‘Dirava Ena Ladana Hahelagaia’
1. Lagani 2012 sekit hebouhebou ena sinado be dahaka, bona edena siri amo idia abia?
1 Guba bona Tanobada edia Lohia Badana, Iehova, ena ladana ita abia be hahenamo badana! Dirava ese ita dekenai unai ladana ia henia, bona lagani 1931 amo ema bona hari taunimanima idia diba ita be Iehova ena Witnes taudia. (Isa. 43:10) Dirava ena Natuna tamona, Iesu, be Dirava ena ladana ia abia isi, bona iena hahediba taudia dekenai ia hadibaia gurigurina lalonai unai ladana ia gwauraia guna. (Mat. 6:9) Lagani 2012 sekit hebouhebou ena sinado, ‘Dirava Ena Ladana Hahelagaia’ be Iesu ena hereva hegeregerena.
2. Dahaka tok namodia haida do ita kamonai?
2 Tok Haida: Saturday ai, tok ladana “Ful-Taim Hesiai Taudia E, Dirava Ena Ladana Umui Gwauraia Hedinarai,” ese do ia hahedinaraia dahaka dainai ful-taim hesiai gaukara be mauri dala hereadaena. Danu hereva foa do ita kamonai, ena ladana be “Iehova Ena Ladana Umui Hadikaia Lasi,” unai ese ita do ia durua ita idia tarapua diba gaudia foa ita dadaraia totona. Tok ladana, “Dahaka Dainai Dirava Ena Ladana Umui Hahelagaia be Namo?” ese do ia haerelaia henanadai rua be inai: Dahaka ese ita ia durua mai ura bada ida ita haroro, herevana taunimanima idia kamonai lasi? bona, Dahaka ese ita ia durua haroro gaukara ai anina namona ita havaraia totona? Sunday ai, hereva foa ese do idia hahedinaraia edena dala ai eda laloa daladia, hereva, disisen idauidau, bona kara amo Dirava ena ladana ita hahelagaia. Kamonai taudia matamatadia ese inai pablik tok do idia moalelaia, ena ladana be: “Aramagedono ai, Iehova ese Ena Ladana Hereadaena Do Ia Hahelagaia.”
3. Iseda maduna be dahaka, bona edena dala ai sekit hebouhebou ena program ese ita do ia durua?
3 Kahirakahira Iehova be ena ladana hahelagaia totona kara ta do ia karaia. (Ese. 36:23) To hari, iseda maduna badana be ita karaia gaukara ibounai amo Iehova ena ladana helagana ita abia isi. Ita diba sekit hebouhebou ena program ese ita—Dirava ena ladana ita abia taudia—do ia durua eda maduna ita hagugurua.