‘Dirava Ena Ura Gauna Do Ia Vara’
1. Lagani 2012 dina tamona hebouhebou ena sinado be dahaka, bona dahaka dainai unai ita herevalaia be maoro?
1 Iehova ese ena ura dainai ita ia havaraia. (Apok. 4:11) Unai dainai, ita ia havaraia ena badina hagugurua totona, namona be Dirava ena ura ita dibaia bona karaia. To unai bamona ita karaia be auka, badina “iseda tauanina bona eda lalohadai edia ura” o “tanobada taudia edia ura” ita dadaraia be mai ena hekwarahi. (Efe. 2:3; 1 Pet. 4:3; 2 Pet. 2:10) Bema Dirava ena heduru ita abia lasi, ‘Diabolo ese ita do ia tarapua iena ura ita karaia totona.’ (2 Tim. 2:26) Lagani 2012 dina tamona hebouhebou ena program ese ita do ia durua Lohiabada ena guriguri kahana ihatoina hegeregerena ita kara, ia gwau: ‘Oiemu ura gauna do ia vara.’—Mat. 6:9, 10.
2. Edena henanadai be Program lalonai do idia haerelaia?
2 Henanadai Haida: Program oi kamonaia lalonai, inai henanadai edia haere oi lalodia: Dirava ena Hereva ita kamonaia sibona lasi, to dahaka ita karaia danu be mai anina bada? Edena dala ai Iehova ena ura ita totona ita lalopararalaia noho diba? Dahaka dainai mai ura bada ida taunimanima idauidau ita durua? Edena dala ai mauri namona ita moalelaia diba? Matamata taudia e, Iehova hesiai henia karana lalonai, dahaka umui hamomokania be namo? Dirava ena ura ita karaia neganai, dahaka hahenamo do ita abia? Dahaka dainai ita hagoadaia heheni be mai anina bada?
3. Edena dala ai dina tamona hebouhebou ena program amo namo ita abia?
3 Namona be dina tamona hebouhebou dekenai oi lao bona program oi kamonai namonamo. Unai hebouhebou ai vadivadi tauna be Betele tadikaka ta, o loaloa naria tauna. Program vairanai bona murinai, ia bona ena adavana (bema ia headava) oi hereva henidia diba. Namona be hebouhebou ena program oi “kamonai sibona lasi,” to ruma dekenai oi giroa lou neganai, emu famili ida umui riviulaia bona Dirava ena ura badinaia daladia umui herevalaia.—Iam. 1:25.
4. Dahaka dainai Dirava ena ura ita tahua guna be mai anina bada?
4 Sibona edia ura idia tahua bona Iehova ena ura idia badinaia lasi taudia be kahirakahira do idia ore. (1 Ioa. 2:17) Ita moale badina nega korikori ai Iehova ese unai hereva namodia ia hegaegaelaia, unai ese ita idia durua Dirava ena ura ita tahua guna.