Dahaka Dainai Tuari Bona Dagedage Karadia Idia Do Vara Noho?

KARA DIKA

Dirava be iena toana hegeregerena iseda tama sina ginigunadia, Adamu bona Heva ia karaia. (Genese 1:27) Unai dainai idia ese Dirava ena kara namodia hegeregere maino bona lalokau idia tohotohoa diba. (1 Korinto 14:33; 1 Ioane 4:8) To Dirava idia kamonai henia lasi bona idia kara dika. Unai badina dainai idia amo kara dika bona mase ita abia. (Roma 5:12) Danu, unai ese ita ia veria dagedage lalohadai bona karadia ita karaia totona.—Genese 6:5; Mareko 7:​21, 22.

TAUNIMANIMA EDIA GAVAMANI

Dirava ese taunimanima ia karaia lasi sibona idia lohiaia totona. Baibel ia gwau: “Tau ta be ia hegeregere lasi sibona ia hakaua totona.” (Ieremia 10:23) Unai dainai, taunimanima edia gavamani ese tuari bona dagedage karadia idia haorea diba lasi.

SATANI BONA ENA DEMONI

Baibel ia gwau: “Ita diba ita be Dirava amo, to tanobada ibounai be Dika Tauna ena siahu lalonai ia noho.” (1 Ioane 5:19) Unai “dika tauna” idia gwauraia Satani Diabolo, bona ia be ala-ala tauna. (Ioane 8:44) Satani bona ena demoni ese taunimanima idia hakaua tuari bona dagedage karadia idia havaraia totona.—Apokalupo 12:​9, 12.