Gaukara Badana Buklet Matamatana Hariharilaia Totona
1 Taunimanima momo be tanobada ena toana ia dika ia lao dainai idia lalo-hekwarahi. To haida sibona idia lalo-parara dahaka dainai unai gaudia idia vara, gabeai dahaka do ia vara, bona dahaka idia karaia be namo ia mai noho kota dinana dekenai idia roho mauri totona. (Ese. 9:4) Taunimanima ita durua iseda nega idia lalo-pararalaia totona, Sunday February 13 ia lao Saturday, March 12, gaukara badana do ita karaia Gima Noho! buklet matamatana hariharilaia totona.
2 Unai buklet be ruma-ta-ruma-ta gaukarana, lou henia ita karaia, nega bona gabu idauidau ai eiava taunimanima momo gabuna dekenai ita haroro neganai, ita hariharilaia diba. To, Gima Noho! buklet ita hariharilaia kava lasi be namo. Namona be Baibel ese tanobada dekenai idia vara gaudia edia anina idia ura diba taudia sibona dekenai ita hariharilaia. Idia kamonai namonamo lasi taudia dekenai reana pepapepa ta ita henia.
3 Reana ta ena lalona oi veria diba bema oi gwau:
◼ “Taunimanima momo be hari inai negai idia vara momo hekwakwanai badadia, bona gau dika rohorohodia idia laloa momo. [Emu gabu dekenai ia vara momo hekwakwanai ta gwauraia.] Unai bamona gaudia be Baibel ese ia perovetalaia. Unai oi diba, a? [Haere naria. Bena unai hekwakwanai ia herevalaia siri namona ta duahia, hegeregere Mataio 24:3, 7, 8; Luka 21:7, 10, 11; eiava 2 Timoteo 3:1-5.] Baibel ese iseda nega ena anina bona taunimanima edia vaira negana ia gwauraia hedinarai. Oi ura diba ma haida oi abia, a? [Haere naria. Bema ia kamonai, buklet oi hariharilaia.] Inai buklet ena davana ai gwauraia lasi. Bema oi ura heduru monina oi henia emai tanobada ibounai gaukarana oi durua totona, mai moale ida unai do ai abia dae.”
4 Eiava inai bamona oi hereva:
◼ “Taunimanima momo be gau dika rohorohodia, eiava edia gau ta idia haboioa neganai idia lalohisihisi bada. Haida idia laloa dahaka dainai Dirava ese unai bamona gaudia ia koua lasi. Baibel ia gwau kahirakahira Dirava ese taunimanima idia mamia hisihisi do ia kokia. Dirava ese taunimanima dekenai do ia mailaia namo mani ita itaia. [Salamo 37:10, 11 duahia.] Oi ura diba ma haida oi abia, a?” Ataiai ia noho kiki herevana hegeregerena emu hereva oi hadokoa.
5 Buklet ia abia dae tauna ena ladana bona adres oi abia toho, bona dala oi karaia oi lou henia ena ura oi habadaia totona. Karaia dalana be February 2005 ena Iseda Basileia Gaukara lalonai do ia noho. Bema vadivadi ginigunana ai ia kamonai namonamo, maoromaoro Baibel stadi be Gima Noho! buklet eiava buka ma ta, hegeregere Dahaka Ita Karaia? buklet amo oi hamatamaia diba.
6 Inai kahana idia herevalaia Hesiai Hebouna murinai, buklet matamatana ena kopi ta oi abia diba. Unai gaukara badana ena dina ginigunadia ai, pablisa bona painia taudia be do idia hariharilaia diba hegeregerena do idia abia. Iehova ena ladana ita hahelagaia bona kudou-maoro taudia edia namo totona ita karaia gaukarana be Iehova ese do ia hanamoa.—Sal. 90:17.