Dahaka Dainai Taunimanima be Maino Idia Havaraia Diba Lasi?​—Baibel be Dahaka Ia Gwau?

Tanobada ena gunalaia taudia bona intanesinol orea idauidau be idia hegeregere lasi maino idia havaraia totona. Tanobada Tuarina Iharuana ia vara negana amo ema bona hari, dagedage karadia momo idia vara noho. Taunimanima 2 bilioni bamona—tanobada ena popiuleisen 25 pesen—be dagedage idia vara gabudia dekenai idia noho.

Dahaka dainai taunimanima be maino idia havaraia diba lasi? Baibel be dahaka ia gwau?

Taunimanima be maino idia havaraia diba lasi ena badina toi

1. 1. Taunimanima edia kara ese maino ia havaraia dalana ia koua. Baibel ia peroveta iseda nega ai, “taunimanima be sibona do idia laloa bada, moni do idia ura henia bada, do idia hekokoroku, . . . ma haida do idia badinaia lasi, . . . do idia lalotamona lasi, . . . sibona do idia biagua lasi, do idia dagedage, . . . do idia kwara auka, do idia heagi.”​—2 Timoteo 3:2-4.

2. 2. Taunimanima be Havaraia Tauna Iehovaa Dirava ena heduru idia tahua be namo, badina idia sibodia eiava idia be orea ta bamona hekwakwanai idia hamaoromaoroa diba lasi. Baibel ese ia hahedinaraia “tau ta be ia hegeregere lasi sibona ia hakaua totona.”​—Ieremia 10:23.

3. 3. Inai tanobada be dika tauna, unai be Satani Diabolo ena lohia henunai ia noho, ia ese “tanobada ibounai ia hakaua kerere noho.” (Apokalupo 12:9) “Tanobada ibounai be Dika Tauna ena siahu lalonai ia noho” dainai tuari bona hepapahuahu be do idia vara noho.​—1 Ioane 5:19.

Maino be daika ese ia havaraia diba?

Baibel ese ita ia hadibaia maino do ia vara diba taunimanima amo lasi to Dirava ese do ia havaraia.

• “Iehova ia gwau: ‘Lau diba umui totona dahaka do lau karaia, lau ese umui dekenai maino do lau henia, bona dika do lau henia lasi, unai amo vaira nega ai noho namo do umui davaria.”​—Ieremia 29:11.

Edena dala ai Dirava ese unai gwauhamata do ia hagugurua? ‘Maino ia henia Diravana ese Satani do ia moia diho momokani.’ (Roma 16:20) Dirava be guba gavamani do ia gaukaralaia, bona Baibel ese unai gavamani ia gwauraia “Dirava ena Basileia.” Unai ese tanobada ibounai dekenai maino do ia havaraia. (Luka 4:43) Iesu Keriso, Basileia ena King unai, ena lohia henunai, taunimanima be maino ai noho dalana do idia dibaia.​—Isaia 9:6, 7.

• Diba ma haida abia totona inai atikol “What Will God’s Kingdom Accomplish?” duahia.