Matakepulu Taudia Durua Iehova Idia Dibaia Totona
1. Edena dala ai Iesu be matakepulu taudia ia hebogahisi henidia?
1 Iesu be dina haida murinai do ia mase. To, Ieriko ia rakatania neganai, matakepulu taudia rua be ia dekenai idia boiboi: ‘Lohiabada e, ai oi hebogahisi henia!’ Ena be Iesu ese gabeai do ia davaria hahetoho ia lalohekwarahilaia, to unai matakepulu taudia ia boiria mai bona ia hanamodia. (Mat. 20:29-34) Edena dala ai Iesu ena hebogahisi karana ita tohotohoa diba?
2. Edena dala ai matakepulu tauna ita haroro henia diba?
2 Heduru Ita Henia: Bema pablik gabuna ta ai matakepulu tauna ta oi davaria, ia dekenai emu ladana oi gwauraia bona oi durua be namo. Nega momo unai bamona taudia be haida ese idia koia dainai idia gari. To, oi durua bona hebogahisi henia neganai, do ia gari lasi. Danu, laloatao haida be matakepulu momokani, to ma haida be sisina idia itaia diba, unai dala amo do ita diba edena bamona idia ita durua diba. Idia oi durua murinai, reana oi hadibaia oi be Baibel hadibaia gaukarana oi karaia. Bena oi nanadaia bema ia namo siri ta hegeregere, Salamo 146:8 o Isaia 35:5, 6 oi duahia. Bema matakepulu taudia edia buka (o Braille) ia duahia diba, vadaeni oi nanadaia bema ia ura unai pablikeisen ta do ia abia, unai amo Baibel do ia dibaia namonamo. Danu oi durua diba jw.org ai audio ia abia totona. Bema matakepulu tauna ena kompiuta be mai ena screen reader program, reana jw.org ai idia noho gaudia do ia ura henia.—Maua ladana, “Matakepulu Tauna Ita Durua Dalana . . .” itaia.
3. Edena dala ai iseda teritori ai matakepulu taudia ita tahua diba?
3 Matakepulu Taudia Tahua: Ruma-ta-ruma-ta haroro gaukara ai matakepulu taudia ita davaria lasi, badina momo be idia hemarai dainai ruma lalonai sibona idia noho. Unai dainai, namona be ita gaukara goada unai bamona taudia ita “tahua” bona haroro henidia. (Mat. 10:11) Emu gaukara turana o sikuli turana ta be matakepulu tauna, a? Namona be ia oi haroro henia. Bema emu teritori ai matakepulu taudia edia sikuli ia noho, namona be unai sikuli ena laiberi totona Braille pablikeisen haida oi henia. Oi diba ruma besena ta lalonai matakepulu tauna ta ia noho, a? Emu teritori ai matakepulu taudia edia ruma bona idia durua oreadia haida idia noho, a? Matakepulu tauna ena famili, eiava idia noho rumana ena dairekta o risepsen oi hadibaia, Iehova ena Witnes taudia idia ura matakepulu taudia idia durua, bona oi ese Braille buka o magasin o audio rekodi oi mailaia diba. Baibel amo oi hahedinaraia Dirava ia gwauhamata ia ese kahirakahira matakepulu gorerena do ia haorea vaitani. Ia dekenai jw.org ai ia noho vidio ladana “Without It, I Would Feel Lost” oi hahedinaraia. Unai vidio ese matakepulu tauna ta be Braille Baibel ia gaukaralaia ena ekspiriens ia hahedinaraia. Emu vadivadi ena badina oi herevalaia neganai, unai ese dala do ia kehoa matakepulu taudia oi haroro henia totona.
4. Janet ena haheitalai amo dahaka oi dibaia?
4 Matakepulu taihu ta ladana Janet be matakepulu taudia edia ruma ia vadivadi henia, bona hahine matamata ta ia hereva henia. Janet ia gwau, “Iesu ese matakepulu taudia ia hanamoa karana ese ia hamomokania ia ese matakepulu taudia ibounai do ia hanamoa.” Danu Apokalupo 21:3, 4 idia duahia hebou, bona Janet ese ia hamaoroa Dirava ena Basileia amo unai gwauhamata do ia hagugurua. Unai hahine ia herevahereva lasi, ma ia gwau: “Guna matakepulu tauna ta amo unai bamona lalohadai lau kamonai lasi. Idia itaia diba taudia idia abia dae taunimanima idia matakepulu badina, idia eiava edia tubudia be kara dika ta idia karaia.” Janet ese jw.org amo unai hahine dekenai Baibel Hadibaia bukana ena link be e-mail amo ia siaia, bona hari wiki ta lalonai nega rua Baibel stadi idia karaia.
5. Ena be matakepulu taudia ita hanamoa diba lasi, to ita hebogahisi henidia neganai, dahaka hahenamo do ia vara?
5 Momokani, Iesu be matakepulu taudia ia hanamoa, to ita be unai bamona ita karaia diba lasi. To, ita ese matakepulu taudia bona inai nega oromana ena dirava ese edia lalona ia hadiburaia taudia ita durua diba, Dirava ena Hereva momokani idia lalopararalaia totona. (2 Kor. 4:4) Ieriko kahirakahira ai Iesu be matakepulu tatau rua ia “hebogahisi henia bada” dainai, ia hanamodia. (Mat. 20:34) Bema ita danu be matakepulu taudia ita hebogahisi henidia, idia haida do ita durua Iehova idia dibaia totona. Ia ese matakepulu do ia haorea vaitani.