Duahia Taudia Edia Henanadai

Hereva Lada-isidia 30:19 ia torea tauna be momokani ia laloa tauhau ena dala rami hebou kekeni be koikoi dalana dekenai ia hakererea be “mai hoa bada gauna,” a?

Unai be reana Hereva Lada-isidia 30:19 ena hereva ena anina ta, bona momokani unai siri ena anina ita lalo-pararalaia be ia auka sisina.

Unai siri ena anina ita tahua neganai, namo lasi unai karoa ena siri ma haida ita laloaboio. Unai hereva ena vairanai, Dirava ena lauma dainai ia torea tauna be taunimanima sibodia edia ura idia tahua momo bona idia hadokoa lasi gaudia hani ia gwauraia. (Hereva Lada-isidia 30:​15, 16) Bena ia ese inai lista ia torea: “Gau toi be lau dekenai mai hoa bada gauna, bona gau hani be lau diba lasi: ugava ena dala guba dekenai, gaigai ena dala nadi ta dekenai, lagatoi ena dala davara dekenai, bona tauhau ena dala rami hebou kekeni ta dekenai.”​—Hereva Lada-isidia 30:​18, 19.

Unai gaudia hani dekenai reana dahaka be “mai hoa bada gauna”?

Sedira idia laloa “mai hoa bada” herevana be gau namona ia herevalaia dainai, diba taudia haida idia gwau unai siri ese Dirava ena aonega ia havaraia gaudia ia hahedinaraia: manu badana ia roho dalana, aena lasi gaigai ena lao dalana nadi ta dekenai, davara ena hurehure badadia dekenai lagatoi metauna ia mutu lasi dalana, bona tauhau goadana be kekeni namona ia lalokau henia mai ura bada ida bona ia adavaia dalana, bena idia be natuna namona ta idia havaraia. Profesa tauna ta ia davaria unai gaudia hani ibounai dekenai gau tamona ia hedinarai, idia ta ta be dala matamatadia ta ta dekenai idia lao hanaihanai​—ugava, gaigai, bona lagatoi be hanaihanai guna ta ese ia lao henia lasi dalana dekenai idia lao, bona tau ese kekeni ia davaria neganai idia lalokau heheni dalana be idia dekenai matamata gauna.

To, unai gaudia hani be “mai hoa bada” dainai ita gwau lasi idia be gau namodia sibona, hegeregere idia ta ta ibounai dekenai ia noho gauna be gau namona bamona. Hereva Lada-isidia 6:​16-19 dekenai “Iehova . . . ia inai henidia” gaudia ena lista ia torea. Bona unai siri vairanai ita itaia Hereva Lada-isidia 30:​15, 16 dekenai ia be “Vadaeni!” idia gwauraia diba lasi gaudia (Sheol, natuna ia havaraia diba lasi bogana, ia ranu mase tanona, bona lahi badana) ia torea. Momokani idia be mai hoa gaudia namodia lasi.

Hereva Lada-isidia 30:18 dekenai, unai Heberu herevana “mai hoa bada” ena anina be “atoa siri, idau ai oi atoa; ma gau haida amo oi hapararaia ia idau dainai, ia be ma gau ibounai hegeregerena lasi oi atoa, ia be hoa gauna.” Gau ta be ma gau haida amo ita hapararaia diba, ma gau ibounai hegeregerena lasi ita atoa diba, bona ita hoalaia diba, to ita gwau lasi ia be gau namona. Daniel 8:​23, 24 ese dagedage king ta ia herevalaia, ia be “hoa dalana amo” hadikaia ore karana do ia karaia bona ‘goada taudia,’ helaga taudia danu, do ia hadikaia ore.​—Deuteronomi 17:8; 28:59; Sekaria 8:6.

Hereva Lada-isidia 30:​18, 19 murinai sirina amo reana do ita lalo-parara torea tauna be dahaka dekenai ia hoa. Hereva Lada-isidia 30 Siri 20 ia gwau heudahanai hahinena ia gwauraia, ia “aniani bona ena uduna ia dahua bona ia gwau ‘Lau kerere lasi.’ ” Reana hehuni dalana ai bona koikoi dalana ai ia kerere, to iena kerere ia hedinarai dalana be lasi dainai sibona ia gwau diba ia be kerere lasi.

Unai be guna ia torea lista bamona. Ugava be guba ai ia roho, gaigai be nadi ia hanaia, lagatoi be hurehure dekenai ia lao​—unai gaudia iboudiai idia lao murinai edia dala oi itaia diba lasi, bona do oi hekwarahi unai gaudia toi edia dala oi makaia totona. Bema unai gaudia toi be unai dala dekenai idia hegeregere, gau ihahanina be edena bamona, “tauhau ena dala rami hebou kekenina ta dekenai”?

Unai dala davaria danu ia auka diba. Tau matamatana ta be koikoi amo, lalo-ani hereva amo, bona hehuni aonega dika dalana amo rami hebou kekenina ta ena lalokau ia veria diba. Ia be mauri ena kara dekenai ia aonega bada lasi dainai, reana iena koikoi ia itaia diba lasi. Reana kerere dekenai unai tauna ese ia veria murinai, kekeni be ia diba lasi edena dala ai ia ese ia veria; reana unai kara idia itaia taudia danu idia lalo-pararalaia lasi. To, koikoi tataudia be kekeni matamatadia momo idia koidia idia kerere totona. Unai koikoi tataudia edia karaia dalana oi davaria be auka, to idia ura gauna ia noho, ugava ia roho, tano ai ia lao gaigaina, eiava davara dekenai lagatoi ia heau bona gabu ta dekenai idia lao henia bamona. Kekeni idia koia taudia idia tahua gauna be kekeni dekenai idia mahuta hebou kava, sibodia idia hamoalea totona.

Unai gaudia ita laloa neganai, ita itaia Hereva Lada-isidia 30:​18, 19 ese Dirava ia havaraia gaudia dekenai saiens gaudia eiava unai gaudia idia gaukara dalana ia herevalaia lasi. To, unai hereva be ita dekenai mauri ena kara namo ia sisibalaia, Hereva Lada-isidia 7:​1-27 be ita dekenai koikoi ariara hahinena dadaraia karana ia sisibalaia hegeregerena. Keristen taihudia be Hereva Lada-isidia 30:​18, 19 ena sisiba idia badinaia dalana ta be idia naria namonamo tatau haida be Bible ena diba idia tahua koikoi neganai. Bema tau ta, gaukara tauna ta danu, be kara namo bamona dalana dekenai ia hahedinaraia ia ura Bible ia tahua, namona be unai taihu ese ia hamaoroa kongregesen tadikaka ta dekenai ia lao. Bema unai tau be momokani Bible ia ura tahua unai tadikaka ese ia hadibaia diba, bona “tauhau ena dala rami hebou kekenina ta dekenai” ena kara amo dika do ia vara lasi.