Haroro Hanamoa Daladia—Matakepulu Taudia Haroro Henia Dalana

DAHAKA DAINAI MAI ANINA BADA: Matakepulu taudia momo be idia hemarai o idia ura lasi idia diba lasi taudia idia hereva henia. Unai dainai, mai aonega ida unai bamona taudia do ita haroro henia. Iehova be matakepulu taudia ia lalokau henia bona laloa bada. (Le 19:14) Ita danu ese Iena haheitalai ita tohotohoa diba bema ita gaukara goada matakepulu taudia ita durua Iehova idia dibaia totona.

KARAIA DALANA:

• Matakepulu taudia “tahua.” (Mt 10:11) Oi diba ruma besena ta lalonai matakepulu tauna ta ia noho, a? Emu teritori ai matakepulu taudia edia sikuli, idia naria ruma, eiava idia durua orea haida idia noho, a? Bema oibe, do idia ura matakepulu taudia totona idia karaia pablikeisen idia abia, a?

• Oi Hahedinaraia idia oi laloa bada. Bema matakepulu tauna o hahinena dekenai oi hahedinaraia ia oi laloa bada bona oi hebogahisi henia, do ia gari lasi. Reana emu gabu ai idia laloa bada topik ta amo emu haroro herevana oi hamatamaia diba

• Iehova do idia dibaia pablikeisen idauidau amo matakepulu tauna durua. Iehova ena orea ese matakepulu o idia itaia namonamo lasi taudia totona buka bona magasin be format ai idia karaia. Reana matakepulu tauna oi nanadaia, diba ma haida ia abia totona ia ura edena format do ia gaukaralaia. Magasin ia naria tadikaka ese matakepulu taudia edia request be fom dekenai ia torea neganai, namona be haroro naria tauna ese do ia sekea bema ia torea gaudia be unai matakepulu tauna o hahinena ese ia ura henia format hegeregerena