Dahaka Dainai Politik Karadia ese Taunimanima ia Hapararaia Noho?​—Baibel be Dahaka Ia Gwau?

Tanobada besedia be politik dainai hisihisi idia davaria. Lagani 2022 ena tahua gaukarana lalonai Pew Research Center ia gwau, “tano 19 amo taunimanima 65% idia gwau politikol orea idauidau idia sapot taudia huanai hepapahuahu bada herea ia vara.”

Emu tano ai, taunimanima be politik karadia ese ia hapararaia noho, a? Dahaka dainai? Hamaoromaoroa dalana ta ia noho, a? Baibel ena hereva ita itaia.

Parara ia havaraia karadia

Baibel ese iseda negai ia perovetalaia, ia gwau “dina gabedia ai,” taunimanima momo edia kara dainai lalotamona havaraia be do ia auka.

• “Dina gabedia ai nega aukadia do idia vara, unai ese taunimanima do idia hametaua bada. Badina taunimanima be sibona do idia laloa bada, . . . do idia lalotamona lasi.”​—2 Timoteo 3:1-3.

Ena be taunimanima idia gaukara goada gavamani idia durua totona, to unai ese namo ia havaraia lasi. Taunimanima be mai edia lalohadai idauidau dainai hekwakwanai hamaoromaoroa totona idia gaukara hebou be auka. Unai ese idaunegai Baibel ia gwauraia herevana ia hamomokania.

• “Taunimanima ese ta ta idia biagua bona idia hahisia.”​—Hadibaia Tauna 8:9.

To, Baibel ese unai hamaoromaoroa dalana ia herevalaia—gavamani ta ia gunalaia tauna ta ia noho, ia ese hari inai negai taunimanima dekenai idia vara hekwakwanai ia haorea diba.

Gunalaia tauna maorona

Baibel ese gunalaia tauna maorona ia herevalaia: Unai be Iesu Keriso. Iesu be mai ena siahu, mai ena maoro, bona ia ura taunimanima ibounai totona lalotamona bona maino ia havaraia.

• “Iena lohia negana lalonai kara maoromaoro do ia bada, bona maino do ia bada herea.”​—Salamo 72:7.

• “Bese idauidau ibounai ese ia do idia hesiai henia.”​—Salamo 72:11.

Iesu be gunalaia tauna hereadaena badina haida ese idia kara namo henia lasi taudia ia laloa bada bona ia ura durudia.

• “Ia ese heduru totona idia noinoi ogogami taudia do ia hamauria, ladana maragi taudia bona heduru idia abia lasi taudia do ia hamauria danu. Ia ese ladana maragi taudia bona ogogami taudia do ia hebogahisi henia, bona ogogami taudia do ia hamauria. Ia ese hisihisi bona dagedage karadia amo idia do ia hamauria.”​—Salamo 72:12-14

Dirava ena Basileia, Iesu ese ia gunalaia guba gavamanina totona diba ma haida abia. Iena lohia dalana oi durua bona namo oi abia diba dalana dibaia.

• Inai vidio Dirava Ena Basileia be Dahaka? itaia.

• Inai atikol “Dirava Ena Basileia—Korapsen Ia Dadaraia Gavamanina” duahia.