Uhe Ita Dairia Ia Tubu Totona
1. Dahaka ita dairia be namo, ia tubu totona?
1 Uma gabu ai ita hadoa uhedia idia tubu totona, ita dairia be namo. Iseda teritori ai idia noho taudia edia kudouna ai hereva momokani ena uhe ita hadoa be unai bamona danu. (1 Kor. 3:6) Bema ita ura kamonai taudia be hereva momokani lalonai idia goada idia lao, namona be idia ita lou henia bona Dirava ena Hereva amo ita durua.
2. Edena dala ai ruma tauna ita durua, bena ita lou henia neganai do ia ura kamonai?
2 Henanadai ta Rakatania: Emu hamatamaia hereva oi hegaegaelaia neganai, ruma tauna ena lalona veria henanadai ta oi hegaegaelaia danu, lou henia neganai oi haerelaia totona. Vadivadi ginigunana ai unai henanadai oi rakatania, bona dala oi karaia oi lou henia totona. Pablisa momo be Baibel Hadibaia bukana amo hereva ta idia abia hidi, Baibel stadi karaia dalana hahedinaraia totona.
3. Dahaka gaudia oi torea diba?
3 Noutbuk ai Torea: Vadivadi ginigunana ai, umui herevalaia gaudia be noutbuk ai oi torea. Kamonai tauna ena ladana bona adres oi torea. Danu, namona be ia oi hereva henia ena taim, deit, umui herevalaia gaudia, bona oi henia magasin o buka oi torea. Ia gwau ia be mai ena tomadiho, a? Ia be mai ena famili, a? Iena ura bona ia laloa bada gaudia ia herevalaia, a? Unai gaudia ese oi do idia durua oi lou henia neganai ia laloa bada gaudia oi herevalaia totona. Danu, do oi lou henia dinana bona oi rakatania henanadai oi torea.
4. Dahaka dainai kamonai taudia ita lou henia neganai, ita haheauka be namo?
4 Haheauka: Satani be ia hekwarahi noho ta ena kudouna ai ita hadoa ‘herevana ia kokia’ totona. (Mar. 4:14, 15) Unai dainai, bema kamonai tauna be ena ruma dekenai oi davaria lasi, oi haheauka be namo. Revareva ta oi siaia o nouti ta oi torea bona ruma dekenai oi rakatania diba, a? Painia taihu ta be hahine ta ida iduara dekenai stadi idia hamatamaia, to ia lou henia neganai unai hahine ia noho lasi, unai dainai revareva ta ia siaia. Gabeai taihu ese ruma dekenai ia davaria neganai, unai hahine be taihu ena revareva ese ia durua dalana ia herevalaia. Bema hereva momokani ena uhe ita dairia noho, do ita moale bada badina ita itaia idia goada, lo taudia ai idia lao, bona “huahua idia atoa, haida 30, haida 60 bona haida 100.”—Mar. 4:20.