Stadi Hamatamaia Dahaka Ita Karaia? Buklet Dekenai
1 Tanobada hegegemadai amo idia mai ripoti idia hahedinaraia Dirava Ia Ura Dahaka Ita Karaia? buklet be tulu namona taunimanima dekenai hereva momokani ita hadibaia totona. Wiki ta ta ai, Baibel stadi tausen momo idia hamatamaia bona unai buklet idia gaukaralaia. Baibel stadi ta oi hamatamaia vadaeni bona oi karaia Dahaka Ita Karaia? buklet dekenai, a?
2 Tadikaka momo idia davaria unai buklet hariharilaia be auka lasi, to edena hereva be stadi hamatamaia herevadia namodia idia daradaralaia. Ma haida be dahaka idia karaia bena Baibel stadi idia hamatamaia Dahaka Ita Karaia? buklet dekenai? Reana inai hereva haida ese oi do idia durua.
3 Oi Gwau Stadi Karaia Dalana Do Oi Hahedinaraia: Ruma tauna oi davaria negana ginigunana ai, eiava oi lou henia negana ginigunana ai, Baibel stadi oi gwauraia sibona lasi, to unai Baibel stadi kosina ena karaia dalana do oi haheitalaia. Reana ruma tauna do ia gari bema inai hereva “stadi” ia kamonai, bona unai kara ese ena daradara bona gari do ia kokia. Bema unai hahedinaraia dalana ita hadibaia, do ita davaria hamatamaia herevana kwadogina murinai, maoromaoro do umui stadi matamaia diba.
4 Hegaegae Karana be mai Anina: Bema ita hegaegae namonamo guna, unai ese iseda Baibel stadi hamatamaia urana do ia habadaia. Baibel stadi hamatamaia gaukarana totona ita hegaegae neganai, do ita daradara lasi, to mai eda ura ida do ita karaia. Bema iseda kiki herevana be nega haida ita tohoa loulou guna, taunimanima ida do ita herevahereva namo herea, bona sibona eda hereva amo vaia ita kiki bamona unai do ita karaia. Hemami namona do ita abia, bona ruma tauna ena gari be do ia ore danu.
5 Emu kiki herevana oi tohoa guna neganai, namona be ena lata oi itaia, bena ruma tauna oi davaria neganai do oi gwau miniti hida do oi gaukaralaia unai stadi dalana haheitalaia totona. Tadikaka ta be ena ladana ia gwauraia murinai, ia gwau: “Oi dekenai lau mai Baibel stadi kosina, davana lasi gauna, lau hahedinaraia totona. Bema lau hahedinaraia, miniti ima sibona do lau gaukaralaia. Oi dekenai ia namo bema unai miniti ima lalonai lau karaia, a?” Dahaka Ita Karaia? buklet ena Kahana 1 oi karaia diba miniti ima lalonai. To, Baibel siri haida sibona do oi abia hidi bona duahia. Bema unai kahana ginigunana be miniti haida lalonai umui haorea, ruma tauna be ena stadi ginigunana do ia abia diba. Bena ia oi hamaoroa do oi giroa Kahana 2 do umui stadilaia totona, bona miniti 15 sibona lalonai do umui haorea.
6 Inai kiki herevana ese anina ia havaraia:
◼ “Lau ura ia auka lasi Baibel stadilaia kosi haragana lau hahedinaraia oi dekenai. Inai buklet, Dirava Ia Ura Dahaka Ita Karaia? do lau gaukaralaia. Momo idia davaria bema wiki ta ta ai miniti 15 lalonai idia stadi, wiki 16 murinai, inai mai anina bada Baibel henanadai idauidau edia haere namodia idia davaria diba.” Buklet ena kahana idauidau ia hahedinaraia rauna oi hahedinaraia. Kahana 1 dekenai oi lao, bona oi gwau: “Bema miniti ima idia noho, lau ura edena dala ai unai do ita karaia diba lau hahedinaraia. Kahana 1 ena ladana be ‘Dirava Ena Ura Karadia Oi Dibaia Dalana.’ ” Bena henanadai toi oi duahia bona idia ta ta murinai edena paragraf ai haere do ia davaria ena namba ia noho oi hahedinaraia. Paragraf ginigunana oi duahia, bona ruma tauna dekenai haere tahua dalana oi hahedinaraia. Ruma tauna oi noia paragraf namba 2 do ia duahia. Bena oi gwau: “Oi duahia gaudia dainai, inai henanadai ena haere be dahaka? [Henanadai oi duahia lou, bona nega oi henia ruma tauna ia haere totona.] Oi itaia paragraf ta ta ai Baibel ena siri haida idia noho. Idia amo Baibel ena haere unai henanadai dekenai ita davaria diba. Hegeregere, namona be 2 Timoteo 3:16, 17 ita duahia, bona do ita itaia bema ena haere be oiemu haere hegeregerena. Ia gwau daika ese Baibel ia havaraia?” Paragraf namba 3 umui duahia, henanadai umui laloa, bena Ioane 17:3 umui duahia murinai, ruma tauna ia dibaia vadaeni gaudia unai Kahana 1 dekenai umui riviulaia. Unai neganai, Kahana 2 dekenai do oi lao bona henanadai ginigabena oi duahia, “Edena dala rua amo Dirava ita dibaia diba?” Bena oi nanadaia: “Edena nega be namo oi dekenai, miniti 15 do ita gaukaralaia Kahana 2 ita karaia bona haere do ita davaria totona?”
7 Gau badana be gau momo umui herevalaia lasi bona dala ia noho neganai ruma tauna oi hanamoa. Do oi lou henia negana umui hegaegaelaia neganai, oi nanadaia lasi bema ia ura ia karaia noho, to ia oi hagoadaia oi karaia vadaeni dalana do ia badinaia unai karoa iharuana dekenai. Ia oi hamaoroa oi ura ia oi itaia lou. Pablisa haida idia gwau bema nega namona ia noho lasi, reana telefon amo unai kahana do idia karaia hebou diba. Stiuden tauna oi hagoadaia ena buklet be gabu namona ta ai ia atoa, bena oi giroa mai neganai do ia davaria haraga diba.
8 Emu Lalona Oi Hadaia: Kwalimu dalana be oi hegaegae guna, to danu namona be emu lalona oi hadaia do oi haheauka. Kahana ta karaia miniti haida lalonai sibona be auka, unai dainai emu lalona oi hadaia unai kiki herevana do oi karaia loulou ela bona stadi dalana hahedinaraia karana oi manadalaia momokani be namo. Ruma ta ruma ta ai, maketi dekenai, sitoa dekenai, nega bona gabu idaudia ai oi davaria taudia ibounai dekenai, bona telefon haroro gaukarana dekenai danu, stadi hahedinaraia dalana oi karaia toho. Bema Baibel stadi ta oi hamatamaia haraga lasi, oi hesiku lasi. Baibel stadi oi hamatamaia diba dalana be oi haheauka noho bona oi ura hereva momokani oi henia ma haida dekenai.—Gal. 6:9.
9 Bema unai heduru herevadia oi gaukaralaia, reana oi danu be ta do oi durua diba mauri ia lao henia dalana ia davaria totona, badina Baibel stadi oi hamatamaia bona karaia noho unai Dahaka Ita Karaia? buklet dekenai.—Mat. 7:14.