Oi Noho Hegaegae Gau Haida Oi Haidaua Totona, A?
1. Tanobada ena toana ia idau noho dainai, dahaka gaudia ita haidaua be namo?
1 Baibel ia gwau, tanobada ena toana ia idau noho. (1 Kor. 7:31) Unai dainai, nega haida eda haroro daladia, sediual, bona haroro herevadia ita haidaua be namo. Oi noho hegaegae gau haida oi haidaua totona, a?
2. Orea ida ita gaukara hebou totona, dahaka ita karaia be namo?
2 Emu Haroro Daladia: Keristani kongrigeisen be nega ibounai ia noho hegaegae gau haida ia haidaua totona. Matamanai Iesu ese ena hahediba taudia ia siaia neganai, ia hamaorodia moni o aniani puse do idia abia lasi. (Mat. 10:9, 10) To gabeai, unai hereva ia haidaua badina ia diba vaira neganai haroro gaukara do ia bada bona ena hahediba taudia ese dagedage do idia davaria. (Luka 22:36) Lagani handred gunanai, Iehova ena orea be haroro kadi, reidio bona saun motuka amo taunimanima idia haroro henia, badina unai negai unai bamona gaudia sibona idia gaukaralaia. To hari, gabu momo ai taunimanima be edia ruma ai ita davaria lasi dainai, ita be dala o gabu idauidau ai ita haroro. Danu, bema taunimanima be dina ai moni gaukara idia karaia, ita be adorahi ai ruma-ta-ruma-ta haroro gaukara ita karaia. Iehova ena guba kariota ena heau dalana ia haidaua neganai, oi be unai kariota ena heau dalana oi badinaia danu, a?—Ese. 1:20, 21.
3. Ruma taudia ese henanadai ta idia henia neganai, dahaka ita karaia be namo?
3 Emu Haroro Herevana: Emu teritori ai taunimanima be moni, famili o raskol karadia idia lalohekwarahilaia, a? Namona be unai bamona gaudia ita diba, badina unai ese ita do ia durua haroro hereva maorona ita hegaegaelaia totona. (1 Kor. 9:20-23) Ruma taudia ese henanadai idauna ta idia henia neganai, namo lasi ita hegaegaelaia haroro herevana be maoromaoro ita gwauraia; to eda haroro herevana ita haidaua bena ruma taudia edia henanadai ita haerelaia be namo.
4. Dahaka dainai senisi haida ita karaia haraga be namo?
4 Inai tanobada ai idia vara gaudia be kahirakahira do idia ore, bona hisihisi badana do ia matamaia. “Nega be ia kwadogi.” (1 Kor. 7:29) Unai dainai, hari senisi haida ita karaia haraga, unai amo inai nega kwadogina ai mai anina bada gaukarana ita hagugurua diba!