Oi Dekenai Idia Noho Gaudia be Hegeregere, A?

1. Laloa maoromaoro ena anina be dahaka, bona dahaka ita karaia lasi be namo?

OI BE laloa maoromaoro tauna, a? Ia laloa maoromaoro tauna be hari ia abia hahenamo eiava ia dekenai idia noho gaudia dainai ia moale bona maino ia abia. Ia be ia dekenai idia noho lasi gaudia dainai ia badu lasi. To ena be iseda mauri ai ita dekenai idia noho gaudia be hegeregere bona ita moale, to namo lasi iseda mauri ita laloa lasi. Hegeregere, Keristani tauna ta be do ia ura ena hesiai gaukara ia habadaia. (Roma 12:1; 1 Tim. 3:1) To bema ia be hesiai gaukara ena hahenamo ia abia haraga lasi, reana do ia moale lasi.

2. Dahaka dainai laloa maoromaoro lasi karana ese dika ia havaraia diba?

² Bema ta ia laloa maoromaoro lasi, lalohadai kereredia do ia abia. Haida idia laloa idia dekenai idia noho gaudia be hegeregere lasi dainai, hora momo lalonai moni gaukara idia karaia unai amo kohu momo idia haboua diba. Madi, Keristani taudia haida be moni idia henaoa bona gau ma haida idia ura henia. Reana sibona dekenai idia gwau, ‘Unai moni lau abia be namo,’ ‘Lau be nega daudau lau naria vadaeni,’ eiava ‘Moni do lau abia bona gabeai do lau henia.’ To henaohenao tauna be Iehova ia hamoalea lasi bona ia matauraia lasi. (Aon. 30:9) Haida be hesiai gaukara lalonai hahenamo ta idia abia lasi dainai, edia hesiai gaukara Iehova totona idia rakatania. (Gal. 6:9) Edena dala ai Iehova ena hesiai tauna be unai bamona ia karaia diba? Reana unai ia vara ena badina be ena laloa maoromaoro karana ia badinaia lasi.

3. Filipi 4:11, 12 amo dahaka ita dibaia?

³ Ita ibounai be laloa maoromaoro karana ita hahedinaraia diba. Aposetolo Paulo ia gwau: “Herevana egu noho dalana be edena bamona, lau dekenai idia noho gaudia be hegeregere.” (Filipi 4:11, 12 duahia.) Paulo be dibura ruma ai ia noho neganai, unai hereva ia torea. To ia do moale noho. Ia be laloa maoromaoro karana ia dibaia. Bema ita hekwarahi laloa maoromaoro karana ita hahedinaraia totona, Paulo ena hereva bona ena haheitalai ese ita ia durua diba laloa maoromaoro karana ita hahedinaraia totona. Namo lasi ita laloa iseda noho dalana hegeregerena laloa maoromaoro karana ita hahedinaraia diba. To, namona be laloa maoromaoro karana ita dibaia. Edena dala ai? Mani laloa maoromaoro ita hahedinaraia totona ita do ia durua kara namodia ita herevalaia.

TANIKIU KARANA HAHEDINARAIA

4. Edena dala ai tanikiu karana ese ita ia durua diba? (1 Tesalonika 5:18)

⁴ Tanikiu karana ia hahedinaraia tauna ese laloa maoromaoro karana ia hahedinaraia diba. (1 Tesalonika 5:18 duahia.) Hegeregere, bema iseda mauri ai ita dekenai idia noho gaudia dainai ita tanikiu, ita dekenai idia noho lasi gaudia dainai do ita laloa momo lasi. Bema hari ita karaia noho hesiai gaukara lalonai ita abia hahenamo ita laloa, ita be mai ura bada ida iseda asainmen do ita karaia, bona hesiai gaukara idauna ma ta karaia totona do ita laloa momo lasi. Unai dainai Baibel ese ita ia hagoadaia iseda guriguri lalonai Iehova ita tanikiu henia totona! Bema tanikiu karana ita hahedinaraia, unai ese ita do ia durua “Dirava ena maino, laloparara ibounai ia hereaia gauna be Keriso Iesu amo do ia henia.”—Fili. 4:6, 7.

5. Dahaka badina haida dainai Israela taudia be tanikiu karana idia hahedinaraia be namo? (Laulau itaia danu.)

⁵ Mani Israela taudia dekenai ia vara gauna ita laloa. Nega momo Iehova dekenai idia maumau bona idia gwau Aigupito dekenai idia moalelaia aniani namodia idia reaia. (Num. 11:4-6) Momokani taunimanima lasi gabunai mauri be auka. Dahaka ese idia do ia durua idia laloa maoromaoro totona? Idia be Iehova ese idia totona ia karaia vadaeni gaudia dainai tanikiu karana idia hahedinaraia be namo. Israela taudia be Aigupito dekenai idia noho neganai hisihisi idia davaria, unai dainai Iehova ese Aigupito taudia dekenai hisihisi 10 ia havaraia. Israela taudia idia ruhaia murinai, “Aigupito taudia amo siliva, golo, bona dabua” idia abia. (Eso. 12:35, 36) Aigupito taudia ese Davara Kakakakana dekenai Israela taudia idia lulua lao neganai, Iehova ese hoa dalanai davara ia hapararaia. Taunimanima lasi gabunai idia loaloa neganai, Iehova ese mana amo dina ta ta ai idia ia ubua. Unai dainai Israela taudia be dahaka dainai idia maumau? Israela taudia be idia laloa maoromaoro lasi badina idia be idia dekenai ia noho gauna dainai idia tanikiu lasi.

6. Edena dala haida ai tanikiu karana ita hahedinaraia diba?

⁶ Edena dala ai tanikiu karana oi hahedinaraia diba? Ginigunana be nega oi atoa dina ta ta ai oi moalelaia gau namodia oi laloa totona. Reana gau rua eiava gau toi dainai oi tanikiu, unai be pepa ai oi torea diba. (Lal. 3:22, 23) Iharuana be tanikiu herevana oi gwauraia. Ma haida be oi totona idia karaia gaudia dainai idia oi tanikiu henia. Bona mai anina bada gauna ta be Iehova oi tanikiu henia. (Sal. 75:1) Bona ihatoina be tanikiu herevana idia gwauraia taudia oi tura henia. Bema laloa maoromaoro taudia oi bamoa, do oi laloa maoromaoro, to bema idia laloa maoromaoro lasi taudia oi bamoa, unai kara do oi hahedinarai lasi. (Deu. 1:26-28; 2 Tim. 3:1, 2, 5) Bema ita be tanikiu karana ita laloa bada ita be laloa maoromaoro karana do ita hahedinaraia noho.

7. Edena dala ai Aci be tanikiu karana ia hahedinaraia, bona dahaka ia vara?

⁷ Mani Aci dekenai ia vara gauna ita laloa. Ia be Indonesia dekenai ia noho. Ia gwau: “COVID-19 pendemik lalonai egu noho dalana be tadikaka taihu edia noho dalana ida lau hahegeregerea matamaia. Unai dainai laloa maoromaoro karana lau hahedinaraia lasi.” (Gal. 6:4) Dahaka ese Aci ia durua ena lalohadai ia haidaua totona? Aci ia gwau: “Lau be dina ta ta ai lau abia hahenamo lau laloa matamaia bona Iehova ena orea lalonai lau noho dainai lau abia gau namodia lau laloa bena Iehova dekenai tanikiu herevana lau gwauraia. Unai ese lau ia durua lau laloa maoromaoro totona.” Bema oi be lalohadai idauidau oi abia noho inai dala haida ese oi idia durua diba tanikiu karana oi hahedinarai diba, a?

OI LALOA NAMONAMO BONA OI MANAU

8. Nega ta Baruku dekenai dahaka ia vara?

⁸ Peroveta tauna Ieremia ena seketere Baruku be nega ta ena mauri ai ia abia lasi gaudia dainai ia moale lasi. Baruku be asainmen aukana ta ia abia badina ia be Ieremia do ia durua tanikiu ia hahedinaraia lasi bese ta dekenai hereva aukana ta do idia gwauraia. Nega ta Baruku be ia laloa namonamo lasi. Ia be Iehova ena ura gauna ia laloa bada lasi, to ia be sibona ia laloa matamaia bona ia ura do ia karaia gauna ia laloa. Unai dainai Iehova be Ieremia amo Baruku ia hamaoroa: “Oi be sibona totona gau namodia oi tahua noho. Unai bamona gaudia oi tahua lasi.” (Ier. 45:3-5) Unai be hegeregere ia gwau: “Hari oi dekenai idia noho gaudia be hegeregere.” Baruku be Iehova ena sisiba ia abia dae bona Iehova ia tura henia noho.

9. Manau karana ese ita do ia durua dahaka ita lalopararalaia totona? (1 Korinto 4:6, 7) (Laulau itaia danu.)

⁹ Reana Keristani tauna do ia laloa ia be mai ena diba, ia gaukara goada bona lagani momo lalonai Iehova ia hesiai henia dainai, hahenamo haida ia abia be namo. To, ena ura gaukara be ma haida ese idia abia vadaeni. Edena bamona unai do ia laloa? Ia be Paulo ena hereva 1 Korinto 4:6, 7 ai do ia laloa. (Duahia.) Ita abia diba bona hahenamo ibounai be Iehova ese ia henia. Iseda diba eiava goada dainai unai harihari gaudia ita abia lasi. To Iehova ena hebogahisi hereadaena dainai, unai harihari gaudia ibounai ita abia.—Roma 12:3, 6; Efe. 2:8, 9.

10. Edena dala ai manau karana ita hahedinaraia diba?

¹⁰ Iesu ese ita dekenai ia hahedinaraia haheitalai namona ita laloa dobu neganai, manau karana ita hahedinaraia diba. Iesu ese ena aposetolo taudia edia aena ia huria hanuaboina ai ia vara gauna mani ita laloa. Aposetolo Ioane ia gwau: “Iesu ia diba [1] Tamana ese gau ibounai be ena imana dekenai ia atoa vadaeni bona [2] ia be Dirava amo ia mai bona [3] Dirava dekenai do ia giroa lao. . . . Ena hahediba taudia edia aena ia huria matamaia.” (Ioa. 13:3-5) Iesu ese ena aposetolo taudia ia hamaoroa diba ena aena idia huria totona. To Iesu be tanobada ai ia noho neganai, ia ura lasi ladana bada taudia bamona do ia noho. (Luka 9:58) Iesu be ia manau bona ia laloa maoromaoro. Ia ese ita totona haheitalai hereadaena ia hahedinaraia.—Ioa. 13:15.

11. Edena dala ai manau karana ese Dennis ia durua ia laloa maoromaoro totona?

¹¹ Netherlands ai ia noho tadikaka Dennis be ia ura Iesu ena manau karana ia tohotohoa, to unai be ia auka. Ia gwau: “Nega haida ta be hesiai gaukara ena hahenamo ta ia abia neganai, lau badu eiava lau laloa maoromaoro lasi. Unai ia vara neganai, iseda pablikeisen ai manau karana lau stadilaia. JW Library^® app ai, manau karana ia herevalaia siridia lau makaia, unai amo lau davaria haraga bona lau duahia lou diba. Egu fon ai manau karana idia herevalaia tok lau daonloud, bena lau kamonai loulou.a Lau dibaia gauna be ita karaia gaukara ibounai be Iehova ita hanamoa totona, ita sibona hanamoa totona lasi. Ita ta ta be ita karaia gaukara maragidia amo Iehova ita durua noho, unai amo ena ura ia hagugurua diba.” Bema hesiai gaukara lalonai hahenamo ta oi abia lasi bona oi lalomanoka, namona be gau haida oi karaia manau karana oi hahedinaraia totona. Unai ese emu hetura karana Iehova ida do ia hagoadaia bona oi do ia durua oi laloa maoromaoro totona.—Iam. 4:6, 8.

EMU HELARO OI LALOA DOBU

12. Edena helaro namona ese ita ia hagoadaia ita laloa maoromaoro totona? (Isaia 65:21-25)

¹² Do ita laloa maoromaoro bema nega vaira ai do idia vara gau namodia ita laloa. Iehova ese peroveta tauna Isaia amo ia gwauraia herevana ese ia hahedinaraia, hari inai nega ai hekwakwanai momo do idia vara. Bona Iehova ese ita ia hadibaia unai hekwakwanai do ia haorea. (Isaia 65:21-25 duahia.) Mauri namona do ita noholaia bona ruma namodia ai do ita noho. Gaukara namodia do ita karaia, bona aniani namodia do ita moalelaia. Ita bona iseda natudia dekenai do idia vara dika gaudia dekenai do ita laloa momo lasi. (Isa. 32:17, 18; Ese. 34:25) Ita abia dae vaira nega ai unai gwauhamata ibounai do idia guguru.

13. Edena bamona negadia ai iseda helaro ita laloa bada be namo?

¹³ Dahaka dainai iseda helaro ita laloa noho be mai anina bada? Badina ita be “dina gabedia ai” ita noho bona ita ibounai be “nega aukadia” ita davaria. (2 Tim. 3:1) Dina ta ta ai Iehova ese ita dekenai hakaua herevadia bona goada ia henia ita haheauka noho totona. (Sal. 145:14) Ma danu, iseda Keristani helaro namona ese ita ia durua diba nega aukadia ita haheaukalaia totona. Reana oi hekwarahi emu famili be tauanina dalanai oi durua totona. Unai ese ia hahedinaraia oi be hanaihanai do oi hekwarahi, a? Lasi! Iehova ia gwauhamata emu dabu gaudia do ia henia, bona Paradaiso ai oi do ia hanamoa bada. (Sal. 9:18; 72:12-14) Reana oi be dina ta ta ai tauanina ena hisihisi, gorere badana ta, eiava lalometau oi haheaukalaia noho. Emu mauri be unai bamona sibona do ia noho, a? Lasi. Dirava ena tanobada matamata ai gorere bona mase be do idia ore. (Apok. 21:3, 4) Unai helaro ese ita ia durua ita laloa maoromaoro totona bona do ita badu lasi. Kara gageva ita davaria eiava iseda lalokau tauna ta ia mase, eiava gorere badana ta, eiava hahetoho ta ita haheaukalaia noho lalonai, ita laloa maoromaoro diba. Dahaka dainai? Badina ena be hari hahetoho badadia ita davaria, to unai “hisihisi be nega sisina” sibona bona kahirakahira unai hekwakwanai ibounai do idia ore.—2 Kor. 4:17, 18.

14. Edena dala ai iseda helaro ita hagoadaia diba?

¹⁴ Ita laloa maoromaoro totona iseda helaro be mai anina bada dainai, dahaka ese ita do ia durua unai helaro ita laloa bada totona? Tau ta be gabu daudau ia itaia namonamo totona, mata galasi ia atoa hegeregerena, ita be gau haida ita karaia diba, unai ese ita do ia durua Paradaiso ai do ita moalelaia gaudia ita laloa bada totona. Moni ena hekwakwanai ita laloa momo neganai, namona be moni ena hekwakwanai do idia ore negana ita laloa. Bema ita be hesiai gaukara lalonai asainmen ta ita abia lasi dainai ita lalohisihisi, namona be ita laloatao gabeai goevadae taudia ai do ita lao bona lagani tausen momo lalonai Iehova ita hesiai henia neganai, unai lalohekwarahi ibounai be do idia ore. (1 Tim. 6:19) Bema oi be hari inai nega ena hekwakwanai oi laloa momo, do ia auka vaira nega ena hahenamo oi laloa totona. To, nega ia hanaia lalonai, Iehova ese ia gwauhamatalaia gaudia laloa bada karana do oi manadalaia.

15. Christa ena hereva amo dahaka oi dibaia?

¹⁵ Paragraf gunanai ita herevalaia tadikaka Dennis ena adavana Christa be helaro laloa bada karana ese ia durua. Christa ia gwau: “Lau be masolo ena gorere ta lau davaria, unai dainai wilisea lau gaukaralaia bona dina momo bedi dekenai lau hekure. Dina ta ta ai hisihisi bada lau mamia. Vanegai egu doketa ese lau ia hamaoroa egu helt be ia namo lasi. To maoromaoro lau laloatao, ‘Ia ese vaira nega ia laloa dalana be egu laloa dalana amo ia idau.’ Lau be egu helaro lau laloatao, unai ese lau dekena lalomaino ia henia. Hari, egu hisihisi do lau haheaukalaia, to tanobada matamata ai egu mauri do lau moalelaia bada!”

“IA IDIA GARI HENIA TAUDIA BE IDIA DABU LASI”

16. Dahaka dainai King Davida ia gwau diba, Iehova idia gari henia taudia be do idia dabu lasi?

¹⁶ Ena be Iehova ena hesiai taudia be laloa maoromaoro karana idia hahedinaraia, to hekwakwanai do idia davaria danu. King Davida be ena natudia toi idia mase dainai, ia lalohisihisi bada. Ia be haida ese idia samania koikoi, ena turadia ese idia koia, bona lagani momo lalonai king ese ia ura hamasea. To, ia be hahetoho ta ia haheaukalaia noho lalonai, Iehova dekenai ia gwau: “Ia idia gari henia taudia be idia dabu lasi.” (Sal. 34:9, 10) Dahaka dainai unai bamona ia hereva diba? Badina ena be ita, Iehova ena taunimanima, be hekwakwanai do ita davaria, to ita diba ita be gau ta dekenai do ita dabu lasi. (Sal. 145:16) Bona Iehova dekenai ita tabekau diba, iseda hahetoho negadia ai ita ia naria totona. Ita laloa maoromaoro diba.

17. Dahaka dainai emu lalona oi hadaia laloa maoromaoro karana oi hahedinaraia totona?

¹⁷ Iehova ia ura laloa maoromaoro karana oi hahedinaraia. (Sal. 131:1, 2) Unai dainai oi hekwarahi laloa maoromaoro karana oi hahedinaraia totona. Bema oi gaukara goada tanikiu karana oi hahedinaraia totona, oi manau, bona emu helaro oi hagoadaia, oi gwau diba: “Oibe, lau be egu ahuna dainai lau moale.”—Sal. 16:5, 6.