Hakaua Oreana Ena Memba Matamata Rua
OCTOBER 5, 2024 ai, idia karaia lagani ta ta ena hebou ai idia hadibaia, Tadikaka Jody Jedele bona Tadikaka Jacob Rumph be Iehova ena Witnes taudia edia Hakaua Orea ena memba ai idia lao. Idia be lagani momo lalonai Iehova ena hesiai gaukara idia karaia.
Jody Jedele bona ena adavana Damaris
Tadikaka Jedele be Missouri, U.S.A. dekenai ia vara, bona hereva momokani lalonai ia tubu daekau. Idia be Witnes momo lasi gabuna ai idia noho. Unai dainai, haroro gaukara durua totona gabu idauidau amo tadikaka bona taihu idia mai. Idia ese idia hahedinaraia lalokau bona gaukara hebou karana ese Jedele ia hagoadaia bada. Bena October 15, 1983 ai ia bapatiso. Haroro gaukara ia moalelaia dainai, haisikuli ia haorea murinai, September 1989 ai, regula painia gaukara ia matamaia.
Tadikaka Jedele ia matamata neganai, ena tama sina be ia bona ena taihuna ida Betele idia vadivadi henia. Unai dainai Betele be edia tahua gauna ai idia halaoa, bona unai idia hagugurua. September 1990 ai, Tadikaka Jedele be Wallkill Betele dekenai ia lao bona Cleaning Department ai ia gaukara, bona gabeai Medical Service dekenai ia gaukara.
Unai nega ai, Spanish gado kongrigeisen idia momo idia lao, unai dainai tadikaka edia heduru idia ura. Unai dainai Tadikaka Jedele be unai kongrigeisen ta ia bamoa bona Spanish gado ia dibaia matamaia. Bena unai sekit ai painia taihu ta Damaris ida ia hedavari. Gabeai idia headava bona Betele dekenai idia gaukara.
Lagani 2005 ai, edia tama sina idia naria totona, Betele idia rakatania. Unai nega ai, regula painia idia karaia. Tadikaka Jedele be Painia Hesiai Sikuli ai tisa gaukara ia karaia, bona Hospital Liaison Committee bona Regional Building Committee dekenai danu heduru ia henia.
Lagani 2013 ai, Tadikaka bona Taihu Jedele be Warwick ena konstraksen totona Betele dekenai idia giroa lou. Unai nega amo idia be Patterson bona Wallkill dekenai idia gaukara. Tadikaka Jedele be Local Design/Construction Department bona Hospital Information Service ai ia gaukara. March 2023 ai, ia be Hesiai Komiti ena durua tauna ai ia lao. Ia abia asainmen idauidau ia laloa lou bona ia gwau: “Asainmen matamata oi abia neganai, nega haida do oi laloa momo. To namona be oi laloatao, unai nega ai Iehova oi tabekau henia be namo, badina ia ese oi do ia durua asainmen oi hagugurua totona.”
Jacob Rumph bona ena adavana Inga
Tadikaka Rumph be California, U.S.A. ai ia vara. Ia maragi neganai, ena sinana be tomadiho dalanai ia goada lasi, to hereva momokani ia hadibaia. Lagani ta ta ai ena tubuna hahine ia vadivadi henia, ia be Witnes ta. Ia ese Tadikaka Rumph ia durua hereva momokani ia dibaia totona, bona ena mauri lagani be 13 neganai, Baibel stadi ia hamatamaia. September 27, 1992 ai bapatiso ia abia. Ena sinana be ia goada lou bona ruma bese ibounai be bapatiso idia abia.
Tadikaka Rumph be ia matamata neganai, ia itaia painia taudia idia moale bada. Unai dainai haisikuli ia haorea neganai, September 1995 ai painia ia hamatamataia. Lagani 2000 ai, ia be Ecuador dekenai ia lao, haroro gaukara ia durua totona. Unuseniai Canada amo ia mai painia taihu Inga ida ia hedavari, bena idia headava. Idia headava murinai, Ecuador ena taoni ta dekenai grup maragina ta idia durua. Hari unuseniai be kongrigeisen badana ta ia noho.
Gabeai, Tadikaka bona Taihu Rumph be spesel painia bona sekit gaukara idia karaia. Lagani 2011 ai Gilead Sikuli ena klas namba 132 dekenai idia lao. Unai murinai, gabu idauidau bona hesiai gaukara idauidau idia moalelaia, hegeregere Betele, misinari gaukara bona sekit gaukara. Tadikaka Rumph be Basileia Evanelia Sikuli dekenai tisa gaukara ia karaia danu.
COVID-19 pendemik dainai, Tadikaka bona Taihu Rumph be United States dekenai idia giroa. Unai nega ai Tadikaka Rumph be Wallkill Betele dekenai, Hesiai Dipatmen ena treinini ia abia. Gabeai Ecuador ena brens dekenai idia siaia lao bona Brens Komiti gaukara ia karaia. Lagani 2023 ai Warwick dekenai idia lao. Bona January 2024 ai, Tadikaka Rumph be Hesiai Komiti ena durua tauna ai ia lao. Gabu idauidau ai ia karaia hesiai gaukara amo ia dibaia gauna be, ia gwau: “Hesiai gaukara oi moalelaia ena badina be gabu dainai lasi, to oi ida idia gaukara taudia dainai.”
Unai bamona idia gaukara goada tadikakadia “do [ita] lalodia bada noho.”—Fili. 2:29.