“Israela Taudia Do Oi Haboua”
1. Rijinol bona intanesinol hebouhebou be edena dala ai Israel taudia ese idia karaia hebouhebou hegeregerena?
1 Israel taudia be Aigupito idia rakatania murinai, Iehova ese Mose ia hadibaia Sinai Ororona ai ‘Israela taudia do ia haboua,’ Iena hereva idia kamonai totona, unai amo Ia do idia gari henia bona edia natudia dekenai Iena dala do idia hadibaia. (Deu. 4:10-13) Unai be dina badana bona edia abidadama ia hagoadaia! Kahirakahira, Iehova ena taunimanima be rijinol bona intanesinol hebouhebou dekenai do idia hebou, Iehova ese ia hadibadia totona. Dahaka ita karaia unai amo namo bada ita abia?
2. Hebouhebou totona edena dala ai ita “hegaegae” diba?
2 “Hegaegae”: Iehova ese Israela taudia ia hagania, Sinai Ororona ai do idia karaia hebouna totona do idia “hegaegae.” (Eso. 19:10, 11) Unai hegeregerena, namona be hebouhebou do idia lao taudia ibounai idia hegaegae, namo lasi tok o haheitalai karaia taudia sibona idia hegaegae. Hegeregere, moni gaukara idia karaia taudia be edia gaukara amo do idia holidei. Reana oi be Nehemia bamona. Ia ura King Aratasaseta ena wain bubua gaukarana ia rakatania, unai amo Ierusalema do ia lao haba haginia gaukara ia karaia totona, to ia diba reana king do ia ura lasi. Nehemia ia guriguri bena mai gari lasi ida iena noinoi gauna be aonega dalanai ia herevalaia. King ese gwaumaoro ia henia, bona haba haginia gaukarana ia durua! (Neh. 2:1-9) Holidei totona emu bosi do oi hereva henia sibona lasi, to emu PMV davana bona emu noho gabuna oi hegaegaelaia vadaeni, a? Elda taudia be mai moale ida heduru idia ura taudia do idia durua. Namona be palani ita karaia program ia do matamaia lasi neganai ita ginidae haraga, bona do idia henia tok “ita kamonai” namonamo.—Heb. 2:1.
3. Dahaka ese ita do ia durua eda kudouna ita hegaegaelaia totona?
3 Ita hegaegaelaia gauna badana ma ta be: Iseda kudouna. Unai amo do ita kamonai namonamo bona diba ita abia. (Esr. 7:10) Hebouhebou ena program be jw.org Web sait ai do idia atoa, bona tok edia sinado ibounai bona edia siri ta o rua edia lista do idia atoa danu. Hebouhebou negana ia kahirakahira puradia ai, unai gaudia be iseda Ruma Bese ena Tomadiho negana ai ita herevalaia diba. Pablisa haida be program idia printaia bona hebouhebou ai idia gaukaralaia nouti idia torea totona.
4. Edena dala ai tama sina ese hebouhebou ai edia natudia idia hadibaia diba?
4 ‘Emu Natudia Do Oi Hadibaia’: Sinai Ororona ai idia karaia hebouhebou ena badina ma ta be: Israela tama sina ese ‘edia natudia do idia hadibaia.’ (Deu. 4:10) Hebouhebou ese dala ia kehoa tama sina be unai bamona idia karaia totona. Namona be program lalonai tama sina be natudia ida idia helai bona idia durua idia kamonai namonamo totona. Dina ta ta dokonai bona gabeai edia ruma bese tomadiho lalonai, famili ese idia kamonai gaudia idia herevalaia diba.
5. Edena dala ai kahirakahira do ita karaia hebouhebou amo namo do ita davaria?
5 Sinai Ororona ai idia karaia hebouhebou badana ese Israela taudia ia durua, unai amo idia abia dae idia be Dirava ena taunimanima bona unai hahenamo idia laloa bada. (Deu. 4:7, 8) Kahirakahira do ita karaia hebouhebou amo unai bamona heduru ita abia danu. Dina toi lalonai, ita be Satani ena tanobada dikana do ita rakatania, bona Dirava amo idia mai hereva namodia bona ita idia hagoadaia tadikaka taihu edia hebamo do ita moalelaia. (Isa. 35:7-9) Iehova ena dina ia mai kahirakahira dainai, namona be hebouhebou ita lao bona ta ta ita hagoadaia heheni karana ita rakatania lasi!—Heb. 10:24, 25.