Daidia be Hari Iehova Ena Ura Idia Karaia Noho? Buklet Gaukaralaia
Dalana Buklet Matamatana amo Baibel Student Taudia Durua Dirava Ena Orea Idia Dibaia Totona
1. Iehova Ena Ura buklet idia karaia ena badina toi be dahaka?
1 Iehova Ena Ura buklet matamatana oi tohoa vadaeni, a? Idia karaia ena badina be, stiuden do ia durua (1) ita Iehova ena Witnes taudia idia dibaia namonamo, (2) iseda gaukara idia dibaia, bona (3) iseda orea ena heau dalana idia dibaia namonamo totona. Stadi ta ta edia dokonai, stiuden ida Iehova Ena Ura buklet be miniti faiv ia lao ten lalonai umui herevalaia diba.
2. Buklet idia karaia dalana herevalaia.
2 Idia Karaia Dalana: Buklet be kahana toi dekenai idia hapararaia. Unai kahana ta ta ese stadi tauna do ia durua Iehova ena Witnes taudia do ia dibaia namonamo, paragraf 1 ese ia herevalaia bamona. Karoa ibounai 28 edia hereva kwarana badadia be henanadai bamona idia torea, bona hereva kwarana maragidia ai haere idia noho. Inai buklet ai idia noho laulau o foto be tano 50 mai kahana amo idia abia, bona unai ese tanobada ibounai lalonai ita karaia gaukarana ia hahedinaraia. Karoa haida dekenai maua ladana “Oi Tahua” lalonai be stadi tauna ese ia badinaia diba herevadia idia noho.
3. Edena dala ai Iehova Ena Ura buklet ita gaukaralaia diba?
3 Oi Gaukaralaia Dalana: Ginigunana be, karoa ta ena sinado, henanadai unai, oi henia. Iharuana be, paragraf umui duahia neganai, hereva kwarana maragidia umui herevalaia. Ihatoina be, henunai idia noho riviu henanadai umui haerelaia. Bema umui ura, karoa ta umui duahia murinai umui herevalaia, eiava paragraf ta umui duahia murinai umui herevalaia diba. Paragraf ai idia torea siri maorodia umui kehoa bena duahia. Namona be laulau o foto bona maua ladana “Oi Tahua” umui herevalaia danu. Nega momo, karoa 1 amo stadi ita hamatamaia ela bona karoa dokona. To, bema oi ura stadi tauna be karoa ta ia dibaia guna be namo, vadaeni unai karoa umui stadilaia be namo. Hegeregere, bema hebou badana ta ia kahirakahira, vadaeni karoa 11 umui stadilaia.
4. Dahaka dainai inai tulu matamatana oi moalelaia?
4 Ta ita stadi henia neganai, ia ita durua eda guba Tamana, Iehova, ia diba totona. To danu, namona be ia ita durua Iehova ena orea ia diba totona. (Aon. 6:20) Ita moale badina inai tulu matamatana ese ita do ia durua unai bamona ita karaia totona!