Kamonai Bona Diba Abia
1. Dahaka dainai ita gaukara goada distrik hebouhebou ai ita kamonai bona diba ita abia totona?
1 Lagani 2013 distrik hebouhebou be ia kahirakahira vadaeni. Tadikaka be program ta idia hegaegaelaia, unai ese tanobada ibounai dekenai idia noho taudia do ia durua. Oi be palani oi karaia, dina toi ena hebouhebou oi lao totona, a? Hebouhebou badadia ai eda lalona veria gaudia be momo dainai, namona be ita gaukara goada program ita kamonai namonamo totona. Hebouhebou ena program ena lata be kongrigeisen heboudia edia lata bamona lasi dainai, gau badana be eda kamonai karana ita habadaia. Danu, haida be gabu daudau amo do idia mai o gau ma haida dainai, reana do idia hesiku. Dahaka ese ita do ia durua ita mahuta lasi, to tok idauidau ita kamonai bona diba ita abia diba?—Deu. 31:12.
2. Edena dala ai eda kudouna ita hegaegaelaia, hebouhebou ai program ibounai kamonaia totona?
2 Hebouhebou Ia Kahirakahira Neganai: Hebouhebou ena program, tok idauidau edia sinado, bona dina ta ta ena Baibel siri badana ta o rua be iseda Web sait ladana www.jw.org ai do oi itaia. Bema ita be mai eda Intanet, vadaeni unai ita itaia diba, badina unai amo eda kudouna ita hegaegaelaia, hebouhebou ai program ibounai kamonaia totona. (Esr. 7:10, NW) Emu Ruma Bese ena Tomadiho negana ai, oi ura nega oi atoa hebouhebou ena program umui herevalaia totona, a?
3. Dahaka ese ita do ia durua ita kamonai namonamo totona?
3 Program Lalonai: Hebouhebou ena program ia do matamaia lasi neganai, toileti oi gaukaralaia be namo. Emu mobael fon oi koua, namo lasi fon ia rini o teks mesiji ena regena ia daekau, eiava namo lasi ma haida dekenai teks mesiji oi siaia. Bema oi ura emu fon oi kehoa, vadaeni silent dekenai oi atoa, unai amo ia rini neganai ma haida edia kamonai karana do ia hadikaia lasi. Bema program lalonai electronic tablet oi gaukaralaia, mani haida edia kamonai karana oi hadikaia lasi. Program lalonai, namo lasi oi aniani o inuinu. (Had. 3:1) Tok ia henia tadikaka oi itaia. Ia ese Baibel siri ta ia duahia neganai, emu Baibel ai unai oi badinaia. Emu noutbuk ai point haida oi torea.
4. Edena dala ai tama sina ese natudia idia durua idia kamonai bona diba idia abia totona?
4 Danu, ita ura eda natudia idia kamonai bona diba idia abia. Aonega Herevadia 29:15 ia gwau: “Sibona ena ura ia karaia noho merona ese, iena sinana do ia hahemaraia.” Unai dainai, namona be natudia be edia tama sina ida idia helai hebou, unai amo tama sina idia itaia edia natudia be tok idia kamonai namonamo, idia hereva lasi, teks mesiji idia siaia lasi, o idia loaloa kava lasi. Ena be natudia idia maragi bona tok ena hereva haida idia lalopararalaia lasi, to tama sina ese idia hadibaia idia mahuta lasi bona regerege lasi be namo.
5. Dahaka dainai program ita riviulaia be namo, bona edena dala ai unai ita karaia?
5 Dina Ta Ta ai Program Ia Ore Neganai: Emu ruma dekenai oi giroa lou haraga. Hanuaboi ai oi mahuta haraga o laga-ani namonamo. Program ai oi kamonai gaudia oi riviulaia, unai ese oi do ia durua unai oi laloatao noho totona. Unai dainai, adorahi o hanuaboi ta ta ai, miniti haida lalonai emu famili ida program umui herevalaia be namo. Emu turadia ida aniani hotel ta umui lao neganai, emu noutbuk oi abia danu, unai amo point namona ta o rua be idia ida oi herevalaia diba. Hebouhebou murinai, emu Ruma Bese ena Tomadiho lalonai, emu famili ida umui badinaia diba point haida umui herevalaia. Danu, wiki ta ta ai nega atoa hebouhebou ai idia halasia buka matamata ta umui duahia totona.
6. Distrik hebouhebou ita lao sibona be hegeregere, a? Herevalaia.
6 Aria ta ai aniani idauidau oi hegaegaelaia neganai, oi ura oi boiria taudia ese idia ania, ani? Ita gwau diba distrik hebouhebou ena program be aria ta bamona. Gau badana be, hebouhebou ena dina toi ita reaia lasi, tok idauidau ita kamonai namonamo, bona ita dibaia gaudia ita badinaia, unai amo namo bada do ita abia.