Basileia Sivaraina Namba 38 be November ai Do Ita Hariharilaia!
1. Mase dekenai momo edia henanadai be dahaka, bona unai henanadai be edena bamona November ai do ita haerelaia?
1 Taunimanima ibounai idia mase, herevana edia lalohadai be dahaka. (1 Kor. 15:26) Momo idia henanadai, ‘Mase taudia be edeseni bona do ita itadia lou eiava?’ Unai dainai, Iehova ena Witnes taudia ibounai be hua tamona lalonai Basileia Sivaraina Namba 38 do idia hariharilaia, ena ladana be, “Mase Taudia Idia Toreisi Lou Diba, A?” Unai gaukara badana be November 1 ai do ia matamaia. Unai gaukara ia ore murinai, unai pepapepa be eda haroro ai do ita gaukaralaia hanaihanai.
2. Basileia Sivaraina Namba 38 be edena bamona idia karaia?
2 Karaia Dalana: Basileia Sivaraina Namba 38 pepapepa oi lokua neganai, ena vairanai be sinado bona inai hereva idia noho, “Emu haere be . . . oibe? lasi? reana?” Pepapepa lalonai idia noho gaudia be, “Baibel Ia Gwau,” “Unai Gwauhamata Ena Namo,” bona “Baibel Ita Abidadama Henia Diba, A?” Pepapepa murinai idia noho gaudia be, “Mani Oi Laloa” bona “Emu Diba Habadaia Totona.”
3. Edena dala ai Basileia Sivaraina Namba 38 do ita hariharilaia?
3 Hariharilaia Dalana: Basileia Sivaraina Namba 38 pepapepa be taunimanima dekenai do ita hariharilaia, Memorial bona distrik hebouhebou edia invateisen ita hariharilaia hegeregerena. Unai gaukara be teritori ibounai dekenai ita karaia totona, elda be edia April 1, 2013 revarevana hegeregerena hakaua hereva do idia halasia. Bema kongrigeisen ta ena teritori be bada lasi, vadaeni ia badinai ia noho kongrigeisen ia durua diba. Laloatao, Basileia Sivaraina Namba 38 pepadia momo oi abia lasi, to wiki tamona lalonai do oi hariharilaia pepadia sibona oi abia. Eda teritori ena ruma ibounai dekenai pepapepa ita hariharilaia murinai, pepapepa oredia be pablik gabudiai ita hariharilaia diba. Bema pepapepa ibounai idia ore, November ena henia gauna ita hariharilaia be namo. November ena Saturday ginigunana ai pepapepa hariharilaia gaukarana ita karaia murinai, Baibel stadi hamatamaia gaukarana ita karaia diba. Danu, wikeni ai pepapepa hariharilaia gaukarana idia karaia lalonai, bema ta ia kamonai, vadaeni magasin ita hariharilaia diba. Oi ese palani oi karaia unai gaukara badana oi durua totona, a?