Hoa Gaudia Momo Ai Moalelaia Bona Iehova Hesiai Henia amo Ai Dibaia Gaudia

Egu tama sina be Tanobada Tuarina Iharuana ai, Estonia idia rakatania bona Germany dekenai idia lao, lau be unuseniai lau vara. Unai negai idia hegaegae Canada dekenai idia lao totona. Emai ruma ginigunana, Ottawa kahirakahira, Canada dekenai, be ruma maragina ta bona unuseniai kokoroku idia noho danu. Ai be ai ogogami momokani, to ai moale badina daba ena aniani totona gatoi ai ania diba.

Dina ta, Iehova ena Witnes taudia ese egu sinana dekenai Apokalupo 21:3, 4 idia duahia. Ia dibaia gaudia ese ena kudouna ia hamarerea dainai ia tai matamaia. Egu tama sina be Baibel idia stadilaia bona daudau lasi murinai bapatiso idia abia.

Herevana egu tama sina be English gado idia diba namonamo lasi, to hereva momokani idia laloa bada. Ena be egu tamana be hanuaboi ibounai Sudbury, Ontario ai nickel auri idia gabua gabuna ai ia gaukara, to Saturday ibounai lau bona egu taihuna, Sylvia do ia hakaua lao haroro totona. Bona wiki ta ta emai ruma bese ida Gima Kohorona ai stadilaia. Egu tama sina ese Dirava lalokau henia karana dekenai lau idia hadibaia. Unai dainai lagani 1956 ai, lau 10 neganai Iehova dekenai egu mauri lau gwauhamatalaia. Edia lalokau Iehova dekenai ia goada dainai, unai ese lau ia durua Iehova lau hesiai henia noho totona.

To haisikuli amo lau gredueit murinai, Iehova hesiai henia karana lau goadalaia lasi. Lau laloa bema painia gaukara lau karaia, egu moni be do ia hegeregere lasi egu ura gauna peleini amo loaloa bona gabu momo itaia karana lau hagugurua totona. Gaukara ta lau davaria reidio steisen ta ai bona idia rekodia miusiki lau gadaralaia, unai gaukara lau ura henia. To hanuaboi ibounai lau gaukara dainai, nega momo hebou lau reaia bona Dirava idia lalokau henia lasi taudia lau bamoa. Bena gabeai, Baibel amo lau dibaia gaudia ese lau idia durua senisi lau karaia totona.

Lau be Oshawa, Ontario dekenai lau lao. Unuseniai Ray Norman, iena taihuna Lesli, bona painia ma haida lau hedavari henia. Idia ibounai ese lau idia welkam henia. Edia hesiai gaukara ena moale lau itaia neganai, lau ia durua do lau abia hidi tahua gaudia lau laloa totona. Lau idia hagoadaia painia gaukara lau karaia, bona September 1966 ai lau painia. Lau moale, bona egu mauri ia namo. To, lau diba lasi egu mauri ai hoa gaudia haida do idia vara.

IEHOVA BE OI IA BOIRIA GAU TA OI KARAIA NEGANAI, OI TOHOA

Haisikuli ai lau noho lalonai, Toronto, Canada ai, Betele gaukara totona lau aplikeisen lau siaia. Gabeai lau painia noho lalonai, lau idia boiria Bethel ai lagani foa do lau gaukara. To Lesli lau lalokau henia bada, bona lau gari bema inai invateisen lau abia dae, ia do lau itaia lou lasi. Lau guriguri murinai, abia hidi lau karaia Betele dekenai do lau gaukara, to lau hebogahisi Lesli lau bamahuta henia totona.

Betele ena dabua huria gabunai lau gaukara bona gabeai seketere gaukara lau karaia. Unai negai, Lesli be Gatineau, Quebec ai spesol painia ta ai ia lao. Nega momo ia lau laloa bona lau bema disisen maorona lau karaia. Bena nega ta lau dekena hoa gauna ta ia vara. Ray, Lesli ena taihuna, be Betele dekenai idia boiria. Bona ia be egu daihutu turana ai ia lao! Unai negai egu hetura karana Lesli ida lau hamatamaia lou. Bena February 27, 1971 ai, egu lagani foa ena asainmen dina ginigabena lalonai ai headava.

Lau bona Lesli be Quebec ai, French-gado kongrigeisen dekenai ai idia siaia. Lagani haida murinai, lau be 28 negana ai, lau hoa lau idia abia hidi sekit gaukara lau karaia totona. Lau laloa lau be matamata bona lau hegeregere lasi sekit gaukara lau karaia totona, to Ieremia 1:7, 8 ena hereva ese lau ia hagoadaia. Lesli be motuka amo aksiden haida ia abia bona ia auka ia mahuta namonamo totona. Unai dainai ai laloa do ia auka sekit gaukara ai karaia totona. Ena be unai hekwakwanai ia noho, to Lesli ia gwau, “Bema Iehova ese ita ia boiria gaukara ta ita karaia, namona be ita tohoa.” Unai asainmen ai abia dae bona lagani 17 lalonai sekit gaukara ai moalelaia.

Sekit gaukara dekenai lau bisi dainai nega be lasi Lesli ida lau hebamo totona. Unai ese lau dekenai gau ta ia hadibaia. Monday dabai, iduara ena bel ia rini. Unuseniai ta ia noho lasi, to piknik bosea mai ena tablecloth, frut, cheese, beredi, wain botolo ta, wain galasi, bona nouti ta ia gwau, “Emu adavana oi abia lao piknik totona.” Unai be dina namona. To Lesli lau hamaoroa, egu tok do lau hegaegaelaia dainai do ai lao lasi. Lesli ia laloparara to ia lalohisihisi sisina. Egu teibolo dekenai lau helai neganai, egu lalomamina ia namo lasi. Bena Efeso 5:25, 28 lau laloa. Iehova ena hereva ese lau ia hagoadaia egu adavana ena hemami lau laloa be namo. Lau guriguri murinai, Lesli lau hamaoroa, “Ita lao,” bona ia moale. Motuka amo gabu namona ta dekenai ai lao, unai be sinavai badinai, so tablecloth ai atoa, bona unai dina ai moalelaia hebou. Danu nega ia noho egu tok lau hegaegaelaia totona.

Emai sekit gaukara gabudia be momo, British Columbia ia lao Newfoundland dekenai ai moalelaia. Lau maragi neganai lau ura henia gaukarana lau karaia matamaia. Lau ura Gilead Sikuli lau lao to lau ura lasi tano ma ta dekenai misinari gaukara lau karaia. Lau laloa misinari taudia be spesel dainai lau mamia lau hegeregere lasi. Danu, Africa dekenai ai do idia siaia totona lau gari badina gorere bona tuari be unai tano dekenai ia vara. Lau moale Canada dekenai lau noho.

INVATEISEN TA AI ABIA ESTONIA BONA BALTICS DEKENAI AI IDIA SIAIA

Lagani 1992 ai post-Soviet tanodia dekenai, gaukara idia kehoa matamaia neganai, ai idia nanadaia bema ai ura Estonia dekenai misinari gaukara ai karaia. Ai hoa to unai ai gurigurilaia. Bena ai laloa lou, ‘Bema Iehova ese ita ia boiria gaukara ta ita karaia, namona be ita tohoa.’ Unai asainmen ai abia dae, bona lau laloa, ‘Ai be Africa dekenai do ai lao lasi.’

Maoromaoro Estonia gado ai diba matamaia. Hua haida murinai, ai idia hadibaia sekit gaukara do ai karaia. Kongrigeisen 46 bamona, Baltic tanona ai grup toi bona Kaliningrad, Russia do ai vadivadi henia. Anina be Latvia, Lithuania, bona Russia gado do ai dibaia. Unai be mai ena hekwarahi. To, emai hekwarahi karana dainai, tadikaka taihu be mai moale ida ai idia durua. Lagani 1999, Estonia ai brens ofesi ta idia haginia bona Toomas Edur, Lembit Reile, bona Tommi Kauko ida brens komiti gaukara ai karaia hebou.

Witnes taudia momo be Siberia dekenai idia siaia lao ai dibaia. Ena be dibura ruma ai idia hahisia bada bona edia famili amo idia parara, to idia badu lasi. Idia moale noho bona edia hesiai gaukara idia goadalaia. Unai ese ai ia durua mai moale ida nega aukadia ai haheaukalaia totona.

Lagani momo lalonai ai gaukara goadagoada, to nega bada ai gaukaralaia lasi ai laga-ani totona, unai dainai Lesli ia mamia ena goada ia ore matamaia bona nega momo ia hesiku. Lesli be gorere ta ladana, fibromyalgia ia abia dainai ia hesiku momo, to unai ai lalopararalaia haraga lasi. Unai dainai Canada dekenai do ai giroa lou ena lalohadai ai abia matamaia. Bena Patterson, New York, U.S.A. dekenai brens sikuli totona ai idia boiria, bona lau laloa do ai lao lasi. To unai ai gurigurilaia murinai, ai idia abia dae. Iehova ese emai disisen ia hanamoa. Unai sikuli dekenai ai noho neganai, Lesli ese medikol heduru ia abia. Unai dainai, emai hesiai gaukara ai karaia matamaia lou.

HOA GAUNA MA TA​—TANO MA TA

Lagani 2008, Estonia ai, adorahi ta lalonai hedikwota amo fon kol ta lau abia, lau idia nanadaia bema Congo dekenai do ai lao eiava lasi. Lau hoa bada, badina murina dinana ai egu haere do lau henia. Lesli lau hadibaia lasi, badina lau diba hanuaboi ai do ia mahuta lasi. To lasi, lau dekenai unai ia vara, Africa lao totona ena lalohekwarahi be guriguri amo Iehova dekenai lau gwauraia bona lau mahuta lasi.

Murina dinana ai Lesli lau hamaoroa neganai, ai laloa, unai be “Iehova ese ai ia boiria Africa dekenai do ai lao totona. Bema Iehova ese ita ia boiria gaukara ta ita karaia, namona be ita tohoa.” Lagani 16 Estonia dekenai ai noho murinai, Kinshasa, Congo dekenai ai lao. Brens ofesi be mai ena uma hairaina bona regerege lasi gabuna. Lesli ese daiutu lalonai ia atoa gauna ginigunana be, Canada amo ia abia mai kadi ta. Unai kadi ai ia noho hereva ia gwau: “Edeseni oi noho, oi moale.” Tadikaka ai hedavari henia, Baibel stadi ai karaia, bona misinari gaukara ena moale ai mamia neganai, emai moale ia habadaia. Daudau lasi murinai, Africa tanodia 13 dekenai brens vadivadi ai karaia. Unai ese dala ia kehoa tano idauidau taudia ida ai hedavari bona idia amo gau momo ai dibaia. Matamanai lau abia gari hemamina ia ore, bona Iehova ai tanikiu henia badina Africa dekenai ai ia siaia mai.

Congo dekenai, ai laloa do ai ania diba lasi aniani idauidau be ai dekenai idia henia hegeregere, manumanu idauidau. To ai itaia tadikaka ese unai idia moalelaia neganai, ai danu ai tohoa bona ai ura henia.

Africa ena ist kahana ai tadikaka hagoadaia totona ai lao, bona edia dabu gaudia ai henidia. Unai gabu dekenai dagedage oreadia ese hanua taudia, hahine bona natudia idia hadikaia. Tadikaka momo be kohu momo lasi. To, edia helaro toreisi lou dekenai be ia goada, Iehova idia lalokau henia, bona ena orea idia badinaia karana ese emai kudouna ia hamarerea. Unai dainai Iehova hesiai henia ena badina, bona emai abidadama ia dekenai ai hagoadaia karana ai laloa lou. Tadikaka haida edia ruma bona uma gabu idia hadikaia. Unai ese lau ia hadibaia kohu be idia dika o boio haraga diba, to Iehova tura henia karana be mai anina bada. Herevana metau idauidau idia vara, to tadikaka idia maumau diba lasi. Edia goada karana ese ai ia hagoadaia ai davaria hekwakwanai bona gorere ai haheaukalaia totona.

ASAINMEN MATAMATA TA ASIA DEKENAI

Ai laloa lasi gauna ma ta ia vara. Ai idia hadibaia Hong Kong brens dekenai do ai lao. Ai laloa lasi Asia dekenai do ai lao! To, emai asainmen ibounai lalonai Iehova ena heduru ai mamia dainai, unai invateisen ai abia dae. Lagani 2013, mai mata ranu ida emai tura namodia bona Africa ena gabu hairaina ai rakatania, ena be ai diba lasi gabeai dahaka do ia vara.

Hong Kong be siti badana badina tano idauidau taudia be unai gabu dekenai idia mai. Cantonese gado be auka. Tadikaka be mai moale ida ai idia welkam henia bona unai gabu ena aniani ai moalelaia bada. Brens ai gaukara momo idia karaia, to danu gaudia edia davana be ia bada herea. Unai dainai Hakaua Oreana ese aonega dalanai disisen ia karaia brens ena kohu haida ia hoihoilaia totona. Daudau lasi murinai, lagani 2015 ai, South Korea dekenai ai idia siaia, hesiai gaukara ai karaia noho totona. Korea gado dibaia totona ai hekwarahi bada, ena be unai gado ai herevalaia namonamo lasi, to tadikaka taihu edia hanamoa herevadia amo ai idia hagoadaia.

AI DIBAIA GAUDIA

Tura matamatadia dibaia totona be mai ena hekwarahi, to ai dibaia gauna be heabidae karana ai hahedinaraia neganai, taunimanima do ai dibaia haraga. Ai itaia iseda tadikaka edia kara be idau lasi, bona Iehova ese dala hereadaena ai ita ia karaia dainai, mai kudouna ibounai ida lalokau ita hahedinaraia bona turadia momo ita davaria diba.​—2 Kor. 6:11.

Ai itaia Iehova ese taunimanima ia abia dae hegeregerena, ma haida ai abia dae be namo, bona Iehova ena lalokau bona hakaua daladia emai mauri lalonai ai ura itaia. Ai lalomanoka eiava ai laloa haida ese ai idia abia dae lasi neganai, turadia edia kadi eiava revareva ai idia noho hagoadaia herevadia ai duahia lou. Oibe, Iehova ese emai guriguri ia haerelaia dalana ai itaia, bona ai diba momokani ai do ia hagoadaia.

Idia hanaia laganidia lalonai, lau bona Lesli be mai anina bada gauna ai dibaia, ta ta totona nega ai atoa be gau badana, ena be ai bisi bada. Bona ai laloparara, gado matamata ta ai tohoa bona ai gwauaraia kerere neganai, ai kiri be namo. Hanuaboi ta ta ai, ai moalelaia gaudia ai laloa, unai amo Iehova ai tanikiu henia diba.

Momokani, lau diba misinari gaukara eiava tano ma ta dekenai do lau lao lasi. To lau moalelaia gauna be, Iehova ena heduru amo gau ibounai lau karaia diba. Peroveta tauna Ieremia ena hereva lau laloatao, ia gwau: “Iehova e, oi ese lau oi koia.” (Ier. 20:7) Oibe, ai dekenai hoa gaudia momo ia henia bona ai laloa lasi hahenamo ia henidia, bona egu ura peleini ai loaloa karana ia hagugurua danu. Lau mero neganai, lau ura karaia gaudia idia vara momokani, gabu momo dekenai ai loaloa, tano faiv dekenai brens vadivadi lau karaia. Emai asainmen ibounai lalonai, Lesli be mai ura bada ida lau ia durua.

Hanaihanai ai ura laloatao, gau ibounai ai karaia badina Iehova ai lalokau henia. Hari ita moalelaia hahenamo ese vaira nega ai do ita moalelaia mauri hanaihanai ena hahenamo ia laulaulaia, unai nega ai Iehova ese ena ‘imana do ia kehoa bona mauri gaudia ibounai edia ura gaudia do ia henia.’​—Sal. 145:16.