Peroveta Taudia amo Dirava Ita Dibaia

ABERAHAMO

Dirava be taunimanima edia toana ia laloa lasi bona ia ura ibounai ia hanamoa.

Dirava be Aberahamo dekenai ia gwauhamata, “tanobada ena bese ibounai, be oi dainai namo bada do idia davaria.”​—Genese 12:3.

Dahaka ita dibaia? Dirava be ita ia lalokau henia bada bona ia ura ia idia kamonai henia famili ibounai, tatau, hahine, bona natudia ia hanamodia.

MOSE

Dirava be hebogahisi tauna bona idia gaukara goada ia idia dibaia taudia ibounai ia hanamoa.

Siahu Ibounai Diravana be peroveta tauna Mose dekenai siahu ia henia hoa karadia ia karaia totona. To, Mose ia guriguri, ia gwau: “Lau ura oiemu palani be lau dekenai mani do oi hadibaia. Unai neganai oi do lau diba, bona oiemu ura be nega ibounai do lau karaia.” (Esodo 33:13) Dirava be Mose ena noinoi gauna ia moalelaia dainai, Mose dekenai aonega bona laloparara ia henia Iena dala bona kara ia dibaia totona. Hegeregere, Mose ia diba Havaraia Tauna be “bogahisihisi bona hariharibada Diravana.”​—Esodo 34:6, 7.

Dahaka ita dibaia? Dirava ia ura ita ia hanamoa​—tatau, hahine bona natudia​—bema ita gaukara goada ia ita dibaia namonamo. Dirava be Baibel ai, ia ita tomadiho henia, ita ia laloa bada bona kara henia dalana ia hahedinaraia.

IESU

Dirava ena noho hanaihanai hahenamo ita abia diba bema Iesu ena kara, ia karaia gaudia bona hadibaia gaudia ita dibaia.

Baibel ai, Iesu ena mauri sivaraina bona hadibaia daladia momo idia noho. Dirava ese Iesu dekenai siahu ia henia hoa karadia momo ia karaia totona, hegeregere matakepulu, taia kudima bona aena dika taudia ia hanamoa. Danu mase taudia ia hamauria lou. Iesu ese ia karaia hoa karadia ese ia hahedinaraia vaira negai Dirava ese taunimanima totona unai hahenamo idauidau do ia mailaia. Ia ese ita ta ta dekenai unai hahenamo idauidau ita moalelaia diba dalana ia gwauraia hedinarai, ia gwau: “Mauri hanaihanai abia totona, namona be idia ese oi, Dirava momokani tamona, bona oi ese oi siaia tauna, Iesu Keriso dekenai diba do idia abia noho.”​—Ioane 17:3.

Iesu be hebogahisi bona lalokau ia hahedinaraia. Tatau bona hahine, matamata bona buruka taudia be ia dekenai idia lao badina ena boiboi herevana idia abia dae: “Lau dekenai diba umui tahua, badina lau be manau bona lalomanada tauna bona goada matamata do umui davaria.” (Mataio 11:29) Iesu ena negai ma haida be hahine idia laloa bada lasi, to Iesu be hahine taudia dekenai hebogahisi, kara namo bona hemataurai ia hahedinaraia.

Dahaka ita dibaia? Iesu be taunimanima ia lalokau henia, bona ta ta ita kara henia dalana dekenai ia be haheitalai namona.

IESU BE DIRAVA LASI

Baibel ia gwau, “ita dekenai Dirava be tamona” bona Iesu Keriso be Dirava ena hereva gwauraia tauna. (1 Korinto 8:6) Iesu ia hahedinaraia goevagoeva, Dirava be ia ia hereaia bona tanobada dekenai ia siaia.​—Ioane 11:41, 42; 14:28.a