“Tano ena anina idia vara namonamo, badina be, Dirava, iseda Dirava ese ita ia hanamoa vadaeni.”—SALAMO 67:6

Havaraia Tauna Ena Hahenamo Idauidau Do Ita Moalelaia Hanaihanai

Dirava ese peroveta tauna Aberahamo dekenai ia gwauhamata, iena bese amo ta ese “tanobada besedia ibounai” dekenai hahenamo do ia mailaia. (Genese 22:18) Unai be daika?

Lagani 2,000 gunanai, Dirava ese Aberahamo ena bese amo ia mai tauna, Iesu dekenai siahu ia henia hoa karadia ia karaia totona. Unai hoa karadia ese idia hahedinaraia, Dirava ese Aberahamo dekenai ia karaia gwauhamata be Iesu Keriso amo bese ibounai dekenai do ia lao.—Galatia 3:14.

Iesu ese ia karaia hoa karadia be taunimanima momo ese idia itaia, unai ese ia hahedinaraia ia be Dirava ese ia abia hidi taunimanima ia hanamoa totona. Bona unai hoa karadia amo Dirava Iesu do ia gaukaralaia taunimanima ia hanamoa hanaihanai dalana do ia hahedinaraia. Mani Iesu ena hoa karadia ese iena kara namodia haida idia hahedinaraia dalana ita itaia.

Haida laloa bada karana—Iesu be gorere tauna ia hanamoa.

Nega ta, lepera gorere ia abia tauna be Iesu ia noia ia hanamoa totona. Iesu be ena imana be ia dekenai ia atoa bona ia gwau: “Lau ura!” Vadaeni maoromaoro . . . ena lepera gorere ia ore.—Mareko 1:40-42.

Hariharibada karana—Iesu be hitolo taudia ia ubua.

Iesu ia ura lasi taunimanima be mai hitolo danu ia siaia lao. So paraoa bona gwarume maragidia haida ia hanamoa bona hoa dalanai taunimanima tausen momo ia ubudia. (Mataio 14:17-21; 15:32-38) Idia aniani murinai, ibounai idia bogakunu bona aniani oredia momo idia noho.

Hebogahisi karana—Iesu be mase taudia ia hamauria.

Iesu be “ia hebogahisi” dainai, ia taitai vabu, naria tauna be lasi hahinena unai, ena natuna tamona sibona be mase amo ia hamauria.—Luka 7:12-15.

TANOBADA AI NOHO HANAIHANAI HAHENAMO IDAUIDAU DO IDIA VARA

Iesu ia hahedinaraia vadaeni, Dirava be mai ena siahu taunimanima dekenai hahenamo ia mailaia totona. Iesu ia gwauhamata, ia giroa mai neganai, Siahu Ibounai Diravana ese ia do ia gaukaralaia hoa kara badadia do ia karaia!

Dirava ese Aberahamo dekenai ia karaia gwauhamata ia hagugurua neganai, tanobada ai mauri be edena bamona? Dirava idia lalokau henia bona matauraia taudia ese “noho gabuna tano do idia abia” bona do idia “helai namonamo, mai moale bona mai maino danu.” (Salamo 37:11) “Mase be do ia ore, bona lalohisihisi, taitai, bona hisihisi danu be do idia ore.”—Apokalupo 21:4.

Tanobada ai mai maino ida do ita noho hanaihanai be hahenamo gauna, ani? Iesu ena lohia henunai Dirava ese do ia mailaia hahenamo idauidau amo diba ma haida oi abia totona, oi lao www.jw.org.