Emai Mauri Ibounai Lalonai Iehova ese Ai Ia Hadibaia

EGU TAMA SINA EDIA HAHEITALAI

Lagani 1950 lalodiai, egu tama sina be Italy amo idia lao Kindersley, unai be Saskatchewan, Canada ai. Daudau lasi murinai, hereva momokani idia dibaia, bona unai be emai mauri ai mai anina bada. Lau laloatao, lau maragi neganai nega momo egu ruma bese ida haroro gaukara ai karaia, unai dainai egu mauri lagani be 8 neganai, nega haida do lau hevaseha bona gwau, “Lau be heduru painia gaukara lau karaia”!

Ena be egu tama sina be kohu momo taudia lasi; to Iehova hesiai henia karana idia laloa bada. Hegeregere, lagani 1963 ai edia kohu momo idia hoihoilaia, badina idia ura moni idia haboua bona Pasadena, California, U.S.A. dekenai intanesinol hebouhebou totona idia lao. Lagani 1972 ai, ai be Canada, British Columbia, ena gabu ladana Trail dekenai ai lao, unai gabu ai idia noho Italy gado taudia durua totona. Unai gabu ena daudau be kilomita 1,000 bamona. Egu tamana be sitoa badana ta ai hagoevaia gaukara ia karaia. Ia be nega momo pei bada gaukara ia dadaraia, badina Iehova ena hesiai gaukara ia laloa bada.

Egu tama sina ese lau, egu kakana bona taihuna rua dekenai haheitalai namona idia hahedinaraia dainai lau moale bada. Unai ese lau ia hagoadaia egu mauri lalonai Iehova hesiai henia karana lau laloa bada totona: Bema Basileia lau atoa guna, Iehova ese lau do ia naria.—Mat. 6:33.

FUL-TAIM HESIAI GAUKARA LAU HAMATAMAIA

Lagani 1980 ai, Iehova ia hesiai henia taihu namona ta ladana Debbie lau adavaia. Ai ura ful-taim hesiai gaukara ai karaia, unai dainai ai headava bona hua toi murinai Debbie be painia gaukara ia hamatamaia. Lagani ta murinai, kongrigeisen maragina ta ai bamoa, bona Debbie ida painia gaukara lau karaia.

Daudau lasi murinai, gau haida dainai ai lalomanoka bona ai ura unai gabu do ai rakatania. To sekit naria tauna ai hereva henia guna. Ia be mai lalokau bona mai momokani ida ai ia hamaoroa: “Umui be emui hekwakwanai umui habadaia sibona. Bona unai sibona umui laloa bada noho. To bema gau namodia umui laloa, unai ese umui do ia durua.” Unai hereva ese ai ia hagoadaia bada. (Sal. 141:5) Ai ese unai sisiba ai badinaia haraga, bena ai laloparara gau namodia momo ai laloa diba. Hegeregere, kongrigeisen ai haida idia ura edia hesiai gaukara idia habadaia, matamata taudia bona edia adavana be Witnes lasi pablisa taudia danu. Ai dekenai unai sisiba be mai anina bada. Ai laloparara Iehova ese ai do ia durua nega aukadia ai haheaukalaia totona. (Mika 7:7) Ai moale lou bona gau haida ai hamaoromaoroa.

Emai painia sikuli ginigunana idia hakaua tadikakadia be guna tano ma ta dekenai misinari gaukara idia karaia. Idia ese slaid piksa idia hahedinaraia bona idia davaria hekwakwanai bona hahenamo idia herevalaia. Unai ese ai ia hagoadaia misinari gaukara ai karaia totona. Unai dainai, emai lalona ai hadaia misinari gaukara do ai karaia.

Unai ai hagugurua totona, lagani 1984 ai, Quebec ena French gado teritori dekenai ai lao, ena daudau British Columbia amo be kilomita 4,000 bamona. Unuseniai, gado bona noho dala matamata ai dibaia. Ai davaria hekwakwanai ta be nega momo moni dalanai ai hegeregere lasi. Nega ta, aniani dalanai sibona ai durua totona, fam ta ena biaguna ai noia poteto oredia ai gogoa totona. Unai nega ai, Debbie be poteto nadua daladia idauidau ia dibaia! Ena be nega aukadia ai davaria, to ai gaukara goada mai moale ida ai haheauka totona. Danu, ai itaia Iehova be ai ia naria.—Sal. 64:10.

Dina ta, ai laloa lasi gauna ia vara. Ai idia ring henia bona ai idia boiria Canada ena Betele dekenai do ai gaukara totona. To ai be Gilead Sikuli totona aplikeisen ai siaia vadaeni dainai, Betele lao totona ai daradara. To unai boiboi herevana ai abia dae. Betele dekenai ai ginidae neganai, Brens Komiti ena memba ta, Tadikaka Kenneth Little, ai nanadaia, “Emai Gilead aplikeisen be edena bamona?” Ia gwau, “Bema umui idia boiria, vadaeni unai do ita laloa.”

Wiki ta murinai, lau bona Debbie idia boiria Gilead sikuli dekenai do ai lao totona. Unai dainai abia hidi ta ai karaia be namo. Tadikaka Little ese ai ia hamaoroa, ia gwau: “Ena be edena abia hidi umui karaia, to reana nega haida do umui laloa lou bona gwau, bema unai asainmen ita abia hidi be namo. Unai abia hidi rua be namo, badina Iehova ese do ia hanamoa.” Ai ese Gilead Sikuli ena boiboi herevana ai abia dae, bona lagani haida murinai, ai itaia Tadikaka Little ena sisiba be mai ena namo. Nega momo asainmen idia ura abia hidi taudia dekenai, tadikaka Little ena hereva ai gwauraia loulou.

MISINARI GAUKARANA

Ai moale bada badina ai be Gilead ena klas namba 83 ena stiuden 24 huanai ai noho. Unai klas be April 1987 ai, Brooklyn, New York dekenai ai karaia. Tadikaka Ulysses Glass bona Jack Redford be emai hadibaia taudia. Hua 5 murinai, September 6, 1987 lalonai ai gradueit. Ai, John bona Marie Goode be Haiti dekenai idia siaia.

Lagani 1962 ai Haiti dekenai gavamani ese misinari be edia tano dekenai idia siaia lou bona unai nega amo misinari ta idia siaia lasi ela bona ai idia siaia. Emai gradueisen ia ore bona wiki toi murinai, ai be Haiti ena ororo gabudia ai ia noho kongrigeisen ai bamoa, ena pablisa be 35 sibona. Ai be matamata bona gau momo ai diba be namo, danu misinari rumana dekenai ai sibona ai noho. Unai gabu ai momo be idia ogogami bona duahiduahi idia diba lasi. Unai nega lalonai, politikol karadia dainai taunimanima idia dagedage bona gavamani senisia totona idia protest, bona saiklon idia vara danu.

Haiti ai idia gaukara noho tadikaka taihu edia haheitalai ese ai ia durua. Idia momo edia mauri be auka, to Iehova idia lalokau henia bona idia haroro noho. Taihu burukana ta, ia be vabu bona duahiduahi ia diba lasi, to siri ibounai 150 ia laloatao diba. Idia vara hekwakwanai ese ai ia hagoadaia, Basileia ena sivarai ai harorolaia totona, badina unai sibona ese taunimanima edia hekwakwanai do ia haorea. Ai moale bada badina, unai gabu dekenai ai stadi henia taudia ginigunadia be gabeai regula painia, spesel painia, bona elda gaukara idia karaia.

Haiti dekenai ai do noho neganai, tau matamata ta, ladana Trevor lau davaria, ia be Mormon tomadiho ena misinari ta, bona nega haida ia ida Baibel ai herevalaia. Lagani haida murinai, lau dekenai revareva ta ia siaia. Ia gwau: “Lau be inai hebouhebou ai do lau bapatiso! Lau ura Haiti dekenai lau giroa bona guna Mormon misinari gaukara lau karaia gabuna dekenai spesel painia lau karaia.” Bona unai bamona ia karaia, ena adavana ida lagani momo lalonai painia gaukara idia karaia.

EUROPE AMO AI LAO AFRICA

Europe ai, haroro gaukara idia koua ena taravatu haida idia kokia noho dainai, unai gabu dekenai ai idia siaia lao. Lagani 1992 ai, Ljubljana, Slovenia dekenai ai ginidae, egu tama sina be unai gabu kahirakahira idia tubu daekau, bena gabeai Italy dekenai idia lao. Guna idia gwauraia Yugoslavia tano dekenai tuari ia do vara noho. Vienna, Austria, Zagreb, Croatia, Belgrade bona Serbia tadikaka ese unai gabu ena haroro gaukara idia naria. Bona unai tano ta ta ai Betele ia noho be namo.

Unai dainai ai ese gado ma ta ai dibaia be namo. Nega momo unai gabu taudia do idia gwau, “Gado be auka.” Unai be momokani! Bona tadikaka taihu be mai moale ida orea ese ia karaia senisi idia badinaia, unai dainai Iehova ese idia ia hanamoa dalana ai itaia. Danu, Iehova ese hanaihanai nega korikori ai hekwakwanai ia hamaoromaoroa dalana ai itaia. Guna Slovenia dekenai ai noho neganai, gau momo ai dibaia, unai ese ai ia durua ai davaria hekwakwanai ai hanaia totona.

To emai mauri ai gau momo idia idau noho. Lagani 2000 ai, Côte d’Ivoire, West Africa dekenai ai idia siaia lao. Bena November 2002 ai, tuari dainai, Sierra Leone dekenai ai lao. Unuseniai lagani 11 lalonai idia karaia tuari ia doko. Côte d’Ivoire ai rakatania haraga be auka. To, ai dibaia gaudia ese ai ia hagoadaia, ai moale noho totona.

Hereva momokani idia ura dibaia taudia ai haroro henia, bona lagani momo lalonai idia haheauka tadikaka taihu ai laloa bada. Ena be ogogami maurina idia noholaia, to idia dekenai idia noho gaudia be ma haida ida idia haria. Taihu ta be Debbie dekenai dabua ia henia. Matamanai Debbie ia ura lasi abia, to taihu ia gwau: “Tuari ia vara neganai, tadikaka bona taihu ese ai idia durua. Hari be emai nega, heduru ai henia totona.” Bona emai lalona ai hadaia edia haheitalai ai tohotohoa totona.

Gabeai Côte d’Ivoire dekenai ai giroa lou, to politikol karadia dainai dagedage ia vara lou. Unai dainai November 2004 ai, helikopta amo ai idia abia lao, bona ai ta ta be baege tamona sibona ai abia. Ai be French ami idia noho ruma ena foloa dekenai ai mahuta, bona murina dinana ai Switzerland dekenai ai idia abia lao. Hanuaboi ai brens dekenai ai ginidae neganai, Brens Komiti bona Hesiai Gaukara Hadibaia Sikulina edia tisa taudia bona edia adavadia be ai idia welkam henia, idia rosia, aniani bona chocolate momo idia henia. Ai mamia ai idia lalokau henia bada.

Nega sisina lalonai, ai idia siaia lao Ghana bena tuari ia doko dainai Côte d’Ivoire dekenai ai giroa. Tadikaka taihu edia kara namodia ese ai ia durua dainai nega aukadia bona nega kwadogi lalonai ai karaia asainmen idauidau ai haheaukalaia. Lau bona Debbie be emai lalona ai hadaia, Iehova ena orea lalonai tadikaka taihu ese idia hahedinaraia lalokauna ai laloa bada totona. To ai diba, emai mauri ai idia vara hekwakwanai be ai dekenai treinini ia henia.

MIDDLE EAST DEKENAI AI LAO

Lagani 2006 ai, hedikwota ese revareva ta amo ai idia hadibaia Middle East dekenai do ai lao totona. Unai dainai gau matamatadia, mauri dalana, do idia vara hekwakwanai, gado, bona kastom matamata do ai dibaia. Unai tano ai politikol karadia bona tomadiho daladia idauidau dainai hekwakwanai momo idia vara. Kongrigeisen ai idia herevalaia gado idauidau ai ura henia bona tadikaka taihu be orea ena hakaua herevadia idia badinaia dainai lalotamona ai idia noho. Idia momo be mai gari lasi ida edia ruma bese taudia, sikuli turadia, gaukara turadia, bona edia dekena taudia edia dagedage karadia idia haheaukalaia.

Lagani 2012 ai, Tel Aviv, Israel ena spesel hebouhebou dekenai ai lao. Unai spesel hebouhebou be nega ginigunana Iehova ena taunimanima hutuma be nega tamona idia haboua totona. Israela dekenai unai bamona hebou be Pentekoste 33 C.E. ai Dirava ena taunimanima hutuma ese idia karaia. Unai be moale bada negana!

Unai lagani lalodiai, ai idia siaia lao iseda haroro gaukara idia taravatua tanona ta ai vadivadi totona. Iseda pablikeisen haida ai abia lao, haroro gaukara ai karaia, bona hebouhebou maragidia dekenai ai lao. Dala momo ai ami taudia be motuka idia sekea, to mai aonega ida pablisa haida ida ai loaloa.

AFRICA DEKENAI AI GIROA LOU

Lagani 2013 ai, asainmen ta ai abia—Congo ena brens dekenai do ai gaukara totona. Unai gabu be bada herea bona mai ena hairai, to unuseniai guna momo be idia ogogami bona tuari momo idia vara. Matamanai ai gwau, “Africa ai diba bona ai hegaegae vadaeni.” To gau momo ai dibaia be namo, hegeregere bema motuka amo gunika gabudia do ai lao, edia dala be edena bamona. Ena be tadikaka taihu be moni dalanai idia ogogami, to haroro gaukara idia karaia goadagoada, bona idia hekwarahi kongrigeisen heboudia bona hebouhebou badadia dekenai idia lao totona, unai ese ai ia hagoadaia bada. Ai itaia Iehova ena heduru bona emai gaukara ia hanamoa dainai, momo be hereva momokani idia dibaia noho. Congo ai emai hesiai gaukara laganidia lalonai, mai anina bada gaudia ai dibaia, bona ai bamoa tadikaka taihu be emai famili ai idia lao.

Lagani 2017 ena dokonai, asainmen ma ta ai abia, South Africa dekenai ai idia siaia. Unai be brens badana dekenai do ai gaukara, bona idia henia asainmen Betele dekenai be matamata. Momokani, gau momo ai dibaia be namo, to emai asainmen gunadia amo ai dibaia gaudia ese ai idia durua. Lagani daudau lalonai, mai haheauka ida hesiai gaukara idia karaia tadikaka taihu ai lalokau henia. Bona Betele famili be mai lalotamona ida idia gaukara hebou, ena be edia bese bona mauri daladia be idauidau. Iehova ese ena taunimanima dekenai ia henia maino oi itaia diba, badina idia ese edia kara idia hanamoa bona Baibel ena hakaua herevadia idia badinaia.

Lagani momo lalonai, lau bona Debbie be asainmen idauidau ai abia, tano ma haida edia mauri dalana ai noholaia, bona gado matamata momo ai dibaia. Unai negadiai ai hekwarahi, to Iehova ena orea bona tadikaka taihu edia kara dainai, Iehova ena noho hanaihanai lalokauna ai mamia. (Sal. 144:2) Ai abia dae, emai ful-taim hesiai gaukara lalonai ai dibaia gaudia ese ai ia durua, Iehova ena hesiai taudia namodia ai ai lao totona.

Egu tama sina ese lau idia durua dalana, egu lalokau adavana Debbie ena heduru bona tanobada ibounai dekenai idia tadikaka taihu edia haheitalai namodia lau laloa bada. Lau bona egu adavana be vaira nega ai naria lalonai, emai lalona ai hadaia Iehova, ese ia hadibaia gaudia ai dibaia noho totona.