Hebou Idia Mai Taudia Ita Welkam Henia

Daika do ita welkam henia? Iseda Keristani heboudia dekenai idia mai taudia, hegeregere kamonai taudia matamata bona iseda turadia gunadia.a (Roma 15:7; Heb. 13:2) Reana tano ma ta amo ia mai tadikaka o taihu ta eiava lagani momo ai ia manoka tadikaka o taihu ta oi boiria diba. Mani oi laloa, bema oi be unai bamona tadikaka o taihu, emu hemami be edena bamona? Haida ese oi idia hedavari henia neganai, do oi moale, ani? (Mat. 7:12) Unai dainai, hebou ia do matamaia lasi o ia ore murinai, Kingdom Hall lalonai oi loaloa bona hebou idia mai taudia oi hedavari henidia. Unai ese lalokau bona moale ia havaraia bona Iehova ena ladana ia hanamoa danu. (Mat. 5:16) Momokani, nega dainai hebou idia mai taudia ibounai ita hereva henidia totona be ia auka. To bema ita ibounai ese hebou idia mai taudia ita welkam henia, do idia mamia idia ita laloa bada.

Ma haida welkam henia karana be Memorial negadia sibona ai ita hahedinaraia lasi, to nega ibounai unai ita karaia be namo. Bema kamonai matamata tauna ese Keristani lalokau karadia ia itaia neganai, unai ese ena lalona do ia hamarerea bona ita ida Dirava do ia hanamoa bona tomadiho goevana lalonai ita do ia bamoa.​—⁠Ioa. 13:35.