Sikuli Gabuna ai Taunimanima Pidia Karana​—⁠Baibel be Dahaka Ia Gwau?

May 24, 2022 ai, taoni maragina Uvalde, Texas, U.S.A dekenai, dika bada herea ia vara. The New York Times ia gwau, “tau ta ese ipidi amo sikuli natudia 19 bona tisa rua ia hamasea . . . Robb Elementary School ai.”

Nega momo unai bamona dagedage kara dika rohorohodia idia vara. USA Today ena ripoti ia gwau, United States sibona lalonai, “vanegai lagani ai, sikuli gabudia ai taunimanima pidia karana be nega 249 ia vara​—⁠unai ese lagani 1970 amo idia vara gaudia ia hanaia.”

Dahaka dainai unai kara dika rohorohodia idia vara? Edena dala ai ita ese unai dika karadia ita haheaukalaia diba? Nega ta dagedage karadia do idia ore, a? Baibel ese unai ia haerelaia.

Dahaka dainai tanobada ai dagedage karadia ia bada ia lao noho?

•  Baibel ia gwau ita be “dina gabedia” ai ita noho, taunimanima momo dekenai “lalokau do ia noho lasi” bona idia be “do idia dagedage” bona hahisia karadia do idia karaia. Unai bamona kara idia havaraia noho taudia be “edia kara dika do idia habadaia momokani.” (2 Timoteo 3:1-5, 13) Diba ma haida totona, inai atikol “Did the Bible Predict the Way People Think and Act Today?” oi duahia.

Taunimanima momo idia laloa, ‘Dahaka dainai Dirava ese inai kara dika rohorohona, ipidi amo sikuli taudia pidia karana ia koua lasi?’ Baibel ai haere oi diba totona, inai atikol “Bad Things Happen to Good People​—⁠Why?” oi duahia.

Edena dala ai dika idauidau ita haheaukalaia diba?

•  “Idia torea herevadia ibounai be ita hadibaia totona idia torea. Bona unai . . . Toretore Helagadia ese ita dekenai goada ia henia, unai amo helaro ita abia.”​—⁠Roma 15:4.

Baibel ena hakaua herevadia ese oi idia durua diba, inai dagedage bada tanobadana ai oi haheauka totona. Inai Awake! magasin ladana “Will Violence Ever End?” ena hereva ma haida oi itaia diba.

Heduru herevadia haida edena dala ai tama sina ese natudia idia durua nius ripoti idauidau dainai idia gari lasi totona, inai atikol “Disturbing News Reports and Your Children” oi duahia.

Dagedage karadia do idia ore, a?

•  “Ia ese hisihisi bona dagedage karadia amo idia do ia hamauria.”​—⁠Salamo 72:14.

•  “Edia tuari kaia be tano geia gaudia ai do idia halaoa, edia io be au rigidia utua kaia ai do idia halaoa. Bese ta ese bese ma ta do ia tuari henia lasi, bona tuari do idia dibaia lou lasi.”​—⁠Mika 4:3.

Taunimanima idia hegeregere lasi do idia karaia gaudia, be Dirava ese do ia karaia. Iena guba Basileia gavamanina amo tuari kohudia idauidau bona dagedage karadia ibounai do ia haorea momokani. Dirava ena Basileia ese do ia hagurugua gaudia oi diba totona, inai atikol “Dirava Ena Basileia Henunai ‘Maino Do Ia Bada Herea’” oi duahia.