Inai Henia Karana Do ia Ore Momokani Negana!
Ena be ita sibona ese ma haida inai henia karana ita rakatania, to ma haida edia laloa dalana bona kara ita biagua diba lasi. Kerere lasi taudia be inai henia karana dainai hisihisi idia davaria noho. Vadaeni, daika ese inai henia karana do hadokoa momokani?
Iehova Dirava sibona ese inai henia karana do ia hadokoa. Baibel ia gwauhamata Dirava be unai do ia karaia.—Aonega Herevadia 20:22.
DIRAVA ESE INAI HENIA KARANA ENA BADINA DO IA KOKIA
1. SATANI DIABOLO. Satani, gwau-edeede aneruna, ese hari ita itaia inai henia karana ia hamatamaia. Dirava ese Satani bona ena kara idia tohotohoa taudia do ia hadikaia ore.—Salamo 37:38; Roma 16:20.
2. SATANI ENA TANOBADA DIKANA. Dirava ese inai henia karana idia habadaia taudia hegeregere, kara dika gavamani taudia bona tomadiho gunalaia taudia do ia hadikaia ore. Dirava ese kara dika bona mataganigani bisinesi oreadia do ia hadikaia ore.—2 Petero 3:13.
3. TAUNIMANIMA EDIA KARA DIKA. Baibel ia gwau, taunimanima be idia goevadae lasi dainai, iseda lalohadai bona ita ura karaia gaudia be dika sibona. (Roma 5:12) Taunimanima ese idia karaia kara dika ta be, edia lalona ai ma haida idia inai henia, bona idia dagedage henidia. Dirava ese taunimanima do ia durua lalohadai dikadia idia kokia totona, unai amo inai henia karana do ia ore momokani.—Isaia 54:13.
BAIBEL IA GWAUHAMATA TANOBADA AI INAI HENIA KARANA DO IA ORE
1. KARA GAGEVA DO IA ORE. Tanobada be Dirava ena Basileia ese do ia lohiaia, ia be guba ai ia noho hanaihanai gavamanina, bona kara maoromaoro do ia mailaia. (Daniela 2:44) Taunimanima lalodika henia bona inai henia kava karana do ia noho lasi. Dirava be taunimanima ese idia davaria kara gageva ibounai do ia hamaoromaoroa.—Luka 18:7.
2. TAUNIMANIMA IBOUNAI BE MAINO AI DO IDIA NOHO. Ta be dagedage o tuari dainai do ia hisihisi lasi. (Salamo 46:9) Tanobada dekenai hagaria gauna ta do ia vara lasi, unai dainai taunimanima be maino ai do idia noho.—Salamo 72:7.
3. TAUNIMANIMA IBOUNAI BE MAURI GOEVANA DO IDIA NOHOLAIA. Tanobada ai idia noho taudia ese ta ta dekenai lalokau korikorina do idia hahedinaraia. (Mataio 22:39) Tau ta be do ia daradoko lasi bona guna idia vara gau dikadia ese ena lalona do idia hahisia lasi. (Isaia 65:17) Unai nega ai, inai henia karana be do ia ore, bona taunimanima be “do idia moale bada, badina gabu ibounai dekenai maino do ia noho.”—Salamo 37:11.
Oi ura unai bamona tanobadana ai oi noho, a? Hari inai nega danu, taunimanima be Baibel ena hakaua herevadia idia dibaia bona badinaia dainai, ma haida inai henia karana idia rakatania noho. (Salamo 37:8) Tanobada hegegemadai Iehova ena Witnes taudia be unai idia karaia noho. Ena be idia be hanua idauidau bona mauri dala idauidau amo idia mai, to famili ta bamona lalokau bona lalotamona ai idia noho.—Isaia 2:2-4.
Iehova ena Witnes taudia be mai moale ida idia ura oi dekenai kara gageva bona inai henia karana idia haheaukalaia dalana idia hadibaia. Oi dibaia gauna ese oi do ia durua metairametaira inai henia karana oi rakatania, bona lalokau karana oi badinaia totona. Taunimanima ibounai oi kara namo henia dalana do oi dibaia, oi idia abia dae lasi taudia bona idia inai henia taudia danu. Unai amo, do oi moale hari bona emu hetura karana haida ida do ia namo ia lao. To gau badana be, Dirava ena Basileia henunai oi noho dalana do oi dibaia, unai neganai inai henia karana be do ore momokani.—Salamo 37:29.