‘Gau Iboudiai be Sivarai Namona Dainai Ita Karaia’
1. Basileia harorolaia tauna ia ura dahaka ia karaia ma haida totona, bona dahaka dainai?
1 Aposetolo Paulo ia abia dae ma haida dekenai sivarai namona harorolaia gaukarana be iena maduna. (1 Kor. 9:16, 19, 23, BHğ) Unai hegeregerena, taunimanima edia namo ita laloa bada dainai, ita ura idia dekenai sivarai namona ita harorolaia.
2. Ita haroro neganai dahaka gau haida ita haidaua be namo, bona dahaka dainai?
2 Taunimanima Ita Davaria Diba Negadia Bona Gabudia ai Ita Haroro: Haoda ia diba momo tauna ese ena reke bona kimai be gwarume idia noho gabudia dekenai ia negea lao. Ita be ‘taunimanima haoda henia taudia’ dainai, namona be iseda sediual ita haidaua, unai amo iseda teritori ai taunimanima ita davaria diba bona mai moale ida “gwarume idauidau,” o taunimanima haboua gaukarana ita durua diba. (Mat. 4:19; 13:47) Ita be adorahi ai ruma-ta-ruma-ta gaukara ita karaia eiava daba momokani ai magasin gaukara ita karaia, a? Paulo ena tahua gauna be ‘Sivarai Namona do ia gwauraia hedinarai,’ bona dala ia kehoa negadia ai unai gaukara namona ia karaia.—Kara 17:17; 20:20, 24.
3, 4. Haroro gaukara lalonai edena dala ai iseda haroro herevana ita haidaua, bona dahaka anina namona do ia havaraia?
3 Ruma Tauna Ena Noho Dalana Hegeregerena Emu Haroro Herevana Oi Haidaua: Nega momo haoda taudia be edia haoda daladia idia haidaua, gwarume idia abia totona. Basileia ena sivarai namona ita harorolaia dalana amo, edena bamona iseda teritori ai idia noho taudia edia lalona ita veria diba? Taunimanima idia laloa bada gauna ta ita herevalaia bona unai gauna dekenai edia lalohadai idia gwauraia neganai, namona be ita kamonai namonamo. (Iam. 1:19) Reana henanadai ta ita henia, edia lalohadai idia gwauraia totona. (Aon. 20:5) Unai amo sivarai namona ita herevalaia neganai, do idia abia dae bona edia mauri dalana idia haidaua diba. Paulo be ‘taunimanima idauidau ibounai edia mauri dalana ia abia dae.’ (1 Kor. 9:22) Namona be iseda haroro herevana ita haidaua, unai amo taunimanima edia kudouna ita hamarerea diba.
4 Taunimanima dekenai “sivarai namona” ita harorolaia be moale gauna! (Isa. 52:7) Namona be ‘gau iboudiai be sivarai namona dainai ita karaia,’ unai amo taunimanima momo do ita durua.—1 Kor. 9:23.