“Kudou Maoro Taudia” be Do Idia Kamonai

1. Taunimanima ita haroro henia neganai, edena bamona do idia kara? (Kara 13:47, 48; 16:14, 15)

KERISTANI ginigunadia edia nega ai, taunimanima momo be nega ginigunana sivarai namona idia kamonai neganai, idia moale bona idia abia dae. (Kara 13:47, 48; 16:14, 15 duahia.) Hari danu, haida be nega ginigunana sivarai namona idia kamonai neganai, idia moale bada. Haida be guna sivarai namona idia dadaraia, to gabeai edia lalona idia haidaua bona mai kudouna ibounai ida idia abia dae. Unai dainai haroro ai “kudou maoro taudia” ita davaria neganai, dahaka ita karaia be namo?

2. Edena dala ai iseda haroro gaukara be uma naria tauna ida ita hahegeregerea diba?

² Iseda haroro gaukara be uma naria tauna ida ita hahegeregerea diba. Uma gabu ai, bema au huahua haida idia mage, uma naria tauna ese do ia kokia be namo. To idia do mage lasi huahua be do ia dairia bona naria noho. Unai hegeregerena, bema kamonai tauna ta be iseda hereva ia abia dae, ita ura karaharaga ia ita durua Keriso ena hahediba tauna ai ia lao totona. To danu, ma haida be iseda hereva idia abia dae haraga lasi neganai, ita ura idia do ita durua noho, unai amo do idia diba Dirava bona Baibel ena hereva do idia diba be mai anina bada. (Ioa. 4:35, 36) Bema ita laloparara ta be iseda hereva ia abia dae eiava lasi, do ita diba edena dala ai idia ita durua. Inai atikol ai, ta be nega ginigunana iseda hereva ia kamonai bona abia dae neganai, unai tauna ita durua Iehova ida ena hetura karana ia goada ia lao dalana do ita herevalaia.

KAMONAI TAUDIA DURUA DALANA

3. Haroro gaukara ai, kamonai tauna ta ita davaria neganai, edena dala ai ia ita durua diba? (1 Korinto 9:26)

³ Iseda haroro gaukara ai kamonai tauna ta ita davaria neganai, ita ura karaharaga ia ita durua Iehova ia dibaia bona ia kahirakahira do ia lao. Unai nega ginigunana ai, namona be ia dekenai Baibel stadi karaia dalana ita herevalaia bona ita boiria hebou dekenai ia mai totona.—1 Korinto 9:26 duahia.

4. Ta ia ura Baibel stadi ia hamatamaia haraga ena ekspiriens ta oi gwauraia.

⁴ Baibel stadi herevalaia. Ita hereva henia taudia haida idia ura Baibel stadi idia hamatamaia haraga. Hegeregere, Canada ai, dina ta, unai be Thursday ai, hahine ta be pablik haroro idia karaia taihu taudia dekenai ia lao bona troli amo Mauri Moalelaia Hanaihanai! buklet ia abia. Bena taihu ese unai hahine dekenai davana lasi Baibel stadi karaia dalana ia herevalaia. Unai hahine ia ura dainai taihu dekenai ena fon namba ia henia. Hora haida murinai, unai hahine be taihu ia rini henia badina ia ura stadi. Taihu ia ura wiken ai do idia karaia. To unai hahine ia gwau: “Kerukeru ia namo?” Unai Friday ai stadi idia hamatamaia. Bona Sunday ai unai hahine matamata be ena nega ginigunana hebou dekenai ia lao, bona gabeai ena hebou lao karana ia hadokoa lasi bona ia goada ia lao.

5. Baibel stadi herevalaia dalana namona ta ita diba totona, dahaka ita karaia be namo? (Laulau itaia danu.)

⁵ Momokani, taunimanima momo be unai hahine bamona lasi. Haida be nega bada lalonai do ita durua guna, gabeai Baibel stadi do idia abia dae. Unai dainai ruma tauna ia ura henia topik ta amo iseda hereva ita hamatamaia diba. To namona be lalohadai maorona ita abia bona ita hahedinaraia kamonai tauna ita laloa bada. Badina unai bamona ita karaia neganai, nega kwadogi lalonai Baibel stadi ita hamatamaia diba.

6. Edena bamona ita hereva diba, unai amo ta ida Baibel stadi ita karaia noho diba?

⁶ Baibel stadi ita herevalaia neganai, dahaka ita gwau diba? Baibel stadi momo idia hamatamaia vadaeni painia bona pablisa taudia edia haere do ita laloa karana ese ita do ia durua. Idia gwau tano haida dekenai inai hereva “stadi,” “Baibel kosi” eiava “oi do ai hadibaia” gaukaralaia lasi. To inai hereva “herevalaia” eiava “Baibel do oi dibaia” ita gaukaralaia be namo. Bona inai bamona hereva ita gwau diba, “Ita moale badina Baibel ese mauri ena mai anina bada henanadai ia haerelaia,” eiava “Baibel be tomadiho bukana ta sibona lasi, to iseda mauri lalonai heduru namona ia henia diba.” Ma oi gwau diba: “Ia be nega daudau lasi, miniti 10 ia lao 15 lalonai gau momo oi dibaia diba.” Inai hereva “wiki ta ta” oi gaukaralaia lasi, badina unai hereva dainai do idia laloa momo.

7. Haida be edena nega ai Baibel ena hereva momokani idia lalopararalaia? (1 Korinto 14:23-25)

⁷ Idia oi boiria hebou dekenai idia mai totona. Aposetolo Paulo ena nega ai, haida be edia nega ginigunana hebou dekenai idia lao neganai, Baibel ena hereva momokani idia lalopararalaia. (1 Korinto 14:23-25 duahia.) Hari inai nega danu be unai bamona. Kamonai matamata taudia be hebou dekenai idia lao neganai, idia goada idia lao haraga. Edena nega ai idia oi boiria diba? Mauri Moalelaia Hanaihanai! buka ena leseni 10 ai boiria hereva ia noho, to oi naria lasi ela bona unai leseni oi stadilaia. Umui herevahereva nega ginigunana ai, kamonai tauna oi boiria diba hebou dekenai ia mai totona. Reana pablik tok ena sinado eiava wiki ena Gima Kohorona Stadi ena point ta oi herevalaia.

8. Iseda hebou dekenai ta ita boiria neganai, ia dekenai dahaka ita hadibaia diba? (Isaia 54:13)

⁸ Iseda hebou dekenai ta ita boiria neganai, ia ita hamaoroa iseda hebou dalana be ia idau. Baibel stiuden ta be nega ginigunana Gima Kohorona Stadi dekenai ia helai neganai, taihu ia nanadaia, “Stadi naria tauna be ibounai edia ladadia ia diba, a?” Taihu ese ia hadibaia, ai ura kongrigeisen ai idia noho taudia ibounai edia ladana ai diba, ruma bese taudia ta ta be idia ta ta edia ladana idia diba bamona. Unai kamonai tauna ia laloparara ena dubu dekenai unai bamona idia karaia lasi. Unai amo ita diba, momo dekenai iseda hebou ita karaia dalana be idau. (Isaia 54:13 duahia.) Hebou ai ita ese Iehova ita tomadiho henia, ia amo diba ita abia, bona ta ta ita hagoadaia. (Heb. 2:12; 10:24, 25) Unai dainai iseda hebou be dala maorona ai ita karaia, bona kastom karadia ita badinaia lasi. (1 Kor. 14:40) Kingdom Hall lalonai momo idia moale badina diba abia totona idia mai. Danu ita ese politikol oreadia ita herevalaia lasi badina politikol lalonai ita vareai lasi; eiava iseda hebou dekenai ita boiboi lasi bona ita hepapahuahu lasi. Kamonai tauna do ia durua gauna ta be ia dekenai vidio ladana Kingdom Hall ai Dahaka Idia Karaia? ita hahedinaraia. Unai amo do ia diba hebou dekenai dahaka ia vara.

9-10. Hebou dekenai ta ita boiria neganai, ia dekenai dahaka ita gwau diba unai amo do ia gari lasi? (Laulau itaia danu.)

⁹ Haida idia ura lasi hebou idia mai, badina idia laloa idia do ita noia iseda tomadiho lalonai idia vareai totona. To, namona be unai tauna ita hadibaia, ita moale bema vadivadi taudia idia mai bona ita doria lasi hebou ai gau haida idia karaia totona. Ruma bese bona natudia idia mai diba. Hebou ai natudia be sibona idia hebou lasi, to tama sina bona natudia idia helai hebou bona hereva idia kamonai. Unai amo tama sina idia diba edia natudia be daidia ida idia noho bona diba idia abia noho. (Deu. 31:12) Ita ese mereki ita siaia loaloa lasi moni ita gogoa totona. To, Iesu ena hahegani ita badinaia, ia gwau: “Umui abia davana lasi, umui henia davana lasi.” (Mat. 10:8) Danu oi hadibaia diba ta be dava bada dabua ia karaia be anina lasi. Dirava ese kudouna ia itaia, taunimanima edia toana ia laloa lasi.—1 Sam. 16:7.

¹⁰ Bema unai tauna be hebou dekenai ia mai, namona be gau haida oi karaia unai amo hebou do ia moalelaia. Ia oi hakaua elda taudia bona pablisa ma haida ia hedavari henia totona. Bema hebou ia moalelaia, do ia ura ia giroa mai. Bema ia be Baibel lasi, emu Baibel umui itaia hebou. Tok eiava stadi karaia daladia haida oi herevalaia.

BAIBEL STADI MATAMAIA NEGANAI, DAHAKA ITA KARAIA?

11. Edena dala ai oi hahedinaraia diba kamonai tauna ena sediual bona nega oi laloa bada?

¹¹ Baibel stadi ita karaia neganai, dahaka ita karaia be namo? Ruma tauna ena nega bona sediual oi laloa. Hegeregere, bema nega oi atoa ia oi lou henia totona, unai nega oi badinaia, ena be emu noho gabu ai taunimanima be nega idia laloa bada lasi. Ma danu, stadi ginigunana be nega kwadogina lalonai oi karaia. Pablisa haida idia gwau, ena be kamonai tauna ia ura kamonai noho, to emu stadi oi hakwadogia. Bona oi hereva momo lasi, to ruma tauna be sibona ena lalohadai ia herevalaia be namo.—Aon. 10:19.

12. Baibel stadi ita hamatamaia neganai, iseda tahua gauna be dahaka?

¹² Leseni ginigunana oi karaia neganai, unai nega amo kamonai tauna oi durua, Iehova bona Iesu ia diba bona idia ia lalokau henia totona. Unai oi karaia totona, Baibel oi gaukaralaia, to sibona emu lalohadai oi gwauraia lasi. (Kara 10:25, 26) Aposetolo Paulo be haheitalai namona. Ia be taunimanima ia hadibaia neganai, nega momo Iesu Keriso ia herevalaia, badina Iesu be Iehova ese ia siaia mai ita dekenai Iehova bona ena lalokau ia hadibaia totona. (1 Kor. 2:1, 2) Paulo ese ia hahedinaraia, gau badana be hahediba taudia matamata ita durua kara namodia idia hahedinaraia totona. Unai kara namodia be golo, siliva, bona nadi namodia bamona. (1 Kor. 3:11-15) Unai be abidadama, aonega, laloa namonamo karana, bona Iehova gari henia karana. (Sal. 19:9, 10; Aon. 3:13-15; 1 Pet. 1:7) Paulo ena hahediba dalana oi tohotohoa. Emu stiuden oi durua ena abidadama ia hagoadaia bona ena hetura karana ena guba Tamana ida ia hagoadaia totona.—2 Kor. 1:24.

13. Kamonai taudia ita durua neganai, edena dala ai haheauka bona lalohadai maorona ita hahedinaraia? (2 Korinto 10:4, 5) (Laulau itaia danu.)

¹³ Iesu ena hahediba dalana ita tohotohoa dalana ta be haheauka bona laloparara ita hahedinaraia. Namo lasi henanadai aukadia oi gaukaralaia bona do ia hesiku. Bema stiuden tauna be stadi ena kahana ta ia lalopararalaia totona be auka, unai kahana umui rakatania, to gabeai umui giroa diba herevalaia totona. Bema ia auka ia dibaia gaudia ia abia dae totona, ia oi doria lasi unai gaudia ia abia dae totona, nega oi henia unai amo do ia laloa bona ena lalohadai do ia haidaua. (Ioa. 16:12; Kol. 2:6, 7) Baibel ia gwau hahediba koikoi herevadia be goada momokani gaudia bamona. (2 Korinto 10:4, 5 duahia.) Unai dainai stiuden dekenai do ia auka guna ia abia dae hahediba herevadia ia rakatania totona. Namona be ia ita durua Iehova be ena heau mauri gabuna ai ia halaoa totona.—Sal. 91:9.

KAMONAI MATAMATA TAUNA BE HEBOU IA MAI NEGANAI

14. Hebou ai kamonai matamata taudia be edena dala ai ita kara henia?

¹⁴ Iehova ia ura kamonai matamata taudia ita kara namo henia, ena be idia be idau hanua taudia bona edia mauri dalana be idauidau. (Iam. 2:1-4, 9) Unai dainai edena dala ai idia dekenai lalokau ita hahedinaraia diba?

15-16. Edena dala ai kamonai matamata tauna ita durua diba hebou ia moalelaia totona?

¹⁵ Haida be iseda hebou idia mai, badina idia ura diba edena dala ai iseda hebou ita karaia eiava gabu ma ta dekenai ia noho tauna ta ese ia boiria dainai idia mai. Unai dainai, unai taudia idia mai neganai, mai hemataurai ida idia oi welkam henia. Idia oi noia oi ida idia helai totona. Emu Baibel bona stadi magasin be ia ida oi itaia hebou, eiava Baibel bona stadi magasin ta oi henia diba. Ma danu, edia hemami oi laloa. Nega ta, Kingdom Hall dekenai ia mai tauna ta be tadikaka ia hamaoroa ia hemarai badina ia be dabua namona ia karaia lasi. Tadikaka ese unai tauna ia hanamoa bona ia gwau Iehova ena Witnes taudia be taunimanima ma haida amo idia idau lasi. Unai tauna be ia goada ia lao bona ia bapatiso, bona tadikaka ena kara namona ia laloaboio diba lasi. Unai dainai hebou idia mai taudia ida oi herevahereva neganai, idia do ia hahemaraia henanadai oi henia lasi.—1 Pet. 4:15.

¹⁶ Iseda herevahereva ai, haere ai, bona hebou ena kahana ta ai Witnes lasi taudia eiava idia abia dae gaudia ita herevalaia neganai, ita ura lasi hemataurai lasi dalana ai idia ita herevalaia. Namo lasi idia do ia hahemaraia eiava hahisia herevadia ita gaukaralaia. (Tito 2:8; 3:2) Hegeregere, idia abia dae gaudia ita gwauraia dika lasi. (2 Kor. 6:3) Unai dainai pablik tok idia henia tadikaka be unai gaudia idia laloa be namo. Danu edia tok ai Witnes lasi taudia ese idia lalopararalaia lasi herevadia edia anina idia gwauraia hedinarai, unai amo ia hahedinaraia kamonai matamata taudia ia laloa.

17. Haroro gaukara ai “kudou maoro taudia” ita davaria neganai, iseda tahua gauna be dahaka?

¹⁷ Dina ta ta idia hanaia noho lalonai, hahediba taudia halaoa gaukarana ita karaia be mai anina bada, bona “mauri hanaihanai idia ura kudou maoro taudia” ita tahua noho. (Kara 13:48) Unai ita karaia neganai, namona be Baibel stadi ita herevalaia eiava hebou dekenai idia ita boiria. Unai amo idia ita durua diba “mauri ia lao henia dalana” dekenai idia raka matamaia totona.—Mat. 7:14.