STADI ATIKOL 20
ANE 7 Iehova be Iseda Goada
Iehova ese Lalogoada Ia Henia
“Dirava . . . do ita hanamoa. Ia be hebogahisi Tamana bona lalogoada ibounai ia henia Diravana.”—2 KOR. 1:3.
STADI ENA BADINA
Iehova ese Babulonia ai idia noho Iuda taudia ia hagoadaia dalana amo gau haida do ita dibaia.
1. Iuda taudia be Babulonia ai idia noho neganai, mauri be edena bamona?
LAGANI momo lalonai, Iuda taudia be Iehova idia gwau-edeede henia loulou. Unai dainai, Babulonia taudia ese Iuda taudia edia hanua idia hadikaia bona igui hesiai taudia bamona idia abia lao neganai, Iehova ese ia koua lasi. Babulonia ai idia noho neganai, edia mauri be edena bamona? (2 Siv. 36:15, 16, 20, 21) Idia be dina ta ta ai idia karaia gaudia idia karaia diba. (Ier. 29:4-7) To, mauri be ia auka bona edia noho dalana idia ura henia lasi. Unai dainai edia hemami be edena bamona? Idia ta be inai bamona ia gwau: “Babulonia ena sinavai badinai ai helai. Siona ai laloatao neganai, ai taitai.” (Sal. 137:1) Iuda taudia idia ura ta ese idia ia hagoadaia, to daika ese unai do ia karaia?
2-3. (a) Iehova ese Iuda taudia totona dahaka ia karaia? (b) Inai atikol ai dahaka do ita herevalaia?
2 Iehova be “lalogoada ibounai ia henia Diravana.” (2 Kor. 1:3) Iehova be ena hesiai taudia ibounai ia lalokau henia bona ia ura idia ia hagoadaia. Iehova ia diba Babulonia ai idia noho Iuda taudia haida be ena sisiba do idia abia dae bona ia dekenai do idia giroa lou. (Isa. 59:20) Lagani handred momo gunanai, Iuda taudia be Babulonia dekenai idia do abia lao lasi neganai, peroveta tauna Isaia be Iehova ena siahu amo Isaia bukana ia torea. Dahaka dainai? Isaia ia gwau: “Emui Dirava ia gwau: ‘Egu taunimanima umui hagoadaia.’” (Isa. 40:1) Oibe, Isaia bukana amo Iehova ese Iuda taudia do ia hagoadaia.
3 Babulonia ai idia noho Iuda taudia bamona, ita danu be dina ta ta ai heduru ita abia be namo. Inai atikol ai, Iehova ese Iuda taudia ia hagoadaia daladia toi do ita herevalaia: (1) Ia gwauhamata idia helalo-kerehai taudia edia dika do ia gwauatao, (2) ena taunimanima dekenai helaro ia henia, bona (3) idia ia durua idia gari lasi totona. Unai point ta ta ita herevalaia neganai, Iehova ena hagoadaia herevadia ese ita ia durua dalana ita laloa.
IEHOVA BE MAI HEBOGAHISI IDA ISEDA DIKA IA GWAUATAO
4. Edena dala ai Iehova ia hahedinaraia ia be hebogahisi Diravana? (Isaia 55:7)
4 Iehova be “hebogahisi Tamana.” (2 Kor. 1:3) Bona ia ese unai kara ia hahedinaraia, idia helalo-kerehai Iuda taudia edia dika ia gwauatao totona. (Isaia 55:7 duahia.) Ia gwau: “Egu lalokau dainai oi do lau hebogahisi henia.” (Isa. 54:8) Edena dala ai Iehova ese ena hebogahisi do ia hahedinaraia? Ena be Iuda taudia be edia gwau-edeede karana dainai, Babulonia ai lagani momo idia noho, to Iehova ia gwauhamata unuseniai do idia noho hanaihanai lasi. (Isa. 40:2) Unai hereva ese idia helalo-kerehai Iuda taudia ia hagoadaia!
5. Dahaka dainai ita abia dae momokani Iehova be iseda dika ia gwauatao?
5 Dahaka ita dibaia? Iehova ia ura ena hesiai taudia edia kara dika ia gwauatao momokani. Hari, badina momo dainai ita abia dae Iehova ese iseda kara dika do ia gwauatao, Iuda igui hesiai taudia bamona lasi. Dahaka dainai? Badina Iehova ese iseda dika ia gwauatao totona ia karaia gauna ita diba. Isaia ia peroveta bona lagani handred momo idia ore murinai, Iehova ese ena lalokau Natuna ia siaia mai bona idia helalo-kerehai taudia totona mauri davana ia henia. Unai boubou gauna ese iseda “kara dika do ia kokia” momokani. (Kara 3:19; Isa. 1:18; Efe. 1:7) Oibe, Iehova be dika ia gwauatao Diravana!
6. Dahaka dainai Iehova ena dika gwauatao karana ese ita ia hagoadaia? (Laulau itaia danu.)
6 Bema iseda kara dika dainai ita lalohisihisi, Isaia 55:7 ai, Iehova ena hereva ese ita do ia hagoadaia. Ena be ita haida be ita helalo-kerehai vadaeni, to iseda kara dika gunadia dainai ita do lalohisihisi noho. Unai ia vara, bema iseda kerere gunadia dainai hisihisi ita do abia noho. Bema iseda kara dika ita gwauraia hedinarai bona unai kara ita hadokoa, ita abia dae momokani Iehova ese iseda kara dika ia gwauatao. Bona Iehova ese ita ia gwauatao neganai, iseda kara dika ia laloatao lasi. (Ieremia 31:34 hahegeregerea.) Unai dainai bema Iehova be iseda kara dika ia laloatao lasi, ita danu iseda kara dika gunadia ita laloatao noho lasi be namo. Iehova be hari ita karaia gaudia ia laloa bada, to iseda kerere gunadia ia laloa lasi. (Esek. 33:14-16) Bona kahirakahira, iseda hebogahisi Tamana ese iseda kerere dainai ita davaria hisihisi ibounai do ia kokia momokani.
Iehova be hari ita karaia gaudia ia laloa bada, to iseda kerere gunadia ia laloa lasi (Paragraf 6 itaia)
7. Kara dika ta ita hunia neganai, dahaka ese ita do ia hagoadaia heduru ita tahua totona?
7 Bema kara dika badana ta ita karaia dainai ita lalohisihisi bona ma haida amo unai ita hunia, dahaka ita karaia be namo? Baibel ese ita ia hagoadaia, elda taudia amo heduru ita noia totona. (Iam. 5:14, 15) To, nega haida ia auka iseda kerere ita gwauraia hedinarai totona. Unai dainai namona be ita laloatao, Iehova ese unai tatau ia gaukaralaia ita idia durua bona idia ese Iena lalokau bona hebogahisi karana idia tohotohoa. Bema unai ita laloatao bona ita helalo-kerehai, do ita ura elda taudia ita hereva henia. Mani tadikaka ta ladana Arthura ita laloa, ia be ena kerere gunana dainai ia lalohisihisi, to Iehova ena hebogahisi karana ese ia hagoadaia. Ia gwau: “Lagani ta bamona ponografi lau itaia. To lalomamina ia herevalaia tok ta lau kamonai murinai, egu hahine bona elda taudia dekenai egu kara dika lau gwauraia hedinarai. Unai murinai egu lalomamina ia goeva, to lau karaia gauna dainai lau lalohisihisi. Elda taudia be lau idia hadibaia, Iehova be ita ia dadaraia lasi. Ita ia lalokau henia dainai ita ia sisiba henia. Edia hereva namodia ese lau ia durua bona lau laloparara Iehova be egu dika ia gwauatao.” Hari, Arthur be painia ta bona hesiai tauna. Ita diba ita helalo-kerehai neganai, Iehova be ita dekenai hebogahisi ia hahedinaraia, unai ese ita ia hagoadaia!
IEHOVA ESE HELARO IA HENIA
8. (a) Iehova ese Iuda taudia dekenai dahaka helaro ia henia? (b) Isaia 40:29-31 hegeregerena, edena dala ai idia helalo-kerehai Iuda taudia be edia helaro ese ia hagoadaia?
8 Reana Iuda taudia idia laloa edia tano dekenai do idia giroa lou diba lasi. Momo idia diba Babulonia Basileiana be ena igui hesiai taudia ia ruhaia diba lasi. (Isa. 14:17) To, Iehova ese ena taunimanima dekenai helaro ia henia. Ia gwauhamata ena taunimanima do ia ruhaia bona gau ta ese do ia koua lasi. (Isa. 44:26; 55:12) Iehova dekenai, Babulonia be kahu bamona. (Isa. 40:15) Kahu oi pururua neganai, ia boio haraga. Unai hegeregerena, Iehova dekenai ia auka lasi Babulonia amo ena taunimanima ia ruhaia totona. Unai helaro ese Iuda taudia ia hagoadaia. Bona Isaia ia gwau: “Iehova dekenai idia tabekau taudia be goada do idia abia lou.” (Isaia 40:29-31 duahia.) Idia be ataiai idia roho ugava bamona, badina edia helaro ese idia dekenai goada matamata do ia henia.
9. Edena dala ai Iehova ese Iuda taudia dekenai ia hamomokania, Babulonia amo idia do ia ruhaia?
9 Danu, Iehova ese Iuda taudia dekenai ia hamomokania ena gwauhamata do ia hagugurua. Edena dala ai? Mani edia negai idia guguru peroveta herevadia oi laloa. Hegeregere, idia diba Asuria ese Israela ena iduhu ten basileiana ia halusia bona ena taunimanima be igui hesiai taudia bamona ia abia lao. (Isa. 8:4) Idia itaia Babulonia taudia ese Ierusalema idia hadikaia bona ena taunimanima be igui hesiai taudia bamona idia abia lao. (Isa. 39:5-7) Idia diba Babulonia ena king ese King Sedekaia ena matana ia hakepulua bona Babulonia dekenai ia abia lao. (Ier. 39:7; Ese. 12:12, 13) Iehova ena peroveta herevadia ibounai idia guguru. (Isa. 42:9; 46:10) Unai gaudia ibounai dainai, idia abia dae Iehova ese idia do ia ruhaia gwauhamatana be do ia vara momokani!
10. Inai nega dokona lalonai, dahaka ese ita ia durua diba iseda helaro ita hagoadaia totona?
10 Dahaka ita dibaia? Ita lalohekwarahi neganai, vaira nega ena helaro ese ita do ia hagoadaia. Ita be nega aukadia lalonai ita noho bona Dirava idia inai henia siahu taudia ese ita idia dagedage henia. To, namona be ita lalomanoka lasi. Iehova ia gwauhamata paradaiso ai do ita mauri hanaihanai. Unuseniai, maino korikori bona noho namona do ita moalelaia. Unai helaro ita laloa bada be namo. Bema unai ita karaia lasi, iseda helaro be hegeregere, ia miro windo amo gabu hairaina ita itaia namonamo lasi bamona. Edena dala ai “windo ita hagoevaia” eiava iseda helaro ita hagoadaia diba? Dina ta ta ai nega ita atoa tanobada matamatana ai do ita moalelaia maurina ita laloa totona. Bona unai helaro ia herevalaia atikol ita duahia, vidio ita itaia, bona miusiki ita kamonai. Danu, guriguri amo Iehova dekenai, ita naria noho gwauhamata namodia ita gwauraia.
11. Dahaka ese gorere badana ia davaria taihu ta ia hagoadaia?
11 Taihu ta ladana Joy, be gorere badana ia davaria neganai, helaro ese ia hagoadaia dalana mani ita laloa. Ia gwau: “Lau lalohekwarahi neganai, Iehova dekenai egu hemami ibounai lau gwauraia, bona lau diba egu hemami ia lalopararalaia. Bona Iehova ese lau dekenai ‘taunimanima edia siahu ia hereaia gauna’ ia henia.” (2 Kor. 4:7) Danu, Joy be tanobada matamatana ai sibona ia piksaia, unuseniai “unai tano tauna ta do ia gwau lasi: ‘Lau gorere.’” (Isa. 33:24) Ita danu, bema Iehova dekenai iseda lalohadai ibounai ita gwauraia bona iseda helaro ita laloa bada, iseda hekwakwanai do ita haheaukalaia.
12. Dahaka badina haida dainai Iehova ena gwauhamata ibounai ita abidadama henia be namo? (Laulau itaia danu.)
12 Iehova ese Iuda taudia dekenai ia karaia bamona, ita dekenai badina momo ia henia, ena gwauhamata ita abidadama henia totona. Mani idia guguru vadaeni peroveta herevadia haida ita laloa. Hegeregere, Anglo-America Basileia Badana ita itaia, ia be “mai ena goada bona mai ena manoka.” (Dan. 2:42, 43) Danu, ita kamonai ‘tano mareremarere idia vara,’ bona ita be “bese ibounai” dekenai ita haroro noho. (Mat. 24:7, 14) Inai peroveta herevadia bona ma haida idia guguru karana ita itaia dainai, ita abia dae momokani, Iehova ese ena gwauhamata ibounai do ia hagugurua.
Hari idia guguru peroveta herevadia ese ita idia hagoadaia, Iehova ena gwauhamata ita abidadama henia totona (Paragraf 12 itaia)
IEHOVA ESE ITA IA DURUA ITA GARI LASI TOTONA
13. (a) Iuda taudia be Babulonia amo idia ruhaia neganai, dahaka hekwakwanai idia davaria? (b) Isaia 41:10-13 hegeregerena, edena dala ai Iehova ese Iuda taudia ia hagoadaia?
13 Iehova ese Babulonia ai idia noho Iuda taudia dekenai helaro ia henia, idia do ia ruhaia totona. To, ia diba unai nega ia kahirakahira neganai, hekwakwanai haida do idia davaria. Ia peroveta king goadana ta ese Babulonia ena badina hanuadia do ia biagua bona Babulonia do ia tuari henia. (Isa. 41:2-5) Iuda taudia do idia gari be namo, a? Lagani momo gunanai, Iehova ese ena taunimanima ia hagoadaia, bona ia gwau: “Oi gari lasi, badina lau be oi ida. Oi laloa momo lasi, badina lau be emu Dirava.” (Isaia 41:10-13 duahia.) Iehova ena hereva, “Lau be emu Dirava” ena anina be dahaka? Iehova be Iuda taudia ia hamaoroa lasi, ia idia tomadiho henia totona, badina unai idia diba vadaeni. To, idia ia hadibaia lou, ia be edia kahanai ia noho.—Sal. 118:6.
14. Iehova be dahaka gau haida ia karaia Iuda taudia ia durua idia gari lasi totona?
14 Iehova ese Iuda taudia ia hadibaia ena siahu bona diba be bada herea dainai idia gari lasi be namo. Ia ese Iuda taudia ia noia guba ena hisiu do idia itaia. Idia ia hamaoroa hisiu ia karaia sibona lasi, to edia ladana ta ta ia diba danu. (Isa. 40:25-28) Unai hegeregerena, Iehova be ena hesiai taudia ta ta edia ladana ia diba! Bema Iehova be mai ena siahu unai hisiu ia karaia, ia hegeregere momokani ena taunimanima ia durua totona. Oibe, Iuda taudia dekenai badina namona ta ia noho lasi, idia lalohekwarahi eiava gari totona.
15. Edena dala ai Dirava ese Iuda taudia ia durua, do idia vara gaudia totona idia hegaegae?
15 Danu, Iehova ese ena taunimanima ia durua do idia vara gaudia totona idia hegaegae. Isaia bukana ena matamana kahana ai, Dirava ese ena taunimanima ia hamaoroa: “Emui lalona daiutu dekenai umui vareai, bona iduara umui koua. Nega sisina lalonai umui hunia ela bona badu ia ore.” (Isa. 26:20) King Kurese be Babulonia ia tuari henia neganai, Iuda taudia be reana unai hakaua herevana idia badinaia. Idaunegai, Grik ena histori torea tauna ta ia gwau, “Kurese be Babulonia dekenai ia vareai neganai, [ena tuari taudia] dekenai oda ia henia, murimuri ai idia noho taudia ibounai do idia hamasea.” Mani oi laloa, Babulonia taudia be idia gari dikadika! To Iuda taudia be idia mauri, badina Iehova ena hakaua herevadia idia badinaia.
16. Dahaka dainai hisihisi badana lalonai do idia vara gaudia totona ita gari lasi be namo? (Laulau itaia danu.)
16 Dahaka ita dibaia? Kahirakahira hisihisi badana do ia vara. Unai ia matamaia neganai, taunimanima do idia daradara bona gari dikadika. To Iehova ena taunimanima be unai bamona do idia mamia lasi. Ita diba Iehova be iseda Dirava. Bona do ita gini maoromaoro badina ita diba, “[iseda] hamauria negana be ia mai kahirakahira noho.” (Luka 21:28) Ena be idia haboua tanobada besedia ese ita do idia dagedage henia, to Iehova dekenai do ita tabekau noho. Iehova ese aneru amo ita do ia gimaia, bona ita roho mauri totona hadibaia herevadia do ia henia. Iehova ese unai hadibaia herevadia be edena bamona do ia henia? Unai ita do diba lasi. To reana, unai bamona hadibaia herevadia be iseda kongrigeisen amo do ita abia. Unai be hegeregere iseda “lalona daiutu” bamona, unuseniai do ita noho namonamo. Edena dala ai do ia vara gauna totona ita hegaegae diba? Namona be iseda tadikaka taihu ita bamoa, mai ura ida orea amo hakaua herevadia ita badinaia, bona ita abia dae Iehova be iseda orea ia hakaua noho.—Heb. 10:24, 25; 13:17.
Ita diba Iehova be mai ena siahu bona ita ia hamauria diba, unai dainai hisihisi badana lalonai do ita gari lasi be namo (Paragraf 16 itaia)b
17. Edena dala ai Iehova dekenai oi tabekau diba?
17 Ena be Babulonia ai, Iuda taudia edia mauri be ia auka, to Iehova ese idia dekenai lalogoada ia henia. Ia ese ita dekenai unai bamona do ia karaia danu. Ena be emu mauri ai dahaka do ia vara, to Iehova oi abidadama henia noho. Oibe, ena hebogahisi hereadaena dekenai oi tabekau. Danu, emu helaro oi hagoadaia noho. Laloatao, Iehova be emu Dirava dainai, gau ta dekenai oi gari lasi be namo.
ANE 3 Goada, Helaro, Abidadama
a Ladana haida idia haidaua.
b LAULAU: Tadikaka taihu idia haboua. Hisiu idia itaia neganai, idia laloatao Iehova be mai ena siahu bona ena taunimanima ia gimaia diba, ena be tano idauidau ai idia noho.