Iehova Ena Lalokau Dainai Gari Karana Ita Hanaia Diba

1. Momo idia gari ena badina haida be dahaka?

IDIA vara momokani sivarai haida mani ita laloa. Nestor bona ena adavana, María, idia ura pablisa momo lasi gabuna ai hesiai gaukara idia karaia.b Unai bamona idia karaia totona edia noho dalana idia haidaua be namo. To idia gari badina idia laloa bema edia moni be momo lasi, do idia moale lasi. Iseda gaukara idia taravatua tanona ai Biniam be Iehova ena Witnes ta ai ia lao neganai, ia laloparara ia be Dirava ena hesiai tauna dainai dagedage do ia davaria. Unai ese ia dekenai gari ia havaraia. To tomadiho matamatana ia abia dae dainai iena famili ese do idia kara henia dalana ia laloa neganai, ia gari bada. Valérie be kensa gorerena ia abia, bona ia hekwarahi rara abia lasi taravatuna ia matauraia doketa ta ia tahua totona. Oibe, Valérie ia gari badina ia ura lasi ia mase.

2. Dahaka dainai ita gaukara goada gari karana ita hanaia totona?

² Oi dekenai unai bamona ia vara, a? Oibe, momo dekenai unai ia vara. Bema iseda gari karana ita biagua lasi, disisen kereredia do ita karaia bona unai ese iseda hetura karana Iehova ida ia hadikaia diba. Unai be Satani ena ura. Danu Satani ese iseda gari karana ia gaukaralaia, unai amo Iehova ena taravatu do ita badinaia lasi, hegeregere sivarai namona harorolaia gaukarana. (Apok. 12:17) Satani be kara dika bona hebogahisi lasi tauna, bona mai ena siahu. To ia amo sibona oi gimaia diba. Edena dala ai?

3. Dahaka ese ita do ia durua gari karana ita hanaia totona?

³ Bema ita diba momokani Iehova be ita ia lalokau henia bona iseda kahanai ia gini, Satani ita halusia diba. (Sal. 118:6) Hegeregere, Salamo 118 ia torea tauna be hekwakwanai badadia haida ia davaria. Iena inai taudia be momo, idia haida be lada bada taudia (siri 9, 10). Nega haida, ia lalohekwarahi bada (siri 13). Bona Iehova ese ia matahakani henia (siri 18). To, salamo torea tauna be ena ane dekenai ia gwau: “Lau be do lau gari lasi.” Dahaka dainai ia gari lasi? Ia diba ena guba Tamana ese ia lalokau henia bada, ena be ia matahakani henia. Salamo torea tauna ia diba momokani ena be dahaka do ia vara, to ena lalokau Diravana ese hanaihanai ia do ia durua.​—Sal. 118:29.

4. Bema ita abia dae Dirava ese ita ia lalokau henia, dahaka gaudia dekenai do ita gari lasi?

⁴ Namona be ita abia dae momokani Iehova be ita ia lalokau henia. Unai ese ita do ia durua gari idia havaraia gaudia toi ita hanaia totona, (1) famili naria totona ita hegeregere lasi dainai ita gari, (2) taunimanima dainai ita gari, bona (3) mase dainai ita gari. Paragraf matamanai ita herevalaia tadikaka bona taihu be edia gari karana idia hanaia, badina idia abia dae momokani Iehova ese idia ia lalokau henia.

FAMILI NARIA TOTONA ITA HEGEREGERE LASI DAINAI ITA GARI

5. Dahaka dainai ruma bese kwarana ia laloa momo? (Rau 1 ena laulau itaia.)

⁵ Keristani ruma bese kwarana ese tauanina dalanai famili naria ena maduna ia laloa bada. (1 Tim. 5:8) Bema oi be ruma bese kwarana ta, reana inai pandemic lalonai emu moni gaukara oi haboioa dainai oi laloa momo. Reana emu ruma bese totona edia aniani bona noho gabuna oi tahua totona oi hekwarahi dainai oi laloa momo. Danu oi gari, badina bema emu moni gaukara oi haboioa, gaukara ma ta do oi davaria lasi. Eiava Nestor bona María bamona, reana oi laloa moni momo lasi maurina oi noholaia diba lasi. Satani ese unai gari karana ia gaukaralaia dainai, momo ese Iehova hesiai henia karana idia hadokoa.

6. Satani ia ura dahaka ita abia dae?

⁶ Satani ia ura ita abia dae Iehova ese ita ta ta ia lalokau henia lasi, bona iseda ruma bese naria totona ita do ia durua lasi. Unai dainai, reana ita ura lasi iseda moni gaukara ita haboioa, ena be do ita karaia gaudia haida ese iseda hetura karana Dirava ida ia hadikaia diba.

7. Edena dala ai Iesu ese ita ia hagoadaia?

⁷ Iesu, Tamana ia diba namonamo tauna, ia gwau: “Iseda Tamana [ita] do noia lasi neganai, ia be [iseda] dabu gaudia ia diba vadaeni.” (Mat. 6:8) Bona Iesu ia diba Iehova be ia noho hegaegae iseda dabu gaudia ia henia totona. Ita be Keristani taudia dainai, ita be Dirava ena ruma bese taudia. Iehova be iseda ruma bese Kwarana dainai, ita diba ia ese Timoteo Ginigunana 5:8 ena hakaua herevana do ia badinaia.

8. (a) Famili naria totona ita hegeregere lasi dainai ita gari neganai, dahaka ese ita do ia durua? (Mataio 6:31-33) (b) Edena dala ai laulau ai ia noho headava tau bona hahine edia haheitalai ita tohotohoa diba?

⁸ Bema ita abia dae Iehova be ita bona iseda famili ia lalokau henia, vadaeni ita diba momokani iseda dabu gaudia do ia henia. (Mataio 6:31-33 duahia.) Iehova ia ura ita ia naria, bona ia be lalokau bona Hariharibada Tauna! Tanobada ia karaia neganai, iseda mauri durua gaudia sibona ia karaia lasi, to gau momo ia karaia ita moalelaia totona. (Gen. 2:9) Ena be nega haida iseda ura gaudia be haida sibona ita abia, to namona be ita laloatao unai gaudia be Iehova ese ia henia. (Mat. 6:11) Namona be ita laloatao, ena be kohu momo maurina ita dadaraia, to iseda lalokau Diravana ese hari bona vaira nega ai unai ia hereaia gaudia do ia henia. Nestor bona María be unai idia lalopararalaia.​—Isa. 65:21, 22.

9. Nestor bona María edia haheitalai amo dahaka oi dibaia?

⁹ Colombia ai Nestor bona María be ruma namona ai idia noho bona moni gaukara namona idia karaia. Idia gwau: “Ai ura kohu momo lasi maurina ai noholaia bona haroro gaukara ai habadaia, to ai gari badina bema emai moni be momo lasi, do ai moale lasi.” Dahaka ese idia ia durua unai gari karana idia hanaia totona? Iehova ese idia dekenai ena lalokau ia hahedinaraia daladia idauidau idia laloa. Idia abia dae momokani Iehova ese hanaihanai idia do ia naria dainai, edia moni gaukara namona idia rakatania. Edia ruma idia hoihoilaia bona pablisa momo lasi gabuna dekenai idia lao. Idia karaia disisen dainai dahaka ia vara? Nestor ia gwau: “Ai ese Mataio 6:33 ia guguru dalana ai itaia. Tauanina dalanai ai dabu lasi. Bona hari emai mauri ai moalelaia bada.”

TAUNIMANIMA DAINAI ITA GARI

10. Dahaka dainai taunimanima be ta ta dekenai idia gari?

¹⁰ Idaunega amo ema bona hari, taunimanima be ta ta idia hahisia. (Had. 8:9) Hegeregere, taunimanima be edia siahu idia gaukaralaia kerere, raskol be dagedage karadia idia karaia, sikuli ai haida be edia klas taudia idia hahisia bona hagaria, bona haida be edia famili taudia idia dagedage henia. Momokani, taunimanima be ta ta idia hahisia noho! Edena dala ai Satani ese taunimanima gari henia karana ia gaukaralaia?

11-12. Edena dala ai, Satani ese taunimanima gari henia karana ia gaukaralaia?

¹¹ Satani ia ura taunimanima ita gari henia, unai amo do ita haroro lasi eiava Iehova ese ita ia hamaoroa gaudia do ita karaia lasi. Satani ese gavamani ia gaukaralaia iseda gaukara idia koua bona ita idia dagedage henia. (Luka 21:12; Apok. 2:10) Satani ena tanobada ai, taunimanima momo be Iehova ena Witnes taudia totona sivarai koikoi idia gwauraia. Unai sivarai koikoi idia abia dae taudia ese ita idia kirikirilaia eiava dagedage henia. (Mat. 10:36) Satani ena koikoi karadia dainai ita hoa, a? Lasi momokani. Aposetolo taudia edia nega ai, Satani ese unai koikoi karadia ia gaukaralaia.​—Kara 5:27, 28, 40.

¹² Satani ese gavamani edia dagedage karana sibona ia gaukaralaia lasi ita ia hagaria totona. Haida idia gari, badina hereva momokani idia abia dae neganai edia famili ese idia do idia kara henia dalana idia laloa. Edia varavara idia lalokau henia bada bona idia ura Iehova do idia dibaia bona lalokau henia danu. Bona edia varavara ese Dirava momokanina bona ena taunimanima idia gwauraia dika neganai, idia lalohisihisi bada. To, nega haida, unai bamona taudia be gabeai hereva momokani idia abia dae. Bema ita abia dae gaudia dainai iseda famili ese ita idia dadaraia be edena bamona? Dahaka do ita karaia?

13. Edena dala ai Dirava ena lalokau ese ita ia durua famili gari henia karana ita dadaraia totona? (Salamo 27:10)

¹³ Salamo 27:10 ena hereva ese ita ia hagoadaia. (Duahia.) Iehova ese ita ia lalokau henia karana ita laloatao neganai, dagedage karadia dainai do ita gari lasi. Bona ita diba iseda haheauka karana dainai ita do ia hanamoa. Iehova ese mauri durua gaudia ia henia, ita ia durua lalomaino ita abia bona ita moale, bona ita ia hagoadaia ia kahirakahira ita lao totona! Matamanai ita herevalaia tauna, Biniam, dekenai unai ia vara.

14. Biniam ena haheitalai amo dahaka oi dibaia?

¹⁴ Biniam be Iehova ena Witnes tauna ta ai ia lao, ena be ia diba dagedage bada do ia davaria. Biniam ia diba Iehova ese ia lalokau henia dainai taunimanima ia gari henia lasi karana mani oi laloa. Ia gwau: “Gavamani edia dagedage karana dainai lau gari, to egu famili ese lau do idia kara auka henia dalana lau laloa neganai lau gari bada. Bema Iehova ena Witnes ta ai lau lao, egu Witnes lasi tamana do ia badu bona egu famili be lau do idia matauraia lasi.” To, Biniam ia diba momokani Iehova ese ia lalokau henia taudia be nega ibounai ia naria. Biniam ia gwau: “Iehova ese ma haida ia durua moni ena hekwakwanai, inai heheni karana, bona dagedage karadia idia haheaukalaia dalana lau laloa. Lau diba bema Iehova lau badinaia noho, lau do ia hanamoa. Nega momo lau idia arest bona hahisia neganai, lau mamia momokani bema hanaihanai Iehova ita badinaia ita do ia durua.” Iehova be Biniam ena Tamana korikori ai ia lao, bona Iena taunimanima be ena famili korikori ai idia lao.

MASE DAINAI ITA GARI

15. Dahaka dainai mase dainai ita gari?

¹⁵ Baibel ia gwau mase be iseda inai gauna. (1 Kor. 15:25, 26) Ita eiava iseda lalokau tauna ta be gorere badana ia abia neganai, reana mase ita laloa dainai ita lalohekwarahi. Dahaka dainai mase dainai ita gari? Badina Iehova ese ita ia karaia neganai, mauri moalelaia hanaihanai ena ura ia atoa. (Had. 3:11) To mase dainai ita gari karana ese ita do ia durua iseda mauri ita gimaia totona. Hegeregere, aniani maorodia ita ania bona eksasais, doketa edia heduru ita tahua, bona iseda mauri ia hadikaia diba gaudia ita dadaraia.

16. Edena dala ai Satani be mase gari henia karana ia gaukaralaia ita ia tarapua totona?

¹⁶ Satani ia diba iseda mauri ita laloa bada. Bona ia gwau mauri ita gimaia totona iseda hetura karana Iehova ida ita dadaraia diba. (Iobu 2:4, 5) Satani ena hereva be kerere! Ia be “mase ia havaraia tauna” dainai, mase gari henia karana ia gaukaralaia Iehova ita rakatania totona. (Heb. 2:14, 15) Nega haida, Satani ena taunimanima ese Iehova idia tomadiho henia taudia idia hagaria, edia abidadama idia rakatania totona. Eiava nega haida, gorere badana ta dainai ita ura medikol heduru ita abia haraga, bona Satani ese unai ia gaukaralaia iseda hetura karana Dirava ida ia hadikaia totona. Doketa eiava Witnes lasi famili be ita idia doria rara ita abia totona, unai amo Dirava ena taravatu ita utua diba. Eiava ta ese iseda lalona ia veria heduru dala ma ta ita tahua totona, ena be unai ese Baibel ena hakaua herevadia ia utua.

17. Roma 8:37-39 hegeregerena, dahaka dainai mase dainai ita gari lasi be namo?

¹⁷ Ena be ita ura lasi mase, eiava do ita mase, to ita diba Iehova ese ita do ia lalokau henia noho. (Roma 8:37-39 duahia.) Iehova ena turadia idia mase neganai, idia ia laloatao noho, toana be idia mauri noho bamona. (Luka 20:37, 38) Ia ura dikadika idia ia hamauria lou. (Iobu 14:15) Iehova ese dava bada gauna ta ia henia, unai amo ‘mauri hanaihanai do ita abia.’ (Ioa. 3:16) Ita diba Iehova ese ita ia lalokau henia bona laloa bada. Unai dainai, ita gorere eiava kahirakahira ita mase neganai, Iehova ena heduru, aonega, bona goada dekenai ita tabekau. Valérie bona ena adavana be unai bamona idia karaia.​—Sal. 41:3.

18. Valérie ena haheitalai amo dahaka oi dibaia?

¹⁸ Valérie ena mauri lagani be 35 neganai, kensa gorerena ia abia. Ia be Dirava ena lalokau dainai mase dainai ia gari lasi. Ia gwau: “Doketa ese lau idia hadibaia kensa gorerena lau abia neganai, lau bona egu adavana ai hoa. Lau mauri totona opereisen badana lau abia be namo. Doketa momo edia heduru lau tahua, to idia ura lasi rara lasi opereisen idia karaia. Lau gari, to Dirava ena taravatu dainai rara abia hanai karana lau dadaraia! Egu mauri lalonai, Iehova be lau ia lalokau henia bada. Hari namona be lau hamomokania Iehova lau lalokau henia. Nega momo doketa amo sivarai dikana lau kamonai neganai, egu lalona lau hadaia Iehova lau hamoalea bona Satani lau halusia. Dokonai rara lasi opereisen lau abia bona dika ta ia vara lasi. Ena be egu helt ia namo momokani lasi, to Iehova be hanaihanai ai ia durua. Hegeregere, lau do gorere lasi ena wikeni gunanai, kongrigeisen hebouna ai atikol ladana, ‘Mai Gari Lasi ida Hekwakwanai Haheaukalaia’ ai stadilaia.c Unai atikol ese ai ia hagoadaia bada, bona ai duahia loulou. Unai bamona atikol ese lau bona egu adavana ia durua lalomaino ai abia, hanaihanai hebou ai lao, ai haroro bona abia hidi namodia ai karaia.”

GARI KARANA ITA HANAIA

19. Kahirakahira dahaka do ia vara?

¹⁹ Iehova ena heduru amo, tanobada hegegemadai Keristani taudia be hahetoho idauidau idia haheaukalaia bona Diabolo idia halusia. (1 Pet. 5:8, 9) Oi danu unai bamona oi karaia diba. Kahirakahira, Iehova ese Iesu bona ia ida do idia lohia taudia ia gaukaralaia ‘Diabolo ena gaukara ibounai idia haorea momokani’ totona. (1 Ioa. 3:8) Unai murinai, tanobada ai Dirava idia hesiai henia taudia be ‘gau ta dekenai do idia gari lasi bona gau ta ese idia do ia hagaria lasi.’ (Isa. 54:14; Mika 4:4) To unai nega ita naria noho lalonai, namona be ita gaukara goada iseda gari karana ita hanaia totona.

20. Dahaka ese ita do ia durua gari karana ita hanaia totona?

²⁰ Namona be ita abia dae momokani Iehova ese ena hesiai taudia ia lalokau henia bona gimaia. Iehova ese guna ena hesiai taudia ia gimaia dalana ita laloa dobu bona herevalaia karana ese ita do ia durua. Bona hekwakwanai ita haheaukalaia totona ita ta ta ia durua dalana ita laloatao be namo. Iehova ena heduru amo gari karana ita hanaia diba!​—Sal. 34:4.