September ai Baibel Stadi Hamatamaia ena Spesel Kempein

September hua ai, do ita gaukara goada ruma ta ta dekenai Mauri Moalelaia Hanaihanai! buklet amo Baibel stadi ita hamatamaia totona. Heduru painia totona pablisa ta ta be abia hidi idia karaia diba hora 30 idia haroro totona. Inai spesel kempein be edena bamona do ita karaia?

• Vadivadi Ginigunana ai: Buklet ena murinai ia noho henanadai oi gaukaralaia diba stadi oi hamatamaia totona. Matamanai ia kamonai namonamo tauna ta oi laloa bona ia oi lou henia. Ena be matamanai idia ura lasi stadi, to iseda stadi karaia dala matamatana bona buklet idia itaia neganai, reana do idia ura stadi. Bema oi vadivadi henia tauna be ia kamonai lasi, namo lasi ena ruma dekenai eiava revareva lalonai buklet oi rakatania. Kongrigeisen Hesiai Komiti be September hua ai do umui karaia haroro gaukara totona hebou haida do idia karaia.

• Oi Karaia Diba Gaudia: Bema emu kongrigeisen be haroro troli ia gaukaralaia Mauri Moalelaia Hanaihanai! buklet umui hahedinaraia diba. Bema ta ia ura buklet ia abia oi hadibaia inai buklet ai gaukaralaia Baibel stadi ai karaia totona. Bena maoromaoro Baibel stadi karaia dalana oi hahedinaraia eiava oi hadibaia gabeai stadi dalana do oi herevalaia. Haroro naria tauna ese pablisa goadadia do ia abia hidi bisinesi teritori ai Baibel stadi idia hamatamaia totona. Danu, reana emu gaukara turadia eiava nega bona gabu idauidau ai oi haroro henia tauna ida Baibel stadi oi hamatamaia diba.

Iesu ese ita ia hagania taunimanima ibounai be “hahediba taudia ai umui halaoa” “bona idia umui hadibaia.” (Mt 28:19, 20) Inai spesel kempein ese ita do ia durua Mauri Moalelaia Hanaihanai! buklet amo inai hahegani ita hagugurua totona.