Edena Lohia Tauna Do Oi Abia Hidi?—Baibel be Dahaka Ia Gwau?

Wiki haida lalonai, tanobada hegegemadai ai, tano idauidau dekenai eleksen do idia karaia. Taunimanima be edia lohia tauna abia hidi totona disisen badana do idia karaia.

Baibel be dahaka ia gwau?

Taunimanima ena lohia dalana be mai ena hetoana

Baibel ese unai ia herevalaia hedinarai.

• “Lohia taudia umui abidadama henia lasi bona taunimanima danu, badina idia ese umui idia hamauria diba lasi. Iena laga ia doko, ia be tano dekenai ia giroa lou, unai dina ai ena lalohadai ia ore.”—Salamo 146:3, 4.

Gaukara namodia idia karaia lohia taudia be nega ta do idia mase. Danu idia rakatania gaukara, be lohia tauna ma ta ese gabeai do ia karaia o lasi, idia diba lasi.—Hadibaia Tauna 2:18, 19.

Badina, Baibel ia gwau Taunimanima be hegeregere lasi sibona idia lohiaia totona.

• “Iehova e, lau diba tau ta be sibona ena dala ia abia hidi diba lasi. Tau ta be ia hegeregere lasi sibona ia hakaua totona.”—Ieremia 10:23.

Iseda nega ai lohia tauna namona ta ia noho, a?

Dirava ese ia abia hidi lohia tauna namona

Baibel ia gwau, Dirava ese ita abidadama henia diba lohia tauna namona ta ia abia hidi, unai be: Iesu Keriso. (Salamo 2:6) Iesu be Dirava ena Basileia ena King, unai gavamani be guba ai ia lohia noho.—Mataio 6:10.

Iesu ena lohia dalana do oi abia hidi, a? Baibel ese ia hahedinaraia unai henanadai be mai anina bada:

• “Natuna [Iesu Keriso] umui abia dae, Dirava do ia badu garina bona umui do ia haorea, badina Dirava ena badu do ia vara haraga. Dirava be edia heau mauri gabuna ai idia halaoa taudia ibounai be idia moale.”—Salamo 2:12.

Hari be abia hidi negana. Baibel peroveta herevadia ese idia hamomokania Iesu ena lohia negana be, lagani 1914 amo ia matamaia bona kahirakahira Dirava ena Basileia ese taunimanima edia gavamani ibounai do ia haorea.—Daniela 2:44.

Iesu ena lohia dalana oi durua totona inai atikol duahia, “Hari Abia Hidi Ita Karaia Dirava Ena Basileia Ita Durua Totona!”