Ane Matamatadia Tomadiho Totona!
1 October 4, 2014 ai, Watch Tower Bible and Tract Society of Pennsylvania ena lagani ta ta hebouna lalonai, iseda ane buka ai ane haida idia haidaua ena palani idia herevalaia. Momokani, unai be moale sivaraina! Unai hebou lalonai helai taudia idia hadibaia, iseda tomadiho lalonai Basileia anedia be mai anina bada.—Sal. 96:2.
2 Reana do oi laloa, ‘Dahaka dainai ane buka ai ane haida idia haidaua?’ Badina ginigunana be, Baibel ena hereva dekenai diba matamata ita abia noho dainai, eda ane buka ena hereva haida idia haidaua be namo. (Aon. 4:18) Badina ma ta be, hari ita gaukaralaia ane buka ena hereva momo be New World Translation gunana amo idia abia. Unai dainai ane edia hereva idia haidaua, unai amo New World Translation matamatana ena hereva ida idia hegeregere. Unai be gaukara badana dainai, tadikaka idia laloa ane matamatadia haida idia atoa be namo.
3 Do ita naria ela bona unai ane buka matamata idia printaia bena do ita gaukaralaia, a? Lasi. Umui ai hadibaia vaira huadia lalonai, jw.org Web sait dekenai ane matamata haida do idia halasia. Ane matamata ta idia halasia neganai, Hesiai Hebou ena sediual dokonai inai hereva, “ane matamata” do ia hedinarai.
4 Ane Matamata Dibaia Dalana: Ane matamata ita dibaia be mai ena hekwarahi. To, salamo torea tauna bamona ita ura kongrigeisen heboudia ai ane ita abia badabada. (Sal. 30:12) Ane matamata dibaia totona, inai oi badinaia.
Web sait ai ane matamata ena miusiki oi kamonai loulou. Unai bamona oi karaia neganai do oi laloatao.
Ane edia hereva oi stadilaia namonamo, bona laloatao toho.
Miusiki oi kamonai lalonai ane oi abia. Unai bamona oi karaia ela bona oi manada.
Ruma bese ena tomadiho negadiai ane matamatadia umui abia loulou ela bona umui manada.
5 Vaira hua lalodiai, bema Hesiai Hebou koua anena be ane matamatana, kongrigeisen ese miusiki do idia kamonai guna. Unai murinai ibounai ese miusiki ida ane do idia abia, ane ma haida dekenai ita karaia bamona.
6 Momokani, hebou ai ane ita abia neganai, ita ibounai be mai moale ida Iehova ita hanamoa. Unai dainai Keristani heboudia dekenai ane ita abia gwauraia neganai, namo lasi eda helai gabuna ita rakatania.
7 Iseda miusiki helagadia ita laloa bada dalana ma ta ia noho. Hebouhebou negadiai, program ia hamatamaia ena miusiki idia gadaralaia. Lagani ta lalonai, tadikaka taihu tano idauidau amo be nega rua, sibona edia dala idia karaia, Patterson, New York dekenai idia lao iseda hebou totona miusiki namodia idia karaia. Unai dainai, bema seamani be ita ia noia eda helai gabudia ita abia bona miusiki ita kamonai, namona be unai ita badinaia. Unai dala amo eda kudouna ita hegaegaelaia, gabeai do idia herevalaia gaudia ita kamonai namonamo totona.—Esr. 7:10.
8 Hari hebou dokonai, ane matamata ta do ita abia ena ladana be, “The Kingdom Is in Place—Let It Come!” Unai ane matamata be lagani ta ta ena Hebou Badana dekenai idia halasia, bona unai ane ese Basileia ia lohia lagani 100 ia herevalaia.
9 Iseda ane matamatadia be Iehova amo idia mai “gau namodia.” (Mat. 12:35a) Namona be eda lalona ita hadaia ane matamatadia ita dibaia bona mai eda kudouna ibounai ida ane ita abia. Unai amo ita ese Dirava dekenai hanamoa bona hairai ita henia!—Sal. 147:1.