Tuari Bona Dagedage Do Idia Ore Dalana

DIRAVA ESE TAUNIMANIMA EDIA GAVAMANI DO IA HAOREA

Baibel ia gwau Dirava ese Aramagedonoa tuarina amo taunimanima edia gavamani do ia haorea. (Apokalupo 16:16) Unai nega ai, “tanobada ibounai edia king taudia” be do idia haboua “Siahu Ibounai Diravana ena dina badana ena tuari totona.” (Apokalupo 16:14) Aramagedono be tanobada ai do ia vara tuari ginigabena.

Dirava ese tanobada gavamani ibounai do ia kokia murinai, ena Basileia eiava gavamani sibona be guba amo tanobada ibounai do ia lohiaia. Bona ta ese ia hadikaia diba lasi. (Daniela 2:44) Dirava ese iena Natuna Iesu Keriso ia abia hidi, ia be unai Basileia ena King. (Isaia 9:​6, 7; Mataio 28:18) Iesu ese iena murinai idia raka taudia ia hadibaia unai Basileiab totona do idia guriguri. (Mataio 6:​9, 10) Iesu ena lohia henunai taunimanima ibounai be mai lalotamona ida do idia noho.

Iesu be tanobada ena lohia taudia bamona lasi, sibona ena namo totona ena siahu do ia gaukaralaia lasi. Iesu be maka tamona ai taunimanima ibounai do ia kara henia. Unai dainai do idia lalohekwarahi lasi ena be edia kopina kala, bese, kastom o iduhu be idau. (Isaia 11:​3, 4) Bona taunimanima be sibona edia maoro totona do idia heatu eiava tuari lasi. Badina Iesu ese taunimanima ta ta edia namo do ia laloa bada. “Ia ese heduru totona idia noinoi ogogami taudia do ia hamauria, ladana maragi taudia bona heduru idia abia lasi taudia do ia hamauria danu. . . . Ia ese hisihisi bona dagedage karadia amo idia do ia hamauria.”—Salamo 72:​12-14.

Dirava ena Basileia ese taunimanima edia mauri hadikaia tuari kohudia do ia hadikaia ore. (Mika 4:3) Danu tuari idia ura lasi hadokoa o ma haida edia maino idia hadikaia kara dika taudia do ia kokia. (Salamo 37:​9, 10) Tatau, hahine taudia bona natudia be edia gabu dekenai do idia noho namonamo.—Esekiela 34:28.

Dirava ena gavamani henunai, taunimanima be mauri namona do idia moalelaia. Unai gavamani ese ogogami maurina, hitolo, bona ruma ena hekwakwanai do ia haorea. Taunimanima ibounai ese tauanina durua aniani namodia momo herea do idia abia bona mai moale ida gabu namona ai do idia noho.—Salamo 72:16; Isaia 65:​21-23.

Dirava ena Basileia henunai, tuari ese ia havaraia hisihisi be do idia ore. Danu tauanina ai idia abia bero sibona lasi, to tuari ese idia dekenai ia havaraia lalohisihisi bona hemami dikana danu do idia ore. Bona idia mase taudia be tanobada ai do idia toreisi lou. (Isaia 25:8; 26:19; 35:​5, 6) Famili be do idia noho hebou bona tuari ese ia havaraia memori dikadia be do idia ore. Unai “gau gunadia be idia ore vadaeni.”—Apokalupo 21:4.

DIRAVA ESE KARA DIKA DO IA HAOREA

Dirava ena Basileia ese tanobada ia lohiaia neganai, taunimanima ibounai be lalotamona ai “lalokau bona maino Diravana” momokanina Iehovacdo idia tomadiho henia. (2 Korinto 13:11) Taunimanima be maino ai do idia noho dalana do idia dibaia. (Isaia 2:​3, 4; 11:9) Idia dibaia gaudia idia badinaia taudia be Dirava ese kara dika ena igui amo do ia ruhaia.—Roma 8:​20, 21.

DIRAVA ESE SATANI BONA DEMONI DO IA HAOREA

Dirava ena Basileia ese Satani bona ena demoni do ia haorea, badina taunimanima idia hakaua tuari idia havaraia totona. (Apokalupo 20:​1-3, 10) Satani bona ena demoni idia noho lasi dainai, tanobada ena gabu ibounai dekenai maino do ia noho.—Salamo 72:7.

Dirava ia gwauhamata ia ura tuari bona dagedage karadia do ia haorea momokani. Dirava ita abidadama henia badina Ia be mai ena diba bona siahu tuari ia haorea totona.

• Dirava be mai ena aonega bona siahu tuari bona dagedage karadia ia haorea totona. (Iobu 9:4) Unai ia hagugurua totona gau ta ese ia do ia koua lasi.—Iobu 42:2.

• Dirava ia ura lasi taunimanima idia hisihisi. (Isaia 63:9) Danu “dagedage karadia ia ura henia tauna ia badu henia.”—Salamo 11:5.

• Dirava be ena hereva ia hamomokania hanaihanai, Ia koikoi diba lasi.—Isaia 55:​10, 11; Tito 1:2.