“Hari Haroro Gaukara Lau Ura Henia Bada!”

EGU MOALE IA ORE

Madi, egu mauri lagani be 13 neganai, egu hetura karana Iehova ida ia manoka. Lau itaia egu sikuli turadia be gau idauidau idia karaia diba, bona lau ura unai bamona lau karaia danu. Lau mamia egu tama sina edia taravatu bona Keristani mauri dalana be auka, bona Iehova tomadiho henia karana be mai ena hekwarahi. Nega ibounai lau abia dae Iehova be ia noho, to lau mamia ia lau tura henia lasi.

Haroro gaukara lau hadokoa momokani lasi, to nega ta ta sibona lau haroro. Haroro totona lau hegaegae lasi dainai, lau hekwarahi herevahereva lau hamatamaia totona. Unai dainai egu haroro gaukara ai anina namona ia vara lasi, bona lau moale lasi. Sibona lau nanadaia, ‘Edena dala ai ta be wiki ta ta bona hua ta ta ia haroro noho diba?’

Egu mauri lagani be 17 neganai, lau ura sibona lau noho dainai, egu kohu lau haboua bona Australia dekenai lau lao. Egu tama sina lau rakatanidia neganai idia hebogahisi bada. Danu idia lalohekwarahi, to idia laloa Iehova do lau hesiai henia noho.

Australia ai, egu hesiai gaukara ia maragi ia lao, bona hebou lau reaia matamaia. Lau bamoa matamata taudia be nega haida hanuaboi ta hebou idia lao, to hanuaboi ma ta be klab dekenai idia lao, idia inuinu bona mavaru totona. Egu mauri ai unai lau laloa neganai, lau laloparara lau be hereva momokani bona tanobada lau badinaia noho, to lau moale lasi.

LAU LALOA LASI GAUNA TA IA VARA

Lagani rua murinai taihu ta lau hedavari henia, bona ena kara ese lau ia durua egu mauri lau laloa totona. Unai negai lau be singul taihu faiv ida lau noho, bona sekit tauna bona ena adavana Tamara, ai boiria emai ruma dekenai wiki ta idia noho totona. Tadikaka be kongrigeisen gaukara ia karaia neganai, Tamara be ai ida ia herevahereva bona ai kiri hebou, unai lau moalelaia. Ia be ai ta ta ia laloa bada bona ia auka lasi ia ai hereva henia totona. Lau moalelaia gauna be, herevana taihu be Iehova ena hesiai gaukara totona ia bisi, to nega ia atoa ai ia bamoa totona.

Tamara be hereva momokani ia laloa bada, bona haroro gaukara ia goadalaia. Tamara be nega ibounai Iehova ia hesiai henia dainai ia moale, to lau be lau haroro lasi bona lau moale lasi. Tamara ena kara bona ia abia moalena ese lau ia durua, egu mauri lau haidaua totona. Iena haheitalai namona amo inai mai anina bada gauna lau dibaia: Iehova ena ura be ita ibounai ese “mai moale ida” ia ita hesiai henia bona “mai moale ida [ita] boiboi.”​—Sal. 100:2.

HARORO GAUKARA LAU GOADALAIA LOU

Lau ura Tamara ia abia moalena lau mamia, to unai ia vara totona senisi haida lau karaia be namo. Lagani toi lalonai metairametaira senisi haida lau karaia. Haroro gaukara totona lau hegaegae bona nega ta ta lau heduru painia. Unai ese lau ia durua lau gari lasi bona lau goada totona. Haroro gaukara ai Baibel lau gaukaralaia loulou dainai lau moale. Daudau lasi lau be hua ta ta lau heduru painia.

Hereva momokani lalonai idia goada bona Iehova hesiai henia gaukarana idia goadalaia mauri lagani idauidau turadia lau bamoa matamaia. Edia haheitalai namona ese lau ia durua egu mauri lalonai mai anina bada gaudia lau laloa, bona dina ta ta ai Baibel lau duahia totona. Haroro gaukara lau moalelaia bada bona daudau lasi regula painia lau hamatamaia. Lagani haida murinai, kongrigeisen lalonai lau ese nega ginigunana moale mamina lau abia lou.

PAINIA TURANA TA LAU DAVARIA

Lagani ta murinai Alex lau hedavari henia, ia be kara namo tauna bona Iehova ia lalokau henia bona haroro gaukara ia laloa bada. Ia be hesiai tauna bona lagani siks lalonai ia painia. Danu Alex be hua eit bamona Malawi dekenai haroro gaukara ia karaia, badina unuseniai pablisa be momo lasi. Unuseniai misinari taudia ia bamoa, bona ia idia hagoadaia iena mauri lalonai Basileia ia atoa guna totona.

Lagani 2003 ai, lau bona Alex ai headava, bona ful-taim haroro gaukara ai karaia ema bona hari. Ai be gau namodia momo ai dibaia, bona Iehova ese dala idauidau ai ai ia hanamoa.

IEHOVA ESE HAHENAMO MA HAIDA IA HENIA

Lagani 2009 ai, ai idia boiria Indonesia ena tano maragina ta ladana Timor-Leste ai, misinari gaukara ai karaia totona. Ai hoa, ai moale, bona ai gari. Hua faiv murinai, ai be siti ladana Dili dekenai ai ginidae.

Emai noho gabuna matamatana ai mauri dalana be ia idau. Ai ese kastom, gado, aniani, bona noho dala matamatana ai manadalaia be namo. Haroro gaukara ai, ai davaria taudia momo be idia ogogami, idia sikuli namonamo lasi, bona haida ese idia hahisia. Bona ai itaia momo be tuari bona dagedage ena hisihisi idia haheaukalaia.a

Haroro gaukara ai moalelaia! Hegeregere, ia lalohisihisi mauri lagani 13 kekeni ladana Maria, lau hedavari henia.b Iena sinana be lagani haida gunanai ia mase, bona ena tamana ia itaia momo lasi. Iena mauri lagani tamona natudia bamona, Maria ia diba lasi iena mauri lalonai dahaka do ia karaia. Lau laloatao nega ta ia be mai taitai ida ena hemami ia gwauraia hedinarai. To iena hereva lau lalopararalaia lasi, badina ena gado lau diba namonamo lasi. Iehova lau guriguri henia lau ia durua ia lau hagoadaia totona, bona hagoadaia siri haida lau duahia matamaia. Lagani haida idia hanaia murinai, lau itaia hereva momokani ese Maria ena kara, toana, bona ena mauri ibounai ia haidaua. Ia bapatiso, bona hari ia be mai ena Baibel stadi haida. Hari Maria be Iehova ena ruma bese lalonai ia noho bona ia mamia ia idia lalokau henia.

Iehova ese Timor-Leste dekenai haroro gaukara ia hanamoa. Ena be pablisa momo be idia hanaia vadaeni lagani 10 lalonai idia bapatiso, momo be painia gaukara idia karaia, hesiai taudia eiava elda taudia ai idia lao. Ma haida be remote trensleisen ofesi dekenai idia gaukara, bona edia gado ai Baibel pablikeisen idia hahanaia. Hebou dekenai ane idia abia lau kamonai, lau itaia idia kiri bona Iehova ena turana ai idia lao neganai lau moale bada.

INAI MAURI LAU MOALELAIA

Emai mauri Timor-Leste ai be ia idau Australia amo, to unai ai moalelaia bada. Nega haida taunimanima momo ida basi dekenai ai guia, bona maketi ai idia hoia gwarume bona uma aniani danu idia udaia. Dina haida gabu ia siahu bona ai be ruma maragidia lalonai Baibel stadi ai karaia, bona ruma lalonai kokoroku idia heau loaloa. Herevana unai be auka, to nega momo lau laloa, ‘Inai be namo herea!’

Egu mauri lau laloa lou neganai, ena be lau manoka, to egu tama sina idia gaukara goada Iehova ena dala idia hadibaia bona lau idia hagoadaia dainai, idia lau tanikiu henia. Aonega Herevadia 22:6 ena hereva be lau dekenai ia guguru. Egu tama sina be lau bona Alex dekenai idia moale, badina idia itaia Iehova be ai ia gaukaralaia noho. Lagani 2016 amo, ai be Australasia ena brens teritori ai sekit gaukara ai karaia noho.

Guna haroro gaukara lau moalelaia lasi. Hari, haroro gaukara lau ura henia! Hari lau laloparara herevana iseda mauri lalonai dahaka ia vara, to mai kudouna ibounai ida Iehova ita hesiai henia karana amo moale korikori ita davaria diba. Oibe, Alex ida lagani 18 lalonai Iehova ai hesiai henia negana lau moalelaia. Salamo torea tauna Davida ese Iehova ia hamaoroa herevana be hari lau lalopararalaia: “Heau mauri gabuna ai oi idia halaoa taudia be do idia moale, idia be nega ibounai mai moale ida do idia boiboi. . . . Bona oiemu ladana idia ura henia taudia be oi dainai do idia moale.”​—Sal. 5:11.