STADI ATIKOL 21
ANE 107 Dirava Ena Lalokau
Edena Dala ai Adavana Namona Oi Tahua Diba
“Daika ese hahine namona ia davaria diba? Iena namo ese korol ia hereaia.”—AON. 31:10.
STADI ENA BADINA
Baibel ena hakaua herevadia ese ta ia durua adavana namona ia abia hidi bona kongrigeisen taudia ese idia ura headava singul taudia idia durua dalana do ita herevalaia.
1-2. (a) Singul Keristani taudia be ta idia do tura henia lasi neganai, dahaka idia laloa guna be namo? (b) “Mero bona kekeni idia hetura” karana ena anina be dahaka? (“Hereva Ena Anina” itaia.)
OI URA headava, a? Ena be headava be moale ia havaraia ena badina lasi, to singul Keristani taudia momo, matamata eiava buruka, be idia ura ta idia adavaia. Oi do headava lasi neganai, namona be Iehova ida emu hetura karana ia goada, sibona oi diba namonamo, bona headava lalonai moni gaukaralaia dalana oi diba be namo.a (1 Kor. 7:36) Bema unai gaudia oi karaia, emu headava do oi moalelaia.
2 To, adavana namona tahua karana be mai ena hekwarahi. (Aon. 31:10) Ena be ta oi tura henia, to ia oi diba namonamo totona be mai ena hekwarahi.b Inai atikol ai do ita itaia, dahaka ese singul Keristani tauna ia durua do ia adavaia tauna ia tahua bona ia tura henia totona. Danu, kongrigeisen taudia ese idia ura headava taudia do idia durua dalana do ita dibaia.
ADAVANA NAMONA TA OI TAHUA DALANA
3. Singul Keristani tauna be adavana ta ia ura tahua neganai, dahaka gaudia ia laloa be namo?
3 Bema oi ura headava, namona be do oi adavaia tauna dekenai, oi ura henia karadia oi tahua, bena ia oi tura henia matamaia. Bema unai oi karaia lasi, do oi adavaia diba tauna do oi tura henia lasi eiava oi ura lasi adavaia tauna do oi tura henia. Oibe, namona be ia bapatiso Keristani tauna ta oi tura henia. (1 Kor. 7:39) To namo lasi oi laloa, idia bapatiso taudia ibounai amo adavana namona ta do oi davaria. Unai dainai sibona oi nanadaia: ‘Egu tahua gaudia be dahaka? Lau ura adavaia tauna dekenai edena kara namodia lau itaia be namo? Lau tahua gaudia be maoro, a?’
4. Haida be adavana ta idia tahua lalonai dahaka idia gurigurilaia?
4 Bema oi ura headava, reana unai oi gurigurilaia vadaeni. (Fili. 4:6) Oibe, Iehova ia gwauhamata lasi ita dekenai adavana ta do ia henia. To emu ura gaudia bona emu hemami ia laloa bada, bona oi ura adavaia tauna oi tahua lalonai oi do ia durua. Unai dainai, Iehova dekenai emu ura gaudia bona emu hemami gwauraia karana oi hadokoa lasi. (Sal. 62:8) Haheauka bona aonega totona oi guriguri. (Iam. 1:5) United States ai, singul tadikaka, John,c be ena guriguri lalonai ia gwauraia gaudia ia herevalaia, ia gwau: “Iehova lau hamaoroa lau ura adavaia tauna amo lau ura henia karadia do lau itaia. Lau guriguri, dala do ia kehoa adavana namona ta lau davaria totona. Danu, lau guriguri adavana namona ai lau lao totona, kara namodia lau hahedinaraia be namo.” Sri Lanka ai, taihu ta Tanya, ia gwau: “Adavana namona lau tahua lalonai, Iehova lau noia ia do lau badinaia bona lau moale noho.” Ena be do oi adavaia tauna oi davaria haraga lasi, to Iehova ia gwauhamata emu dabu gaudia do ia henia bona oi do ia lalokau henia noho.—Sal. 55:22.
5. Edena dala ai, singul Keristani taudia be Iehova idia lalokau henia singul taudia ma haida ida idia hedavari diba? (1 Korinto 15:58) (Laulau itaia danu.)
5 Baibel ese ita ia hagoadaia, ‘Lohiabada ena gaukara idauidau lalonai do ita bisi.’ (1 Korinto 15:58 duahia.) Iehova ena hesiai gaukara lalonai oi bisi bona tadikaka taihu idauidau oi bamoa neganai, unai ese oi do ia hagoadaia, bona dala do ia kehoa oi bamona Iehova ena hesiai gaukara idia atoa guna singul taudia ma haida ida do oi hedavari. Bema Iehova hamoalea totona oi gaukara goada, moale korikorina do oi davaria.
Bema Iehova ena hesiai gaukara lalonai oi bisi bona tadikaka taihu idauidau oi bamoa, reana idia ura headava singul taudia ma haida do oi hedavari henia (Paragraf 5 itaia)
6. Singul Keristani taudia be adavana ta idia tahua lalonai, dahaka idia laloatao be namo?
6 To oi naria namonamo: Namo lasi adavana ta tahua karana be emu mauri ai, mai anina bada gauna ai oi halaoa. (Fili. 1:10) Ena be oi headava eiava singul, to Iehova ida emu hetura karana ia goada neganai, do oi moale bada. (Mat. 5:3) Bema oi do headava lasi, nega bada ia noho emu haroro gaukara oi habadaia totona. (1 Kor. 7:32, 33) Namona be unai nega oi gaukaralaia namonamo. United States ai, taihu Jessica, ena mauri lagani be kahirakahira 40 neganai ia headava, ia gwau: “Ena be lau ura headava, to haroro gaukara lalonai lau bisi dainai, unai ese lau ia durua lalohadai maorona lau abia totona.”
NEGA ATOA TA OI DIBA NAMONAMO TOTONA
7. Ta dekenai emu hemami oi do gwauraia lasi neganai, dahaka dainai ia oi dibaia namonamo be aonega karana? (Aonega Herevadia 13:16)
7 Bema oi laloa ta be adavana namona ai do ia lao be edena bamona? Ia dekenai emu hemami oi gwauraia haraga be namo, a? Baibel ia gwau aonega tauna be mai ena diba ida ia kara. (Aonega Herevadia 13:16 duahia.) Unai dainai, namona be kongrigeisen heboudia eiava moale negadiai, unai tauna ena kara bona ma haida ia kara henia dalana oi itaia. Netherlands ai, tau ta ladana Aschwin ia gwau, “Ta oi ura henia haraga diba, to danu unai hemami do ia boio haraga. Unai dainai, namo lasi ta oi ura henia ena hemami oi abia dainai, ia oi tura henia haraga. To, namona be nega oi atoa ia oi dibaia namonamo guna.” Danu, ta oi dibaia lalonai, reana do oi laloparara ia be emu adavana namona ai do ia lao lasi.
8. Edena dala ai singul tauna be turana namona ta ia tahua diba? (Laulau itaia danu.)
8 Edena dala ai mai aonega ida ta do oi dibaia namonamo? Kongrigeisen heboudia eiava moale negadiai ta ena hetura karana Iehova ida bona ena kara do oi itaia. Ena turadia be daika, bona dahaka gaudia ia herevalaia? (Luka 6:45) Ena tahua gaudia be emu tahua gaudia ida idia hegeregere, a? Iena kongrigeisen lalonai idia noho elda taudia eiava ia idia diba namonamo lo Keristani taudia oi nanadaia diba. (Aon. 20:18) Reana idia oi nanadaia ia be edena bamona tauna. (Ruta 2:11) Unai tauna oi dibaia noho lalonai, namo lasi oi karaia gaudia amo ena hemami oi hadikaia. To namona be ena hemami oi matauraia, bona namo lasi nega ibounai ia noho gabudiai oi noho, eiava oi ura ia totona gau ibounai oi dibaia.
Ta dekenai emu hemami oi do gwauraia lasi neganai, namona be ena kara oi diba namonamo guna (Paragraf 7-8 itaia)
9. Ta oi do tura henia lasi neganai, dahaka oi abia dae be namo?
9 Ta dekenai emu hemami oi do gwauraia lasi neganai, ia do oi dibaia noho ela bona edena nega? Bema ta dekenai emu hemami oi gwauraia haraga, reana do ia mamia oi laloa namonamo lasi, bona abia hidi oi karaia. (Aon. 29:20) Bema ma ta ia laloparara ia oi ura henia, to nega daudau lalonai emu hemami oi gwauraia lasi, do ia laloa oi daradara abia hidi ta oi karaia totona. (Had. 11:4) Laloatao, ta dekenai emu hemami oi do gwauraia lasi neganai, namo lasi oi laloa ia do oi adavaia. To namona be oi abia dae, oi hegeregere oi headava totona bona unai tauna be emu adavana namona ai ia lao diba.
10. Dahaka do oi karaia bema oi diba ta be oi ia ura henia, to oi ura lasi ia oi tura henia?
10 Bema oi laloparara ta be oi ia ura henia, dahaka do oi karaia? Bema oi ura lasi ia oi tura henia, namona be emu kara amo unai oi hahedinaraia. Hegeregere, namo lasi oi karaia gaudia dainai do ia laloa, oi ura ia oi tura henia.—1 Kor. 10:24; Efe. 4:25.
11. Bema oi be ta totona adavana eiava turana ta do oi tahua, dahaka gaudia oi laloa be namo?
11 Tano haida ai, tama sina eiava ma haida be edia singul varavara totona adavana ta idia abia hidi. Bona tano ma haida ai, famili eiava turadia be singul tauna totona turana ta idia tahua, bona dala do idia karaia unai taudia rua idia hedavari, bena do idia itaia bema idia hetura diba. Bema oi idia noia ta ena turana eiava adavana ta oi abia hidi, namona be tau bona hahine edia ura gaudia oi laloa. Bema oi laloa ta be emu turana eiava varavara ena adavana namona ai do ia lao, namona be unai tauna oi diba namonamo bona mai anina bada gauna be oi itaia, bema Iehova ida ena hetura karana ia goada. Iehova tura henia karana ese moni, edukeisen, eiava ladana bada abia karana ia hereaia. To laloatao, namona be singul tadikaka eiava taihu ese abia hidi ia karaia bema do ia headava eiava lasi.—Gal. 6:5.
EDENA DALA AI TA DO OI TURA HENIA MATAMAIA
12. Bema oi ura ta oi tura henia, edena dala ai emu hemami do oi gwauraia?
12 Bema oi ura ta oi tura henia matamaia, edena dala ai emu hemami oi gwauraia diba?d Dala oi karaia diba, pablik gabuna ta ai eiava telefon amo umui herevahereva totona. Namona be oi hamaoroa ia oi ura henia bona oi ura ia oi dibaia namonamo. (1 Kor. 14:9) Bema hegeregere, ia dekenai nega oi henia, ena haere do ia laloa totona. (Aon. 15:28) Bona bema unai tauna ia ura lasi, ena hemami oi matauraia.
13. Dahaka do oi karaia bema ta be oi ia ura henia? (Kolose 4:6)
13 To bema ta be oi dekenai ena hemami ia gwauraia be edena bamona? Namona be oi kara namo henia bona matauraia, badina mai boga auka ida oi dekenai ena hemami ia gwauraia. (Kolose 4:6 duahia.) Bema oi laloa nega do oi atoa unai hetura karana do oi laloa totona, namona be unai oi gwauraia. To, emu haere oi henia haraga be namo. (Aon. 13:12) Bema oi ura lasi, namona be mai hemataurai ida unai ena badina oi herevalaia. Austria ai tadikaka ta, Hans, be taihu ta ese ia dekenai ena hemami ia gwauraia neganai, ia gwau: “Mai aonega ida ia dekenai lau karaia abia hidi lau herevalaia. Egu haere lau henia haraga, badina lau ura lasi do ia naria bona ia laloa ia do lau tura henia. Unai dainai, gabeai egu hereva bona kara lau naria namonamo, unai amo do ia laloa lasi egu lalona lau haidaua.” To bema oi ia ura henia tauna do oi tura henia, namona be umui ruaosi ese emui hetura karana lalonai do umui karaia gaudia umui herevalaia. Reana emui kastom eiava badina ma haida dainai emui ura gaudia be idauidau.
EDENA DALA AI HAIDA ESE SINGUL KERISTANI TAUDIA IDIA DURUA DIBA?
14. Edena dala ai iseda hereva amo singul Keristani taudia ita hagoadaia diba?
14 Edena dala ai, idia ura headava singul Keristani taudia ita durua diba? Dala ta be iseda hereva karana ita naria namonamo. (Efe. 4:29) Sibona ita nanadaia diba: ‘Lau be singul taudia lau hauraia idia headava totona, a? Lau itaia singul tadikaka bona taihu ta idia herevahereva neganai, do lau gwau idia be ta ta idia ura henia, a?’ (1 Tim. 5:13) Danu, namo lasi iseda hereva bona kara dainai singul Keristani taudia idia mamia idia be anina lasi. Matamanai ita herevalaia tadikaka, Hans, ia gwau: “Tadikaka haida idia gwau, ‘Oi headava be namo, oi hegeregere vadaeni.’ Unai bamona hereva ese singul taudia ia hahisia bona idia mamia reana idia headava be namo.” To namona be dala idauidau ita tahua, singul Keristani taudia ita hanamoa totona!—1 Tes. 5:11.
15. (a) Ta ita durua adavana ta ia tahua totona, dahaka gaudia ita laloa guna be namo? (Roma 15:2) (Laulau itaia danu.) (b) Vidio amo dahaka mai anina bada gaudia oi dibaia?
15 To bema ita laloa, ita dibaia tadikaka bona taihu ta be headava tau bona hahine namona ai idia lao diba be edena bamona? Baibel ese ita ia hadibaia ma haida edia hemami ita laloa totona. (Roma 15:2 duahia.) Singul taudia momo idia ura lasi ma haida ese dala idia karaia ta idia tura henia totona, bona edia ura ita matauraia be namo. (2 Tes. 3:11) Haida be reana idia ura idia ita durua, to namo lasi unai ita karaia bema ita idia nanadaia lasi.e (Aon. 3:27) Singul taudia haida be unai dala idia ura henia lasi. Germany ai, singul taihu ta Lydia, ia gwau: “Grup badana ta ai singul tadikaka bona taihu ta oi boiria diba. Bona dala oi karaia idia ruaosi idia hedavari totona, to namona be idia sibona ese idia ura karaia gaudia idia abia hidi.”
Grup badana ai hebamo karana ese dala ia kehoa singul Keristani taudia idia hedavari totona (Paragraf 15 itaia)
16. Singul Keristani taudia ese dahaka idia laloatao be namo?
16 Ita ibounai, ena be singul eiava headava taudia, to iseda mauri ita moalelaia diba! (Sal. 128:1) Unai dainai bema oi ura headava, to ta oi do davaria lasi, namona be Iehova ena hesiai gaukara lalonai oi bisi. Macao ai, taihu ta, Sin Yi ia gwau: “Paradaiso ai emu adavana ida do oi moalelaia negadia oi laloa neganai, hari oi noholaia singul maurina be nega kwadogina sibona. Inai nega oi moalelaia bona oi gaukaralaia namonamo.” To bema turana ta oi davaria bona umui hebamo noho be edena bamona? Atikol 22 ai, ta oi tura henia neganai abia hidi namona do oi karaia dalana do ita herevalaia.
ANE 137 Abidadama Keristani Taihudia
a Bema oi ura diba headava totona oi hegaegae eiava lasi, jw.org ai atikol ladana “Dating—Part 1: Am I Ready to Date?” itaia.
b HEREVA ENA ANINA: Inai atikol bona atikol 22 ai, “mero bona kekeni idia hetura” ena anina be ta ta do idia dibaia namonamo, unai amo idia itaia bema idia be adavana namona ai idia lao diba. Tano haida ai unai hereva ena anina ma haida be, deit, ta diba namonamo karana eiava hebamo karana. Mero bona kekeni be ta ta idia ura henia neganai, edia hetura karana idia hamatamaia, bona idia hetura noho ela bona abia hidi idia karaia do idia headava eiava edia hetura karana do idia hadokoa.
c Ladana haida idia haidaua.
d Gabu haida ai, tadikaka ese taihu ia nanadaia, bema idia hetura diba. To, taihu ese tadikaka ia nanadaia danu be kerere lasi. (Ruta 3:1-13) Diba ma haida abia totona, October 22, 2004 Awake! Ena atikol ladana, “Young People Ask . . . How Can I Tell Him How I Feel?” itaia.
e Iseda websait, jw.org ai, vidio ladana Abidadama Gimaia Totona Idia Kwalimu Taudia—Singul Keristani Taudia itaia.