihoi gabudia dekenai ena gadona ia habadaia.” Hari inai nega lalonai unai hereva be idia guguru, badina gabu ibounai dekenai taunimanima idia davaria neganai, Iehova ena Witness taudia be mai goada danu Basileia ena sivarai namona idia harorolaia. Iesu bona peroveta taudia hegeregeredia, ita ese taunimanima ita lalokau henidia bada dainai, gabu ibounai dekenai taunimanima ibounai dekenai hereva momokani ena sivarai ita harorolaia.—Ier. 11:6; Mar. 6:56; Luka 13:22, 26.
2 Ena be dala namona be taunimanima edia ruma dekenai hereva momokani ena sivarai ita harorolaia, to ruma ta ruma ta gaukara ita karaia neganai taunimanima momo idia noho lasi. Ruma taudia idia noho neganai, reana iduara idia kehoa taudia be guna ita hereva henidia taudia, to edia ruma bese taudia ma haida ita hereva henidia lasi. Unai dainai, dala dekenai ita haroro be mai anina bada. Pioneer tauna ta ia gwau dala dekenai haroro gaukara karaia be “mai moalena, ia be gaukara metauna lasi, bona nega ibounai taunimanima ita davaria diba.”
MAI LALOKAU DANU GOADALAIA
3 Dala dekenai oi haroro neganai, namona be gabu tamona dekenai oi lao hanaihanai haroro gaukara oi karaia toho totona, ani? Taihu ta be unai bamona ia karaia, bona ia gwau ia gini “dalana” dekenai sitoa naria taudia iboudiai bona taunimanima momo herea ia diba. Taunimanima ese ia idia manadalaia dainai, dala ia kehoa kiki namodia momo idia karaia totona. Heduru pioneer tauna ta ese dala dekenai haroro gaukara ia moalelaia bada. Ia gwau taunimanima ia hereva henidia idia be sitoa ena uindo gaudia idia raraia neganai, edia motuka dekenai idia helai neganai, basi idia naria noho neganai, bona guna magasin idia dadaraia taudia ma ia hereva henidia lou danu. Taunimanima ita doria momo lasi, to gari lasi dekenai taunimanima edia lalona ita veria totona, gau badana be ita goada karaia bona dala maorona dekenai ita hereva henidia.
4 Dala dekenai haroro gaukara do oi kwalimulaia totona, namona be mai lalokau, mai moale, bona mai momokani danu oi karaia. Namona be moale toana oi hahedinaraia. Bema mai dalana, ia raka hanai tauna ena matana oi raraia, to bema oi ia raraia lasi, mai moale danu oi hereva henia toho. Namona be taunimanima edia kara toana oi itaia bona unai oi gaukaralaia idia oi hereva henia toho totona. Taihu ta ia itaia hahine ta be aniani puse momo ia huaia, bona ia gwau: “Oi be aniani oi hoia, ani? Aniani edia davana be idia bada idia lao momokani. Oi ura kudouna bona lalona anianina oi abia, a? Lau ese inai sivarai lau moalelaia bada . . . .” Mai natuna taudia dekenai ia gwau: “Oiemu natudia ruaosi be namo herea. Bible lalonai ia gwau natudia be harihari gauna namona Dirava dekena amo, unai oi diba, a? Namona be unai siri oi lau hadibaia . . . .” Bema ia itaia tau ta ese gau ta ia lalohadailaia, ia dekenai ia gwau, “Lau itaia oi ese gau ta oi lalohadailaia. Hari inai nega lalonai tanobada be dika gaudia amo ia honu, ani? Oi laloa nega do ia ginidae bena . . . ?”
5 Bema taunimanima ta be dala dekenai ia raka haraga, namona be pepapepa ta oi henia toho, bona oi gwau: “Inai be sivarai namona, gabeai do oi duahia emu nega ia hegeregere neganai.” Bema taunimanima edia toana be idia haragaharaga lasi, namona be magasin oi henia toho, bona davana oi gwauraia. Bema mai dalana taunimanima ese magasin eiava buka idia abia be gau badana.
6 Guna, pablisa momo be dala dekenai haroro gaukara idia garilaia, to hari haroro gaukara ibounai amo unai gaukara idia moalelaia bada. Momokani, idia naria namonamo be gau badana, badina gabu haida be namo lasi eiava nega haida idia karaia be dika ia vara diba. Ena be taoni ia maragi, to gabu haida dekenai taunimanima momo idia noho, hegeregere basi idia mai gabudia, motuka atoa gabudia, bona unuseniai taunimanima ita lao henia diba sivarai namona do ita haroro henidia totona. Namona be unai ita karaia, bona mai aonega momokani danu dala dekenai bona hoihoi gabudia dekenai, sivarai namona ita harorolaia noho, kamonai taudia hanamodia totona bona Iehova ena ladana hanamoa totona.—Her. 1:20.
[Questions]
1. (a) Dahaka dainai hari inai negai Hereva Lada-isidia 1:20 ena hereva idia momokani? (b) Taunimanima ita lalokau henidia bada dainai dahaka ita karaia? (c) Peroveta taudia bona Iesu danu be taunimanima vairanai idia haroro dalana be Bible dekena amo oi hamomokania.
2. (a) Dala dekenai haroro gaukara karaia ena namo haida be dahaka? (b) Dahaka dainai dala dekenai haroro gaukara karaia be “teritori” namona?
3. (a) Dala dekenai haroro gaukara ita karaia neganai, dahaka dainai gabu tamona dekenai ita karaia hanaihanai be namo? (b) Dala dekenai haroro gaukara ita karaia namonamo totona, dahaka dainai gari lasi bona dala maorona dekenai ita karaia be gau badana?
4. Dala dekenai haroro gaukara kwalimulaia dalana be dahaka?
5, 6. (a) Dala dekenai ita haroro neganai, namona be dahaka dekenai ita naria namonamo? (b) Hereva Lada-isidia 1:20 ena sisiba herevana be edena bamona do ita badinaia diba?
This article is repeated in km 2/93.