Laloatao Iehova be “Mauri Diravana”

1. Dahaka ese Iehova ena taunimanima ia durua, hekwakwanai lalonai ia idia tomadiho henia noho totona?

BAIBEL ia gwau, ita be nega aukadia lalonai ita noho. (2 Tim. 3:1) Inai nega oromana ai, taunimanima ibounai ese idia davaria hekwakwanai be Iehova ena taunimanima ese idia davaria. Bona Iehova ita hesiai henia dainai, dagedage ita davaria danu. Ena be unai hekwakwanai ita davaria, to dahaka ese ita ia durua, Iehova ita tomadiho henia noho totona? Badina badana ta be Iehova ese ita ia durua dalana ita itaia, bona ita diba Ia be “mauri Diravana.”—Ier. 10:10; 2 Tim. 1:12.

2. Edena dala ai Iehova be mauri Diravana?

² Iehova be ita davaria hekwakwanai ibounai ia itaia, bona hanaihanai ia ura ita ia durua. (2 Siv. 16:9; Sal. 23:4) Bema ita laloatao Dirava be ita ia laloa bada bona hanaihanai ia noho hegaegae ita ia durua, unai ese ita do ia hagoadaia hekwakwanai ita haheaukalaia totona. King Davida dekenai unai ia vara dalana mani ita herevalaia.

3. Davida ia gwau “Iehova be ia mauri noho,” unai ena anina be dahaka?

³ Davida be Iehova ia diba bona Ia dekenai ia tabekau. King Saulo bona ma haida idia ura ia idia hamasea neganai, Davida be Iehova ena heduru totona ia guriguri. (Sal. 18:6) Dirava ese ena guriguri ia haerelaia bona ia hamauria neganai, Davida ia gwau: “Iehova be ia mauri noho!” (Sal. 18:46) Davida ena hereva anina be dahaka? Buka ta ia gwau, Davida ena hereva anina be Iehova be Dirava momokanina bona hanaihanai ia ura ena hesiai taudia ia durua. Oibe, Davida ia diba ia dekenai idia vara gaudia be Dirava ese ia itaia bona ia hegaegae do ia durua totona. Unai ese Davida ia hagoadaia Iehova ia hesiai henia bona hanamoa.—Sal. 18:28, 29, 49.

4. Ita abia dae Iehova be mauri Diravana dainai, edena dala ai unai ese ita ia durua?

⁴ Ita abia dae Iehova be mauri Diravana, unai ese ita ia durua mai ura ida ia ita hesiai henia totona. Unai ese goada do ia henia hekwakwanai ita haheaukalaia bona iena hesiai gaukara do ita karaia noho. Danu, iseda lalona do ita hadaia Iehova kahirakahira ita noho totona.

MAURI DIRAVANA ESE OI DO IA HAGOADAIA

5. Hekwakwanai ita davaria neganai, dahaka ese ita do ia durua? (Filipi 4:13)

⁵ Bema ita laloatao, Iehova be ia mauri noho bona hanaihanai ita ia durua, hekwakwanai badadia eiava maragidia ita haheaukalaia diba. Iehova be ita davaria hekwakwanai idauidau amo ita do ia durua. Ia be Siahu Ibounai Diravana, bona ita dekenai siahu do ia henia, ita haheauka totona. (Filipi 4:13 duahia.) Unai dainai ita diba momokani, hekwakwanai negadiai do ita haheauka. Bona hekwakwanai maragidia ai Iehova ese ita ia durua neganai, ita abia dae hekwakwanai badadia ai ita do ia durua danu.

6. Edena dala ai Davida ia mero matamata neganai, Iehova dekenai ena abidadama ia hagoadaia?

⁶ Mani Davida ese Iehova dekenai ena abidadama ia hagoadaia daladia rua ita herevalaia. Davida be mero matamata bona mamoe ia naria neganai, bea ta bona laiona ta ese ena tamana ena mamoe idia abia lao. Unai nega rua ai, Davida be mai gari lasi ida unai animal ia luludia bona mamoe ia hamauridia. To, Davida ia laloa lasi ia sibona ese unai ia karaia. Ia diba Iehova ese siahu ia henia dainai ia kwalimu. (1 Sam. 17:34-37) Davida ese idia vara gaudia ia laloaboio lasi. Unai ia laloa dobu neganai, ia diba momokani mauri Diravana ese vaira nega ai ia do ia durua.

7. Davida be dahaka ia laloa, bona dahaka dainai unai ese ia durua Goliata ia tuari henia totona?

⁷ Gabeai, Davida be reana ia do mero matamata lalonai, Israela taudia edia tuari kamepa ia vadivadi henia, ena kakadia be unuseniai hesiai gaukara idia karaia. Bona ia itaia tuari taudia be idia gari dikadika, badina Filistia ena tau badana ta ladana, Goliata ia mai bona ‘Israela ena tuari taudia ia kirikirilaia.’ (1 Sam. 17:10, 11) Tuari taudia idia gari, badina Goliata be tau badana bona ia gwauraia herevadia idia laloa. (1 Sam. 17:24, 25) To Davida be gau ta ia laloa. Ia diba Goliata be Israela ena tuari taudia ia hevasehalaia neganai, ia be “mauri Diravana” ia gwauraia dika. (1 Sam. 17:26) Davida be Iehova ia laloa. Ia abia dae guna mamoe ia naria neganai, ia durua Diravana be ia do ia durua lou. Momokani, Dirava ese Davida ia durua dainai, Goliata ia tuari henia bona ia kwalimu!—1 Sam. 17:45-51.

8. Dahaka dainai ita abia dae momokani hekwakwanai negadiai Iehova ese ita do ia durua? (Laulau itaia danu.)

⁸ Ita danu hekwakwanai ita haheaukalaia diba, bema ita laloatao Mauri Diravana be ia noho hegaegae ita ia durua totona. (Sal. 118:6) Iehova ese idaunegai ia karaia gaudia ita laloa neganai, unai ese iseda abidadama ia dekenai do ia hagoadaia. Baibel ai Iehova ese iena hesiai taudia ia hamauria sivaraidia oi duahia. (Isa. 37:17, 33-37) Danu, iseda websait jw.org ai, Iehova ese hari inai negai iseda tadikaka taihu ia durua dalana oi duahia eiava itaia. Danu, Iehova ese oi ia durua negadia oi laloa lou. Reana oi mamia Iehova ese oi totona gau namona ta ia karaia lasi, hegeregere laiona bona bea amo oi ia hamauria lasi. To momokani, Iehova ese emu mauri ai gau momo ia karaia! Ia ese oi ia boiria ena turana ai oi lao totona. (Ioa. 6:44) Hari danu, oi ia durua dainai hereva momokani lalonai oi do noho. Unai dainai, Iehova oi noia emu guriguri ia haerelaia negadia oi laloatao totona, hegeregere nega maorona ai emu ura gauna ia henia eiava hekwakwanai negadiai oi ia naria. Unai bamona ekspiriens oi laloa lou neganai, do oi abia dae momokani, Iehova be oi do ia durua noho.

9. Hekwakwanai ita davaria neganai dahaka ita laloatao be namo? (Aonega Herevadia 27:11)

⁹ Bema Iehova be tau korikorina ta bamona ita laloa, unai ese ita do ia durua ita davaria hekwakwanai dekenai lalohadai maorona ita abia totona. Hekwakwanai ita davaria neganai namona be mai anina bada gaudia ita laloa. Diabolo ia gwau hekwakwanai ita davaria neganai, Iehova do ita rakatania. Unai dainai, hekwakwanai negadiai ita karaia abia hidi ese Iehova do ia hamoalea eiava hahisia. (Iobu 1:10, 11; Aonega Herevadia 27:11 duahia.) Ena be hekwakwanai ita davaria to Iehova ita badinaia neganai, ita hahedinaraia ia ita lalokau henia bona ita hamomokania Diabolo be koikoi tauna. Reana oi noho gabuna ai gavamani ese Iehova ena taunimanima idia dagedage henia, moni ena hekwakwanai oi davaria, oi haroro henia taudia be sivarai namona idia ura henia lasi, eiava dala ma haida ai hisihisi oi davaria noho. Bema oi dekenai unai idia vara, laloatao unai be nega namona Iehova ena kudouna oi hamoalea totona. Danu laloatao, Iehova ese oi do ia rakatania lasi emui goada ia hereaia hekwakwanai oi davaria totona. (1 Kor. 10:13) Ia ese oi dekenai goada do ia henia oi haheauka totona.

MAURI DIRAVANA ESE DAVANA NAMONA DO IA HENIA

10. Mauri Diravana be ia idia tomadiho henia taudia totona dahaka do ia karaia?

¹⁰ Iehova be hanaihanai ia idia tomadiho henia taudia dekenai davana namona ia henia. (Heb. 11:6) Hari ia ese maino bona iseda ura gaudia ia henia bona vaira negai mauri hanaihanai do ia henia. Ita abia dae momokani Iehova ia ura ita dekenai davana namona ia henia. Bona ia be mai ena siahu unai ia karaia totona. Unai dainai, mai kudouna ibounai ida Iehova ita tomadiho henia, idaunegai ena hesiai taudia idia karaia bamona. Bona Timoteo danu be unai ia karaia.—Heb. 6:10-12.

11. Dahaka dainai Timoteo be kongrigeisen ai ia gaukara goada? (1 Timoteo 4:10)

¹¹ Timoteo Iharuana 4:10 duahia. Timoteo ia abidadama Dirava ese ia dekenai davana namona do ia henia. Unai dainai, Iehova bona ma haida totona ia gaukara goada. Edena dala ai? Aposetolo Paulo ese ia hagoadaia, haroro gaukara bona kongrigeisen ai hadibaia tauna namona ai ia lao totona. Danu, ia hamaoroa matamata taudia bona buruka taudia dekenai haheitalai namona do ia hahedinaraia. Bona ia dekenai gaukara badadia haida idia henia, hegeregere tadikaka taihu dekenai sisiba do ia henia. (1 Tim. 4:11-16; 2 Tim. 4:1-5) Nega haida Timoteo ese ia karaia gaukara be haida ese idia itaia lasi eiava laloa bada lasi, to ia diba Iehova ese ia dekenai davana namona do ia henia.—Roma 2:6, 7.

12. Dahaka dainai elda taudia be kongrigeisen ai idia gaukara goada? (Laulau itaia danu.)

¹² Hari, namona be Elda taudia idia diba, Iehova be edia gaukara namona ia itaia bona laloa bada. Elda taudia be mamoe vadivadi, hadibaia gaukara, bona haroro gaukara idia durua, to unai sibona lasi, idia haida be konstraksen gaukara bona disasta idia vara neganai heduru idia henia danu. Haida be Gorere Taudia Vadivadi Henia Grup eiava Hospital Liesen Komiti idia durua. Elda taudia idia diba kongrigeisen ena biaguna be Iehova, to taunimanima lasi. Unai dainai, kongrigeisen ai idia gaukara goada bona idia abia dae momokani Dirava ese idia dekenai davana namona do ia henia.—Kol. 3:23, 24.

13. Iehova totona ita karaia gaudia be edena bamona ia laloa?

¹³ Haida sibona be elda gaukara idia karaia. To ita ibounai ese Iehova dekenai gau ta ita henia diba. Mai kudouna ibounai ida ia ita hesiai henia neganai ia moale bada. Tanobada ibounai gaukarana durua totona, ita atoa kontribiusen ia itaia, ena be moni sisina ita atoa. Hebou dekenai haere henia totona ita hemarai, to imana ita abia isi neganai, Ia moale bada. Bona ita idia habadua taudia edia dika ita gwauatao neganai ia moale. Ena be oi mamia Iehova totona gau momo oi karaia lasi, to namona be oi abia dae oi karaia gaudia ia laloa bada. Ia be oi ia lalokau henia, bona oi dekenai davana namona do ia henia.—Luka 21:1-4.

MAURI DIRAVANA KAHIRAKAHIRA OI NOHO

14. Edena dala ai Iehova kahirakahira ita noho karana ese ita do ia durua, ia ita abidadama henia totona? (Laulau itaia danu.)

¹⁴ Bema Iehova ida iseda hetura karana ia goada, do ia auka lasi ia ita abidadama henia noho totona. Iosepa dekenai unai ia vara. Ia be mai gari lasi ida matabodaga karana ia dadaraia. Ia dekenai Dirava be taunimanima korikorina ta bamona ia laloa bona ia ura lasi ena lalona ia hahisia. (Gen. 39:9) Iehova ida iseda hetura karana ia goada totona, namona be nega ita atoa ia ita guriguri henia bona iena Hereva ita stadilaia. Iosepa bamona Iehova ida iseda hetura karana ia goada neganai, do ita ura lasi gau ta ita karaia iena lalona ita hahisia totona.—Iam. 4:8.

15. Israela taudia dekenai ia vara gauna amo dahaka ita dibaia? (Heberu 3:12)

¹⁵ Bema haida idia laloaboio Iehova be mauri Diravana, do ia auka lasi ia idia rakatania totona. Taunimanima idia noho lasi gabuna ai, Israela taudia dekenai ia vara gauna mani ita laloa. Idia diba Iehova ia noho, to idia daradara bema edia dabu gaudia do ia henia. Bona idia henanadai: “Iehova be iseda huanai ia noho eiava lasi?” (Eso. 17:2, 7) Unai dainai, Dirava idia gwau-edeede henia. Momokani, ita ura lasi edia haheitalai dikana ita tohotohoa.—Heberu 3:12 duahia.

16. Dahaka ese iseda abidadama karana do ia tohoa?

¹⁶ Inai tanobada ai idia vara gaudia dainai, Dirava kahirakahira ita noho karana be mai ena hekwarahi. Momo idia abia dae lasi Dirava ia noho. Nega momo, Dirava ena ura idia dadaraia taudia be mauri namona idia noholaia. Unai ita itaia neganai, iseda abidadama ia tohoa diba. Ena be ita abia dae Dirava ia noho, to reana do ita daradara bema ita do ia durua eiava lasi. Salamo 73 ia torea tauna be nega ta unai bamona ia mamia. Ia itaia ena be haida ese Dirava ena taravatu idia dadaraia, to edia mauri idia moalelaia. Unai dainai ia daradara, bema Dirava hesiai henia karana be mai anina bada eiava lasi.—Sal. 73:11-13.

17. Dahaka ese ita do ia durua Iehova kahirakahira ita noho totona?

¹⁷ Dahaka ese salamo torea tauna ia durua ena lalohadai ia haidaua totona? Iehova abidadama henia karana idia hadokoa taudia dekenai do ia vara gauna ia laloa dobu. (Sal. 73:18, 19, 27) Danu, Dirava hesiai henia karana amo idia mai hahenamo ia laloa. (Sal. 73:24) Ita danu, namona be Iehova ese ita dekenai ia henia vadaeni hahenamo idauidau ita laloa. Bona bema Iehova ita hesiai henia lasi, iseda mauri do ia idau dalana ita laloa. Unai bamona ita karaia neganai, iseda abidadama do ia goada bona salamo torea tauna bamona do ita gwau: “Lau dekenai Dirava kahirakahira lao karana be namo.”—Sal. 73:28.

18. Dahaka dainai mai abidadama ida vaira negana ita naria?

¹⁸ Inai dina gabediai, ita davaria hekwakwanai ita haheaukalaia diba, badina ita be “ia mauri noho Dirava momokanina ena hesiai taudia.” (1 Tes. 1:9) Iseda Dirava be ita ia laloa bada bona hanaihanai ita do ia durua. Idaunegai ia hamomokania iena hesiai taudia ida ia noho, bona hari ita ida ia noho danu. Kahirakahira inai tanobada ai hisihisi badana do ia vara, to ita be sibona lasi badina Iehova be ita ida do ia noho. (Isa. 41:10) Unai dainai, ita ibounai be “mai lalogoada ida do ita gwau: ‘Iehova be egu durua tauna, lau be do lau gari lasi.’”—Heb. 13:5, 6.