Duahia Taudia Edia Henanadai

Aonega Herevadia 30:18, 19 ia torea tauna ia gwau, “mero ese kekeni ia kara henia dalana” be “lau lalopararalaia lasi.” Ena anina be dahaka?

Momo be unai hereva dekenai idia daradara, diba bada taudia haida danu. Nega Matamata Trensleisen Ena Buka Helaga ai unai siri ia gwau: “Lau be gau toi dekenai lau hoa bada, oibe, inai gaudia 4 lau lalopararalaia lasi: guba ai manu ia roho dalana, nadi latanai gaigai ia marere dalana, davara badana ai bouti ia marere dalana, bona mero ese kekeni ia kara henia dalana.”—Aon. 30:18, 19.

Guna ita laloparara inai hereva “mero ese kekeni ia kara henia dalana” be kara dikana ta ia herevalaia. Dahaka dainai? Badina unai karoa lalonai siri haida be gau dikadia idia herevalaia bona unai gaudia idia gwau lasi “lau hegeregere vadaeni.” (Aon. 30:15, 16) Bona siri 20 ai “heudahanai hahine” ia herevalaia, ia gwau ia be kerere ta ia karaia lasi. Unai dainai ita laloa siri 18 bona 19 ese idia herevalaia gaudia be idia marere, to maka ta idia rakatania lasi. Hegeregere, guba ai manu ia roho dalana, nadi latanai gaigai ia marere dalana, davara badana ai bouti ia marere dalana. Unai hegeregerena ita laloa “mero ese kekeni ia kara henia dalana” be kara dikana ta, mero matamata ese kekeni ia koia bona idia mahuta hebou karana ia herevalaia.

To, toana be siri 18 bona 19 ese gau namodia ia herevalaia. Unai ia torea tauna be unai gaudia ia moalelaia.

Heberu gado maniuskrip ese ia hahedinaraia unai siri be gau namona ta ia herevalaia. Buka ta ladana Theological Lexicon of the Old Testament ia gwau, Aonega Herevadia 30:18 ai Heberu herevana idia hahanaia “lau lalopararalaia lasi” be tau ta ese ia moalelaia karana ta ia herevalaia.

United States ai Harvard University ena Profesa Crawford H. Toy ia gwau, unai siri be gau dikadia ia herevalaia lasi. Ma ia gwau: “Unai ia torea tauna be gau namodia ia herevalaia.”

Unai dainai ita abia dae Aonega Herevadia 30:18, 19 be gau namodia, edia marere dalana ita lalopararalaia lasi gaudia ia herevalaia. Baibel torea tauna hegeregerena, guba ai manu ia roho dalana, nadi latanai gaigai ia marere dalana, davara badana ai bouti ia marere dalana, bona mero bona kekeni idia hetura matamaia bona mauri idia moalelaia dalana dekenai ita moale.