Politik Dainai Dagedage Karadia Idia Vara Noho—Baibel be Dahaka Ia Gwau?

Gavamani taudia dagedage henia karana be ia bada ia lao.

Politik dainai dagedage karadia momo idia vara. Dahaka dainai? Unai karadia do idia ore, a? Baibel be dahaka ia gwau?

Politik dainai idia vara dagedage karadia be Baibel ese ia perovetalaia

Baibel ese iseda nega ia gwauraia “dina gabedia,” bona taunimanima momo be dagedage bona lalotamona lasi karadia do idia havaraia.

“Dina gabedia ai nega aukadia do idia vara. . . . Badina taunimanima be . . . tanikiu karana do idia diba lasi, ma haida do idia badinaia lasi, . . . do idia lalotamona lasi, . . . do idia dagedage, . . . edia turadia edia mauri hadikaia dalana do idia karaia, do idia kwara auka, do idia heagi.”—2 Timoteo 3:1-4.

Danu, Baibel ia peroveta iseda nega ai taunimanima ese gavamani do idia gwau-edeede henia bona politikol heiriheiri karadia momo do idia vara. (Luka 21:9, futnout) To politik dainai idia vara dagedage bona lalotamona lasi karadia be do idia ore.

Politik dainai idia vara dagedage karadia do idia ore Negana

Baibel ese ia hahedinaraia, Dirava ena guba gavamani ese taunimanima edia gavamani ena gabu do ia abia.

“Guba Diravana ese basileia ta do ia haginia, . . . Unai basileia ese basileia ibounai do ia hamakohia bona haorea momokani, bona ia sibona do ia gini ela bona hanaihanai.”—Daniela 2:44.

Dirava ena Basileia ese taunimanima do ia hatamonaia, bona tanobada ai maino do ia havaraia.

Basileia ia Lohiaia Tauna, Iesu Keriso be “Maino Lohiana” dainai, “maino be do ia doko lasi.”—Isaia 9:6, 7.
Hari danu, iena lohia henunai do idia noho taudia be maino ai noho dalana idia dibaia noho. Unai dainai Baibel ia gwau: “Edia tuari kaia be tano geia gaudia ai do idia halaoa, edia io be au rigidia utua kaia ai do idia halaoa. Bese ta ese bese ma ta do ia tuari henia lasi, bona tuari do idia dibaia lou lasi.”—Isaia 2:3, 4.

Diba ma haida abia totona, inai atikol duahia “Dirava Ena Basileia ese Dahaka Do Ia Hagugurua?” bona inai vidio Dirava Ena Basileia be Dahaka? itaia.