Lalona Veria Hamatamaia Herevana Gaukaralaia
1. Keristani taudia ginigunadia edia haroro daladia amo dahaka ita dibaia?
1 Keristani taudia ginigunadia be bese bona tomadiho idauidau taudia dekenai sivarai namona idia harorolaia. (Kol. 1:23) Idia harorolaia sivaraina be tamona, Dirava ena Basileia unai, to idia gaukaralaia hamatamaia herevadia be idauidau. Hegeregere, Petero ese Baibel idia matauraia Iuda taudia ia hereva henia neganai, peroveta tauna Ioela ena hereva ia gwauraia. (Kara 2:14-17) Danu Kara 17:22-31 ai, Paulo ese Grik taudia ia hereva henia dalana ia herevalaia. Hari, teritori haida ai taunimanima be Baibel idia matauraia, bona ruma-ta-ruma-ta gaukara ai unai bamona taudia dekenai Baibel ita herevalaia be auka lasi. To, bema Keristani lasi tomadiho taudia eiava Baibel o tomadiho idia laloa bada lasi taudia ita hereva henia, namona be mai aonega ida ita hereva henidia.
2. Edena dala ai buka o magasin amo Baibel idia laloa bada bona idia laloa bada lasi taudia ita durua diba?
2 Buka o magasin gaukaralaia namonamo: Inai hesiai laganina ai, hua ena henia gaudia be hua rua rua murinai do idia senisi bona ita ese magasin, pepapepa bona buklet do ita hariharilaia. Ena be teritori ai, taunimanima idia ura lasi Baibel ena hereva idia kamonai, to edia lalona ia veria magasin, pepapepa, o buklet ena kahana ta ita herevalaia diba. Reana vadivadi ginigunana ai, ruma tauna dekenai siri ta ita duahia lasi o Baibel ita herevalaia lasi, to bema ita itaia ia kamonai, vadaeni ita lou henia bona ita durua Havaraia Tauna bona Baibel ia abidadama henia totona. To, bema teritori ai taunimanima be Baibel idia laloa bada, vadaeni hamatamaia hereva namona ta ita gaukaralaia bona buka o magasin ita hariharilaia diba. Namona be nega ibounai Baibel Hadibaia bukana, o Dirava Oi Kamonai Henia, eiava Dirava Oi Kamonai Henia Bena Oi Mauri Hanaihanai buklet ita hariharilaia, herevana unai be hua ena henia gauna lasi. Gau badana be ruma tauna ena lalona veria hamatamaia herevana ita gaukaralaia.
3. Edena dala ai tano be taunimanima edia kudouna ia laulaulaia?
3 Tano hegaegaelaia: Tano be taunimanima edia kudouna ia laulaulaia. (Luka 8:15) Tano haida be ita hegaegaelaia namonamo guna, unai amo hereva momokani ena uhe ia tubu namonamo diba. Aposetolo edia negai sivarai namona idia harorolaia taudia be tano idauidau dekenai uhe hadoa gaukarana idia moalelaia. (Kara 13:48, 52) Ita danu bema lalona veria hamatamaia herevadia ita gaukaralaia eda haroro gaukara do ita moalelaia.