Iehova Ena Witnes Taudia​—Gau Momo Idia Karaia Sivarai Namona Harorolaia Totona

Lagani 100 mai kahana lalonai, Iehova ena Witnes taudia be gau momo idia karaia sivarai namona harorolaia totona. Unai gaukara badana lalonai, sivarai namona be gado handred momo bona tano 230 mai kahana lalonai ita harorolaia. (Mat. 24:14) Dahaka dainai unai gaukara be mai anina bada? Edena dala ai tanobada hegegemadai unai gaukara ita karaia? Vidio ladana Jehovah’s Witnesses​—Organized to Share the Good News be tano idauidau dekenai ita karaia gaukara idauidau ia hahedinaraia, bona unai ese ataiai idia noho henanadai rua ia haerelaia. Unai vidio oi itaia murinai, namona be inai henanadai oi lalodia:

Unai vidio ese edena bamona oi ia durua, bena oi laloparara (1) Iehova ena orea be gau idauidau idia karaia sivarai namona harorolaia totona? (2 Tim. 4:2) (2) tanobada hegegemadai Betele famili idia noho? (3) misinari bona naria taudia be sikuli namona idia abia? (2 Tim. 2:2) (4) daba ta ta ai dina ena siri bona koment oi itaia, bona pura ta ta ai kongrigeisen heboudia totona oi hegaegae be mai anina bada? (Kara 17:11) (5) Keristani heboudia oi lao henidia be mai ena namo? (Heb. 10:​24, 25) (6) tanobada ia Paradaiso neganai, hahenamo momo do oi abia? (Isa. 11:9) (7) haroro gaukara oi karaia noho be hahenamo badana?​​—Ioa. 4:​35.

Unai vidio be tulu namona ta, badina kamonai taudia ia durua Iehova ena Witnes taudia ese tanobada hegegemadai idia karaia gaukarana idia dibaia totona. (8) Edena negai iseda Baibel stadi, varavara, bona ma haida dekenai unai vidio ita hahedinaraia? (9) Unai vidio oi hahedinaraia neganai, itaia taudia be dahaka hereva namodia idia gwauraia?

Iehova ese ia hagugurua noho gaudia ita laloa neganai, ita ura salamo torea tauna bamona ita gwau: “Lohiabada e, lauegu Dirava, oiemu durua karadia ai dekenai be momo herea. Tau ta be oiemu kara bamona ia karaia diba lasi.” (Sal. 40:5) Namona be unai vidio ita gaukaralaia namonamo, ma haida ita durua Iehova bona iena orea idia laloa bada totona!