Olympics Gadara ese Taunimanima ia Hatamonaia Diba, A?​—⁠Baibel be Dahaka Ia Gwau?

Lagani 2024 Olympics gadara ai, taunimanima 5 bilioni bamona be, tano 206 amo idia mai taudia edia gadara do idia itaia. Thomas Bach be International Olympic Komiti ena presiden, ia gwau: “Inai gadara amo ai ese tanobada ena maino bona lalotamona karana ai durua. Olympics ese ia havaraia lalohadaina ita matauraia, namona be taunimanima ibounai be maino bona lalotamona ai do idia noho, herevana ita be ta ta amo ita idau.”

Olympics gadara ese unai ia havaraia diba, a? Maino bona lalotamona korikorina ita davaria diba, a?

Maino bona lalotamona idia havaraia diba, a?

Inai lagani ena Olympics be spot gadara sibona totona lasi. Gadara ese ia hahedinaraia komiuniti bona politik lalonai taunimanima be lalotamona ai idia noho lasi. Unai hekwakwanai haida be, taunimanima edia maoro, bese abia isi karana, tomadiho gwauraia dika karana, bona maka tamona ai taunimanima idia kara henia lasi.

Intanesinol spot gadara hegeregere, Olympics be taunimanima hamoalea totona idia karaia. To, hari unai gadara amo ia hedinarai taunimanima edia lalohadai bona idia karaia gaudia ese idia do ia hatamonaia lasi, bona idia do ia durua lasi maino bona lalotamona korikorina idia havaraia totona.

Baibel ese taunimanima edia lalohadai o kara ia perovetalaia, unai ese ia hahedinaraia idia be hegeregere lasi tanobada ai lalotamona idia havaraia totona. (2 Timoteo 3:1-5) Unai Baibel ena peroveta hereva ena diba ma haida abia totona, inai atikol “Did the Bible Predict the Way People Think and Act Today?” duahia.

Tanobada ai maino bona lalotamona ena helaro korikorina

Baibel ese tanobada ai maino bona lalotamona ena helaro korikorina ia herevalaia. Danu ia gwauhamata, tanobada ai taunimanima ibounai be guba gavamani ta, idia gwauraia “Dirava ena Basileia” henunai lalotamona ai do idia noho.​—Luka 4:43; Mataio 6:10.

Unai Basileia ena King, Iesu Keriso ese tanobada ibounai ai maino do ia havaraia. Baibel ia gwau:

• “Kara maoromaoro do ia bada, bona maino do ia bada herea.”​—Salamo 72:7.

• “Ia ese heduru totona idia noinoi ogogami taudia do ia hamauria . . . Ia ese hisihisi bona dagedage karadia amo idia do ia hamauria.”​—Salamo 72:12, 14.

Hari danu, Iesu ena hahediba herevadia ese tano 239 ai idia noho taudia milioni ia hatamonaia. Iehova ena Witnes taudia be Keristani taudia dainai, tanobada hegegemadai ai maino ai noho karana idia dibaia. Unai oi diba totona inai Gima Kohorona magasin ladana, “Inai Heheni Karana Ita Hadokoa” duahia.